Read Q'anjob'al Nm 5 Bible Online

Nm 5 - Q'anjob'al bible

Nm 5

¹Max k'anjab Jehová bay cham Moisés, max yalon axca ti':

²Al bay masanil eb et israelal tol chi yieltok eb eb anima ya'ay yuj lepra, eb chi el tzet yetal yin is mimanil yuj junok ilya' ayoc yin, ma eb max mitx'on junok camnak.

³Masanil juntzan tu', chi ilay eltok bay yinel campamento, eb winak ma eb ix ix, yet watx' c'am tzet yetal man watx'ok yul campamento bay ayin ec' e yetok, ẍi Jehová.

⁴Max yikej eb israel yion eltek juntzan anima tu', axca wal max yun yalon Jehová bay cham Moisés.

⁵Max k'anjab Jehová bay cham Moisés, max yalon axca ti':

⁶Al juntzan ti' bay eb et conob: Ta ay junok winak ma junok ix ix tol c'am chi yikej ayin, xan chi yetnej yet animail, lanan yoc is mul axca tu'.

⁷Yowalil chi yojtaknej el is paltail. Yetok c'apaxok, yowalil chi yak' is q'uexel tzet yetal max yetnejtok bay tu', cax chi yak'on junxa bijan yet is so' makan tz'akilok.

⁸Ta mayal cam jun mactxel max etnelaytok is tzet yetal tu', c'amxa pax junokxa ayto yuj ba moj chaon q'uexel junok tzet yetal tu', a jun tu' ok occan wetok, axa yul k'ab eb sacerdote chi cani. Ac'ala' chi yak'on c'apax junok no icham calnel yin xajanbalil yet chi ak'lay tanil is mul max oc tu'.

⁹Masanil ofrenda chi yak' eb et israelal ayin, tol chi ilaytok bay satak eb sacerdote, a juntzan tu', yet eb sacerdote tu' yayji ocok.

¹⁰Masanil tzet yetal chi yak' junok et israelal ayin, tatol chi ak'lay bay junok sacerdote, yet jun sacerdote tu' chi yuncanok, ẍi Jehová.

¹¹Max yalon Jehová bay cham Moisés,

¹²tol chi yal juntzan ti' bay eb yet israelal: Ta c'uxan ay junok winak chi naoc yin yetbi tol ay is mul chi yaoc yul is k'ab,

¹³ma mayal muljixac'al ix yetok junok winak, palta c'am chi je' nachajxac'al el yuj ta mayal yunxac'al ix mulej tu', yujtol c'am chi yalaj ix, c'am c'apax junok mactxel max ilon mulji ix tu'. Ma xin, ay c'apax junok winak toc'al chi naoc yin yetbi axca tu', caxc'al c'am is mul ix chi yaoc yul is k'ab,

¹⁵a yin ca makan k'anej axca tu', a nak winak tu' chi je' yiontok yistzil bay satak junok eb sacerdote, cax chi yak'on canebok libra ixim harina cebada yin ofrendail yuj ix, palta c'am chi seclay ay aceite yiban, tamwal chi ak'lay incienso yetok, yujtol a jun ofrenda tu', ofrenda yet banquinal, is yopiso yet chi txecloj aj mulej.

¹⁶Axa jun sacerdote tu' ok alonok tol chi jitztek ba ix, cax chi alay oc ix in satak.

¹⁷Ayman ok yitek jun sacerdote tu' jabok a' aej tol wet yayji ocok yul junok tx'otx' sec', cax ok yion c'apax aj jabok pokok ay bay in cajlobal, cax ok yaontok xol a' aej tu'.

¹⁸Ok oc waan ix ix tu' yuj jun sacerdote tu' in satak, ok yion el is k'oxil ix ix tu', ok alay c'apax oc jun ofrenda yuj banquinal tu' yul k'ab ix. Axa jun sacerdote tu', inej aj a' aej c'a' tol chi iontek yailal,

¹⁹ok chekon yak' ix ix tu' is ti'. Ok yalon axca ti': Ta yel c'am a mul yetok junokxa winak yul k'ab echamil ti', c'am tzet ok ach on yet ok oq'uen aytok jun a' c'a' aej ibil oc yailal yuj ti'.

²⁰Palta ta max ach mulji yetok junokxa winak, max aon oc a mul yul k'ab echamil,

²¹a Jehová ok ach aoncan oc yin tx'oxbanilejal satak eb et conob, ok ach yak' binaj eb yin yobtakil, tol ok malaj a c'ul, cax ok takaj yetbeyom a chibejal.

²²A ton wal jun yailal tu' ok jayoc eban yet ok oq'uen aytok jun aej ti', yujtol a a' inej oc yailal, ẍiokab jun sacerdote tu'. Ok tak'wok ix ix tu xin: Yunokab axca tu', ẍi ix.

²³A jun k'anej ti' ok tz'ibej ay jun sacerdote tu'. Lajwi tu' ok joon el yetok a' c'a' aej tu' cax ok aytok yul sec'.

²⁴Chi lajwi tu xin, ok yuq'uen aytok ix ix tu' a', yet chi c'abi el yul c'ul ix.

²⁵Cax ok chaon ec' jun sacerdote tu' ixim harina tol cebada yin ofrendail yuj banquinal tu' yul k'ab ix. A jun ofrenda tu' ok batxoc jun sacerdote tu' in satak.

²⁶Cax ok yion aj jun sacerdote tu' jun wokan jun ofrenda tu', ok yak'on tz'a bay yiban altar yuj tx'oxontek masanil jun ofrenda tu'. A yet mayal yuc' ix a' c'a' aej tu',

²⁷tatol a ix ix tu' ay wal mul ix max yaoc yul k'ab yichamil, a jun aej ok yuc'aytok ix tu' ok c'abok el yul c'ul ix yuj, cax ok malaj c'ul ix, axa takaj yetbeyom is chibejal ix tu', axa yoccan ix yin tx'oxbanilejal, c'al binaj yin yobtakilal xol conob tu'.

²⁸Palta ta a ix ix tu xin, yel wali caw wal c'am is mul, c'am jabok tzet ok on ix, cax ok je' jayc'al yune' ix.

²⁹A ton jun ley ti' chi oc yiban ix ix chi yaoc mul yul k'ab yichamil, xan max yaoc yichamil yin banquinal.

³⁰Ta ay junok winak xin, toc'al chi yut ba banquinal yin yetbi; ta axca tu', a nak ichamilej tu' yowalil chi yitek nak yistzil tu' in satak, cax chi yunen junok sacerdote tu' yin ix masanil tzet chi yal jun ley ti'.

³¹C'am tzet yetal ok lowcan yiban nak winak tu'. Ta yel a ix ix tu' ay is mul, a ix ok lowcan yiban, yuj is mul tu', ẍi Jehová.