Read Q'anjob'al Miq 2 Bible Online

Miq 2 - Q'anjob'al bible

Miq 2

¹Ok'bal c'ul wal ok yun eb tol cal wayan chi naobtanen tzet yetal yobtakil ok yunej, axa yet chi k'inibi aj xin, cax chi yunenxac'al eb tzet chi na tu', yujtol ayic' yul k'ab eb yuneni.

²Ta chi yiloc c'ulok yin junok tx'otx', cax chi tok'onxac'al ec'ok, chi yiloc c'ulok yin junok na, cax chi yelk'aneni. Axca tu' chi yun yetnelay eb anima yetok yuninal yuj eb.

³Yuj wal tu' max yal Jehová axca ti': Ayin ti', ay wal tzet chin na' c'apax e yin ayex ti'. Ok watok junok miman yailal e xol, c'amxa tzet watx' ok yun e colchaji. Tok okto e maynej e ba e yec'jabi, yujtol is c'ualxa jun miman yailal.

⁴A yet jun c'ual tu' ok tz'ak bitnej eb ajc'ul bit, yuj ex buchon eb. Ok yal eb axca ti': A wal tinani', mayal wal on lajwi ay junelnej, c'al co conobal tol yet Jehová yayji, mayal q'uexchaj yajaw. C'amxa mactxel max je' tenchaneni. A eb max on ak'on ayc'ay tu', mayal pojic' eb co tx'otx' yin, ẍi jun bit tu', ẍi Cham.

⁵Yuj e yobtakil tu' xan c'amxa mactxel xol is conob Jehová ok je' yechen janic'ok e satak.

⁶Chi yalon eb anima ayin: ¡Manchak al ayon, yuj yailal ok jayok! Tokwal ok jay jun q'uixwilal tu' jiban.

⁷Tokwal catabnebil conobal Jacob, ¿tom mayal lajwi is mimanc'ulal Dios, xan caytu' ok yunej? ẍi eb. Xan chi tak'wi Jehová: ¿Tom man watx'ok chi yun in k'anej bay mactxel tol tojol chi yut ba?

⁸Ayex ti', chex oc ajc'ulal yin in conob. A eb chi meltzojtek yin owal chi na' eb tol c'amxa tzet ok on eb; axa ayex ti', che yiel is watx' pichil eb.

⁹Che yuktej eltok eb ix ix yulak is yatut tol ayoc yipok c'ul, cax che yion ec' yin junelnej is satak eb unin max wak'a'.

¹⁰Ajanek wan, cax chex tojc'al. C'amxa chi je' chex ayji ec' cayti', yujtol xiwilxa yobtakilal max e yun sat tx'otx' tx'otx' ti', xan mayal etax el yin junelnej.

¹¹A ayex ti', a wal junok lek'ti' chekbej che yochej, junok chi ec' yalilok tol xiwilxa e vino c'al e trago ok e yi', ẍi Cham.

¹²Chi yalon c'apax Dios axca ti': Ok ex in wajbaj oc masanil ex yinatil Jacob. A ton ayex aj Israel chexto cani. Ok ex in wajbaj, axca chi yun wajban junok ilom calnel no calnel bay is corral. Axca c'apax junok ac'al nojnak el yuj calnel, caywal tu' ok yun nojil e tx'otx' e yuj ayex ti'.

¹³Babel in toj in jakon be e satak, cax tzakan ex oc wintak. Axa e yeltok bay is puertail miman conob yin bekanilal tu'. Ayin caw Jehová in, e Reyal in, babel chin toj e satak, ẍi Cham.