Read Q'anjob'al Miq 3 Bible Online

Miq 3 - Q'anjob'al bible

Miq 3

¹Catatu' max waloni: Ex yajawil conob Israel, abek wal tinani'. ¿Tom man e mojok ayex ti' e yojtaknen el tzet yetal tol tojol?

²A ti' e yet, tol che yaj can el tojolal tu', axac'al yobtakil che camc'ulnej. Axca wal tol che tzilel is tz'umal eb jet conob, axac'al is bakil chi can jalan e yuj.

³Axca wal tol yin yiquisal in conob, cax che chion aytok, che nic'on el is tz'umal eb, cax che pak'on k'aj is bakil. Lajanxac'al che yut eb axca chibej chi toj taj yul xij.

⁴Ay wal jun c'ual ok e yawtej Jehová; palta manxa ok tak'wok Cham ayex. A yet jun c'ual tu', ok c'ubajxac'al el ba Cham ayex yuj wal e yobtakil max e yaocok, quin chi.

⁵Axca ti' yalon Jehová: A in conob ti' caw wal ayc'al oc yul beal man tojolalok, yujc'al eb lek'ti' chekbej, tol chi alon elok tol ayc'al junc'ulal ta chi tojlanelay yin watx' bay eb. Axa pax bay mactxel c'am chi ak'on noj c'ul eb, chi yak'on eb owal yin eb. Xan chi wal yin juntzan chekbej tu':

⁶Ok aycan aj c'u yiban eb, axa can eb xol k'ekk'inal tu'. C'amxa yechel ay tzet ok tx'oxlay yil eb junelokxa, tamwal okto yalil eb tzet yetal ok uj yet yajtok tu', quin chi, ẍi Jehová.

⁷A juntzan chekbej tu', c'al juntzan naom el k'anej tu' yaloni, toxac'al ok cancan eb yin c'am ujnakilal, toxac'al ok tz'injokcan el eb, yujtol c'am jabok is paktzebal eb ok cha bay Dios.

⁸Axa pax ayin ti', ayoc Yespíritu Jehová win, xan ay wipalil, cax chi nachaj el tojolal wuj, xan chin tec'baj in ba walon oc yin sat Israel jantak is mul.

⁹Abek juntzan ti' tinani' xin, ex yajawilal conob Israel, ayex ti' che yajil tojolal. A jun tu' che q'uextok yin man tojolalok.

¹⁰Che watx'nej aj Jerusalén a ton conob yet tzalan Sión yuj tzet che yi' yin e mak'on cam anima, c'al yin man tojolalok che yunej.

¹¹A eb juezal conob, chi watx'nej el eb k'anej eb yet animail yin man tojolalok, yuj chaon eb tumin. Ac'ala' eb sacerdote chi cuywaj eb, asan yuj chaon eb tumin, c'al eb lek'ti' chekbej Dios, asan yuj chaon tumin xan chi yal eb tzet max tx'oxlay yil eb yaloni, cax chi yalon eb tol ayoc Dios yetok eb, xan chi yal eb axca ti': A Jehová ayoc jetok, xan c'am tzet yetal ok ec'tok jiban, ẍi eb.

¹²Yuj wal tu xin, e yuj wal ayex ti', xan a Jerusalén, conob yet tzalan Sión, axcaxac'al tol t'ocbil yetok arado ok yuncanok, cax toxac'al ok aj can bulan is pojiltakilal, axa bay tzalan yet templo, eltzab ac'un ok ch'ibajok.