Read Q'anjob'al Nm 6 Bible Online

Nm 6 - Q'anjob'al bible

Nm 6

¹Max k'anjab Jehová bay cham Moisés; max yalon axca ti':

²Al juntzan ti' bay eb et conob: Ta ay junok winak ma junok ix chi yak' is ti' yaon oc ba yul in k'ab yin nazareoal,

³c'amxa chi je' yuq'uen vino, tamwal yuq'uen junokxa tzet yetal tol pajbinak. C'amxa c'apax chi je' yuq'uen vinagre watx'nebil yin vinoal, tamwal vinagre tol pajbinak. C'am c'apax chi je' yuq'uen yal an uva, tamwal loon an, tamwal c'apax c'uxon an yin takinal.

⁴A yin jantak tiempo max yak' is ti' tu', c'am wal jabok chi je' yablen masanil tzet yetal tol chi el yin an uva caxc'al tzetbil yayji.

⁵C'am c'apax chi je' tzukon el xil is jolom, masantac'al chi lajwi jantak tiempoal max yak' is ti' tu', yujtol wet yayji ocok.

⁶A yin jun tiempoal tu', c'am c'apax chi je' yapni oc bay is c'atan junok camnak,

⁷caxc'al mi a is mam ma is txutx chi cami, ma junok yuẍtak ma junok yanab, tutun wal c'am chi je' yapni oc c'atan, yet watx' c'am chi can yin yobal, atac'ala' yalon ley. Yowalil tol watx'c'al yayji, yujtol wet yayji ocok.

⁸A yin masanil tiempo bay max yak' is ti' tu', junelnej tol wet yayji ocok.

⁹Ta c'uxan ay junok mactxel junej ayic' yetok chi cami, a xil is jolom tol wet yayji oc tu', manxa watx'ok chi yuncanok atac'ala' yalon ley, xan a yet chi lajwi yec'tok ukebok c'ual yet chi watx'jicanok atac'ala' yalon ley, cax chi tzuklay el xil is jolom.

¹⁰Axa yet is waxak c'ual xin, cax ok yiontok bay junok sacerdote cac'onok no jobbejal paloma tzanc'al tzet makanil, bay satak mantiado bay chin chalej in ba e yetok.

¹¹A jun sacerdote tu' ok ak'on junok no' tu' yin xajanbalil yuj mulej; axa junxa no' xin, ok ak'lay tz'a no' yin xajanbalil. Caytu' ok yun yak'lay tan is mul, yuj max ayji yetok jun camnak tu'. A yet jun c'ual tu' a xil is jolom ok ch'ib paxok. Wet ok yuncanok.

¹²Chi el pax yich jun tiempoal bay max yak' is ti' ayin junelxa. A jantak tiempoal max eq'uel yet yalantok tu', c'amxa chi oc is tz'akilok, yujtol a xil is jolom tol wet yayji, max etax elok. Yetok c'apaxok, yowalil chi yitok junok no calnel tol jun abil is k'inal yin xajanbalil yuj tojlanen tzet max on tu'.

¹³A yet chi lajwi jantak tiempoal max yak' jun anima tu' is ti' xin, yowalil chi toj bay puertail mantiado bay chin chalej in ba e yetok,

¹⁴cax chi ak'lay tz'a junok no ach'ej calnel yin xajanbalil, tol jun abil is k'inal, tol c'am jabok is tacnakil. Ac'ala' chi ak'lay c'apax junok no txutx calnel jun abil is k'inal, tol c'am wal jabok is tacnakil no'. A jun tu' xajanbal yuj yak'lay tan mulej. Cax chi ak'lay c'apax junok no icham calnel tol c'am wal jabok is tacnakil yin xajanbalil yuj junc'ulalil.

¹⁵Yetok c'apaxok, yowalil chi ak'lay junok yaliẍ motx ixim pan tol c'am yich, a wal harina caw wal watx' ayoc yin, sombil yetok aceite. Chi ak'lay c'apax ixim c'oxox pan tol c'am c'apax yich ayocok, ayoc aceite yin. Junej chi yun yak'on yetok is yofrenda yin ixim trigo, c'al vino tol t'inanc'alta' chi yak'a'.

¹⁶A junok sacerdote ok aon oc jun xajanbal yuj mulej tu' in satak, yetokc'al xajanbal tol chi ak'lay tz'a masanil,

¹⁷cax ok yak'on c'apax no calnel yin xajanbalil yet junc'ulalil. Junejc'al chi yun yak'on yetok ixim pan tol c'am yich tu'; cax chi yak'on c'apax ofrenda yin ixim trigo, c'al yetok vino.

¹⁸A jun max yak' is ti' yin nazareoal tu', a tu' ok tzuklay el xil is jolom bay satak mantiado. Ok wajaj xil is jolom ayoc tx'oxbanilok tol wet yayji, cax ok ak'lay tz'a bay xol k'ak' k'ak'ej ayoc yalan xajanbal yet junc'ulalil.

¹⁹A yet max lajwi tzuklay el xil is jolom tu', ok yion aj jun sacerdote tu' is jolom xic' no calnel tu' tol tajnakxa, yetok jun ixim pan tol c'am yich ayocok, ayaytok yul jun yaliẍ motx tu', c'al yetok c'apax jun ixim c'oxox pan tol c'am yich, cax ok yaon oc masanil yul is k'ab jun max yaoc ba yin nazareoal tu'.

²⁰Lajwi tu xin, ok batxon oc jun sacerdote tu' juntzan ti' in satak. A juntzan ti' satnebil tol yet jun sacerdote tu' yayji, yetok c'apax txamc'ul no' chi batxlay oc in satak, c'al is xub no' tol chi sic'laycan elok, yet jun sacerdote tu' yayji. A yet mayal lajwi masanil juntzan tu xin, a jun max yaoc ba yin nazareoal tu', chixa je' yuq'uen vino.

²¹A ton leyal yin eb nazareo ti'. Ta a jun nazareo tu' chi yak' is ti' yak'on junok ofrenda ec'ban yintak axcac'alta' leyalil, yowalil chi yikej yunen axca wal bay max yak' is ti', ẍi Jehová.

²²Max k'anjab Jehová bay cham Moisés, max yaloni:

²³Al bay Aarón yetokc'al bay eb is c'ajol, tol a yet ok yalon eb watx' k'anej yiban eb e yet israelal, caywal ti' ok yun yalon eb axca ti':

²⁴Yak'okab Jehová watx'c'ulal e yiban, c'al ex tayneni.

²⁵Yilokab ex oc Cham yin tzalojc'ulalil, c'al tx'oxokab watx'c'ulalil ayex.

²⁶Yinokab camc'ulalil chex yiloc Cham cax yak'okab junc'ulal ayex, ẍiokab eb.

²⁷Caytu' ok in yut yak'on binaj eb yiban eb et israelal. Ayinxa ok wak' in watx'c'ulalil yiban, ẍi Jehová.