Read Q'anjob'al Nm 32 Bible Online

Nm 32 - Q'anjob'al bible

Nm 32

¹A eb tribual Rubén yetok Gad xiwil is jobbejal no' eb. A yet max yilon eb tol a tx'otx' chi yik Jazer c'al Galaad, xiwil watx'il tx'otx' yet chi joblay no no',

²max toj eb yilon cham Moisés yetok cham sacerdote Eleazar yetokc'al eb yajawilal conob. Max yalon eb axca ti' bay eb:

³—Ilek wal tx'otx' makbil yuj conob Atarot, Dibón, Jazer, Nimra, Hezbón, Eleale, Sebam, Nebo, c'al Beón, tol caw wal watx' tx'otx' bay chi low masanil no jobbejal no'. A Jehová max ion ec' tx'otx' tu' yuj yoccan tx'otx' jetok ayon israel on ti'. E yojtak c'apaxok tol a juntzan no no' ti' jobbil juj on

⁵xan ta watx' che yabej ak'ek juntzan tx'otx' ti' ayon yet c'am chon e yacan ec'tok bay k'axepaltok a' Jordán, ẍi eb.

⁶Max yalon cham Moisés bay eb: —¿Tom chi yochej e c'ul chex cancan cayti' yak'ban chi toj eb e yet conob yin owal?

⁷¿Tzet yuj xan che yak' cabax aj c'ul eb e yet conob ti' yet c'am chi ec'tok eb bay jun lugar max yal Jehová tol chi yi' eb?

⁸Axca ton wal tu' max yut ba eb e yichmam yet max cheklaytok eb yilon tx'otx' yet ayon ec' bay Cades-barnea.

⁹Max apnitac'al oc eb yilon jun lugar tu' masantac'al bay jobeal a' aej Escol. Max lajwi tu' cax max yak'on eb cabax aj c'ul eb jet israelal yet c'am chi octok eb bay tx'otx' tol max yak' Jehová is ti' yak'on ayon.

¹⁰Yuj wal tu' xan max tit yowal c'ul Jehová yet jun c'ual tu', xan max yak' is ti' tol

¹¹a eb anima 20 abil is k'inal chi beyc'altok yet max el eb bay Egipto, man ok yil eb tx'otx' max yak' Cham is ti' yak'on bay yinatil Abraham, Isaac c'al Jacob, yujtol man yinok masanil c'ul eb max tzakloj eb yintak tzet max yal Cham.

¹²Asan Caleb is c'ajol Jefone yinatil Cenaz, c'al Josué is c'ajol Nun, ok yil eb tx'otx' tx'otx', a ton eb max iken yin masanil is c'ul bay tzet max yal Jehová.

¹³Max tit yowal Jehová jin, xan 40 abil max con ec' bay takin tx'otx' yuj Cham, masantac'al max yal c'ayil masanil eb maj iken bay Cham, c'amxa junok max cani.

¹⁴Axa ayex ti', ex yinatil anima tenomtak, chi yochej e c'ul che beybalnej is beybal eb e yichmam tu' yet ok e tx'emon paxtek yowal c'ul Jehová jiban junelxa.

¹⁵Ta c'am che yochej chex tzakloj yintak Cham, ok ex bekcan Cham bay jun takin tx'otx' ti' yetok masanil jun conob ti'. E yuj wal ayex ti' cax ok on lajwok ayok, ẍi Moisés.

¹⁶Yuj tu xin max jitztek ba eb cawilal cham Moisés, max yalon eb axca ti': —A wal tzet chi jochej on tol chi co watx'nej aj is corral co calnel c'al co wacax cayti', c'al conob yet jetbi c'al juninal on.

¹⁷Axa ayon ti' ok co watx'nej co ba yin owal, cax ok on babjok satak eb jet conob ti', masantac'al ok yal jiontok eb bay tx'otx' tu'. Axa jetbi c'al juninal on chi cancan bay conob ayoc is murallail ti' yin junc'ulal, yet watx' c'amc'al tzet chi utlay eb yuj eb anima cajan bay juntzan lugar ti'.

¹⁸Masantac'al chi yal cancan eb jet conob ti' bay sat is lugar, catatu' chon meltzojtek bay co na ti'.

¹⁹Yujtol a tx'otx' bay jun pac ti' jet chi yuncan oc tx'otx', a ton bay yetc'ulal bay chi ajol c'u ti'; xan a bay k'axepal ec'tok a' Jordán tu', man ok co cha' co tx'otx' ayon ti', ẍi eb.

²⁰Max tak'wi cham Moisés bay eb: —Chi je' che yican tx'otx' tx'otx' ti' tatol chi yun wal axca bay che yal tu', cax chex oc wal yin owal satak Jehová.

²¹Ta e masanil ayex ti' ibil oc e mitx'k'ab yet owal ok ex ec'tok bay a' Jordán satak Cham, cax chex canc'al bay tu' masantac'al chi yal yel eb ajc'ul tu' yuj Cham,

²²axca tu' ok yun e yioncan tx'otx' tx'otx' ti' yuj Jehová. Yet mayal ayc'ay eb anima bay tu', catatu' ok ex meltzojok. Axca tu' ok yun e yiken bay che yak' e ti' bay Jehová, c'al bay eb e yet conob ti'.

²³Palta ta c'am che yun axca tu', watx' che yojtaknejcan elok tol che yaoc e mul bay Jehová, ok apnok c'ual cax ok yaon oc yailal e yiban yuj e mul tu'.

²⁴Watx'nejek aj e conob yuj e yetbi c'al e yuninal, cax che watx'nen corral e calnel tu', cax ok e yiken masanil tzet che yal tu', ẍi cham Moisés.

²⁵Xan caytu' max yun tak'wi eb yinatil Rubén, c'al eb yinatil Gad axca ti': —A ayon a chekbej on ti', ok jikej masanil tzet max al tu'.

²⁶A eb ix jetbi on c'al yetok co yaliẍ unin, yetokc'al masanil co jobbejal no', ok cancan bay Galaad ti'.

²⁷Axa ayon ti' xin, ok on tok yin owal bay ok yal c'ul Jehová axca wal alon ti', ẍi eb.

²⁸Caytu' max yun yalon cham Moisés bay Eleazar cham sat sacerdote, c'al bay Josué yetokc'al bay masanil eb yajawil conob yin junjun makan tribual Israel:

²⁹—Ta masanil eb winak yin is tribual Gad c'al Rubén tol watx' yayji eb yin owal, cax ok ec'tok eb bay yul a' Jordán satak Jehová, masantac'al che yi' tx'otx' tx'otx' tu', catatu' cax che yak'on tx'otx' Galaad ti' is satakok eb.

³⁰Ta c'am chi toj eb yin owal e yetok, a tu' ok yi' eb is satak e yetok bay tx'otx' Canaán tu', ẍi cham Moisés.

³¹Max tak'wi pax eb yinatil Gad c'al Rubén axca ti': —Okc'al jun masanil tzet yetal chi chek Jehová chi junej.

³²Ay co mitx'k'ab yin owal cax ok on ec'tok satak Jehová bay Canaán tu', palta jet chi yuncan tx'otx' tx'otx' ti' bay yetc'ulal bay chi ajol c'u ti', ẍi eb.

³³Yuj tu xin, a bay eb yinatil Gad, yetok eb yet Rubén, c'al yetok nanxa eb yinatil Manasés c'ajol José, max yak' cham Moisés tx'otx' tx'otx' yet Sehón reyal eb amorreo, c'al yet Og reyal Basán, yetokc'al jantak conob makbil yuj, c'al jantak is makbej ayic' yinlak.

³⁴Axa eb yinatil Gad max ca watx'nen aj eb conob Dibón, Atarot, Aroer,

³⁵Atarot-sofán, Jazer, Jogbeha,

³⁶Bet-nimra c'al Bet-arán. Max yaon oc eb is murallail c'al watx'nen aj eb corral is calnel tu'.

³⁷Axa pax eb tribual Rubén xin, max ca watx'nen aj eb conob Hezbón, Eleale, Quiriataim,

³⁸Nebo, Baal-meón, c'al Sibma. Max q'uexon eb is bi juntzan conob max ca watx'nej eb tu'.

³⁹Axa pax eb yinatil Maquir is c'ajol Manasés, max ion c'apax can tx'otx' bay Galaad. Axa eb, yajaw max yuncan bay tu'. Max uktelay el eb amorreo yuj eb.

⁴⁰Caytu' max yun yak'on cham Moisés tx'otx' Galaad bay eb yinatil Maquir xan max cajay ec' eb bay tu'.

⁴¹Axa pax Jair is yinatil c'apax Manasés, max yak' ayc'ay junok campamento eb amorreo, cax max yak'on eb yik Habot-jair.

⁴²Axa jun winak chi yik Noba yetokc'al juntzanxa eb ajun yetok, max ak'on ayc'ay eb Kenat, yetokc'al juntzanxa conob tol ayoc yul is makbej. Max yak'on yik Noba.