Read Q'anjob'al Nm 8 Bible Online

Nm 8 - Q'anjob'al bible

Nm 8

¹Max k'anjab Jehová bay cham Moisés, max yalon axca ti':

²Al bay Aarón tol a yet ok yaon oc k'ak'al ukeb candil, a is luzal, a tu' chi toj bay yetc'ulal satak batxlub candil tu', ẍi Jehová.

³Max yikej cham Aarón watx'nen oc is luzal juntzan candil tu' yet chi tzektanej bay yetc'ulal satak, axca yalon Jehová bay Moisés.

⁴A jun batxlub candil tu' naba oro, chac'bil yuj martillo, chi tojtac'al bay yich masantac'al bay xumaquil ay bay chonlak. Max watx'ji jun batxlub candil tu' axca wal yayji yechel max tx'ox Jehová bay Moisés.

⁵Max yalon Jehová bay cham Moisés axca ti':

⁶Pojcan el masanil eb levita xol masanil eb e yet israelal ti', cax chaoncan oc eb yin watx'il atac'ala' yalon ley:

⁷tol cha txijoc aej yin eb yet chi watx'jican eb, cax chi tzuklay el xil masanil is mimanil eb. Chi lajwi tu', cax chi tx'ajon eb is pichil, caytu' chi yun watx'jican eb.

⁸Ayman chetek junok no ach'ej wacax yetok junok echbal harina caw wal watx', sombil yetok aceite, cax chi ak'lay yin ofrendail yin ixim trigo. Chi ak'lay c'apax junokxa no ach'ej wacax yin xajanbalil yuj mulej.

⁹Chalon bay eb levita tol chi jayoc eb masanil bay cawilal mantiado bay chin chalej in ba e yetok, cax cha wajban oc masanil eb e yet israelal.

¹⁰A eb levita tu' ok oc eb in satak; a yet tu' masanil et conob ok yaoc k'ab yiban is jolom eb.

¹¹A Aarón ok aon oc eb in satak yin yofrendaok eb e yet israelal; caywal tu' ok yun canxac'al can eb levita tu' yin quin yak'on serbil.

¹²Chi lajwi tu xin, cax ok yaon oc eb levita tu' k'ab yiban jolom no cac'on ach'ej wacax tu'. A junok no' ok ak'lay yin xajanbalil yuj yak'lay tan mulej, axa junxa no' xin, ok ak'lay tz'a no' yin xajanbalil ayin; caytu' chi yun tancan is mul eb levita tu'.

¹³Lajwi tu' chaon oc eb satak Aarón yetokc'al eb is c'ajol yin yalay oc eb ayin.

¹⁴Axca tu' ok ot a pojoncan el eb levita xol eb e yet israelal, yet chi occan eb wetok.

¹⁵A yet mayal lajwi watx'jican eb atac'ala' yalon ley, c'al yak'laycan eb ayin, chixa je' jay eb mulnaj bay mantiado bay chin chalej in ba e yetok.

¹⁶A ton eb ti', wet chi yuncan yin junelnej xol eb e yet israelal. A ton eb ti' chin cha' is q'uexelok eb babel unin.

¹⁷Yujtol wet yayji masanil is babel winak unin eb ix e yet conob; axca c'apax tu' yayji oc babel yune' is jobbejal no' eb. A wal yet max wak'on cam masanil eb babel unin bay Egipto, a yet tu' max in yanen can ec' masanil eb babel winak unin eb e yet conob Israel ti', yet chi occan eb wetok.

¹⁸Xan a eb levita ti' chin cha is q'uexelok eb tu' tinani'.

¹⁹Ayin max in sic'can el eb e yet conob levita ti' e xol ayex israel ex ti', max wak' eb bay Aarón c'al bay eb is c'ajol, yet watx' a eb chin ak'on serbil e q'uexelok bay mantiado bay chin chalej in ba e yetok, yuj wak'on tanil e mul e yiban, cax a eb chi jayoc in satak e q'uexelok yet watx' c'am chex cami yuj chex jayoc c'atan in cajlobal, ẍi Jehová.

²⁰Cay wal tu' max yun yiken cham Moisés, c'al cham Aarón, yetok conob Israel, masanil tzet max yal Jehová yin eb levita.

²¹Max achinwi eb levita c'al sakbanen eb is pichil, axa cham Aarón max aon oc eb satak Jehová yin ofrendail, max yak'on c'apax xajanbal yet chi tancan el mul eb.

²²A yet max lajwi masanil juntzan ti' xin, max oc eb levita tu' mulnaj bay mantiado bay chi co chalej co ba yetok Jehová. A cham Aarón yetok eb is c'ajol chi ikban eb. Axca wal max yun yalon Jehová bay cham Moisés, cay wal tu' max yun yiken eb yin eb levita.

²³Max k'anjab Jehová bay cham Moisés, max yalon axca ti':

²⁴Ok oc eb levita yin yopiso bay mantiado bay chin chalej in ba e yetok, yet 25 abilxa is k'inal eb.

²⁵Axa yet chi lajwi 50 abil is k'inal eb xin, cax chi el eb yin yopiso junelnej.

²⁶A yet chi ajapnok is k'inal eb axca tu', colwalxac'al chi yun eb yetok eb chi mulnaj bay mantiado tu', palta c'amxa chi mulnaj eb yin is mulnajil axcac'alta' max yunej. Caytu' chot aon oc eb levita yin is mulnajil, ẍi Jehová.