Read Q'anjob'al Nm 28 Bible Online

Nm 28 - Q'anjob'al bible

Nm 28

¹Max yalon Jehová bay cham Moisés

²Al jun chekbanilej ti' bay eb et conob tu': Tol yin is tiempoal txequel yayji canok, chi yikej eb yak'on juntzan ofrenda chi ak'lay tz'a yin xajanbalil ayin, tol caw watx' chi wabej, ẍi Jehová.

³Max yalon c'apax Moisés bay eb tol a ton juntzan ofrenda ti' yowalil chi yak' tz'a yuj yilay aj can Cham. Junjunc'al c'u chi ak'lay cac'on no ach'ej calnel jun abil is k'inal, tol c'am jabok is tacnakil.

⁴Jun no' chi ak'lay yet k'inibalil, axa junxa no' chi ak'lay yet yayc'ualil.

⁵A pax ofrenda yin ixim trigo xin, yowalil chi ak'lay canebok libra harina caw wal watx', chi somlay yetok junok litro aceite yet olivo.

⁶A bay witz Sinaí max chek Jehová yak'lay juntzan xajanbal ti' yin junjun c'u, a ton ofrenda watx' chi yab Cham.

⁷Junok litro vino chi ak'lay yetok no calnel yet k'inibalil, chi seclay ay bay is cajlobal Jehová yuj yilay aj can Cham.

⁸Axa junxa no calnel tu' chi ak'lay no' yin xajanbalil yet yayc'ualil cax chi ak'lay c'apax harina c'al vino yin ofrendail yetok no', lajanc'al axca chi ak'lay yet k'inibalil. A jun ofrenda tu' chi ak'lay tz'a satak Jehová, watx' chi yab Cham.

⁹A yet c'ual xewilal yowalil che yak' cac'onok no ach'ej calnel jun abil is k'inal, tol c'am wal jabok is tacnakil, yetok waxakeb libra harina caw wal watx' che som yetok aceite yin ofrendail yin ixim trigo. Cax chi ak'lay c'apax vino yetok, axcac'alta' chi yun yak'layi.

¹⁰A masanil juntzan xajanbal tu' chi ak'lay yet c'ual xewilal, palta tx'ok yel yintak xajanbal chi ak'layc'alta' yet junjun c'u, yetok c'apax vino chi ak'layc'alta' yetok.

¹¹A yet babel c'ual yet junjun xajaw chi ak'lay cac'on no ach'ej wacax yin xajanbalil, yetok jun no icham calnel c'al ukc'on no ach'ej calnel jun abil is k'inal; masanil no' ti' c'am jabok is tacnakil.

¹²A yin junjun wacax tu' che yak' lajcawebok libra ixim harina caw wal watx', che som yetok aceite. Axa yetok no icham calnel tu' chi ak'lay waxakeb libra harina caw wal watx', chi somlay yetok aceite.

¹³Axa yetok junjun no ach'ej calnel tu', caneb libra harina caw wal watx' sombil yetok aceite. A ton jun ofrenda chi ak'lay tz'a ti', watx' chi yab Jehová.

¹⁴Axa vino chi ak'layc'alta' yin ofrendail, cab litro chi ak'lay yetok junjun no wacax tu', nan is cab litro yin junjun no icham calnel, junjun litro yin junjun no ach'ej calnel tu'. A ton juntzan ofrenda yowalil chi ak'lay yet junjun xajaw yul abil.

¹⁵Cax chi ak'layc'alta' ofrenda yin junjun c'u. Yowalil c'apax chi ak'lay junok no mam chiwo bay Jehová yin xajanbalil yuj mulej, yetokc'al vino chi ak'layc'alta' yin ofrendail.

¹⁶A yet 14 waay babel xajaw yul abil, chi chalay k'in Pascua yuj yilay aj can Jehová.

¹⁷Axa yet 15 waay xajaw tu', cax chi chalay yich ukeb c'u k'in, a ton yet chi lolay ixim pan c'am yich ayocok.

¹⁸A yet babel c'u yet ukeb c'ual tu' chi oc jun miman wajayil yuj e yoc yin ayilal. A yet jun c'ual tu', c'am junok mactxel chi mulnaji.

¹⁹Cac'on no ach'ej wacax chi ak'lay yin xajanbalil, jun icham calnel yetok ukc'on no ach'ej calnel junjun abil is k'inal. Masanil no' ti', c'am jabok is tacnakil.

²⁰A yetok juntzan xajanbal ti' chi ak'lay juntzanxa ofrenda chi ak'layc'alta' yetok, harina sombil yetok aceite, chi ak'lay axca ti': 12 libra harina yetok junjun wacax, 8 libra yetok no icham calnel,

²¹4 libra yetok no ach'ej calnel.

²²Cax chi ak'lay c'apax junok no' mam chiwo yin xajanbalil yuj mulej yet chi tancan el e mul e yiban.

²³Masanil juntzan tu', chi ak'lay yetok jun xajanbal chi ak'lay yet k'inibalil yet junjun c'u.

²⁴Axca tu' chi yun junjun c'u yin ukeb c'ual k'in tu'. Chi ak'lay tz'a juntzan ofrenda tu' tol watx' chi yab Jehová. Palta tx'ok pax yayji xajanbal chi ak'layc'alta' yet junjun c'u yetok c'apax vino chi ak'layc'alta' yetok.

²⁵Axa yet is suk c'ual xin, chi oc pax junxa miman wajayil yuj e yoc yin ayilal. A yet jun c'ual tu' c'am junok mac chi mulnaji.

²⁶A yet mayal eq'uel ukeb semana yec' k'in Pascua, yet che yak'on e yofrenda bay Jehová yuj babel sat e yawoj tolto che waj tu', che wajbaj oc e ba e masanil yuj e yoc yin ayilal, c'am junok ex chex mulnaji.

²⁷Che yak' c'apax bay Jehová junok xajanbal caw wal watx' chi yab Cham, cac'on no ach'ej wacax, jun icham calnel, ukc'on no ach'ej calnel jun abil is k'inal,

²⁸yetok ixim harina tol watx' chi ak'layc'alta'a, sombil yetok aceite; 12 libra harina yetok junjun no wacax, 8 libra yetok no icham calnel,

²⁹4 libra yetok junjun no ach'ej calnel tu'.

³⁰Cax che yak'on c'apax junok no mam chiwo yin xajanbalil yuj e mul.

³¹A yetok juntzan xajanbal tu' chi ak'layc'al ofrenda yin harina c'al yetok vino, cax che yak'on c'apax xajanbal chi ak'layc'alta' yet junjun c'u. A masanil no' chi ak'lay tu' yowalil tol c'am jabok is tacnakil.