Read Q'anjob'al Miq 6 Bible Online

Miq 6 - Q'anjob'al bible

Miq 6

¹Ajan wan ach Jehová, cax chalon is mul conob Israel satak tx'otx' witzlak, cax yabokab tx'otx' tzalanlak yul a nuk'.

²Yabokab witzlak, c'al cimientoal yich tx'otx' tx'otx', tol ok al mul a conob, cax ok ak'on owal yetok eb israel.

³Ex Israel, chi cam wal e yaben tzet chi yal Jehová. Chi yal Cham axca ti': Tak'wanek ayin, ex in conob. ¿Tzet max ex yun wetneni, ma tzet max ex wutej?

⁴Ilab ayin max ex wieltek bay Egipto, max ex in colon eltek bay ayex oc mosejal. Ayin max in chektok Moisés, c'al Aarón yetok María, a ton eb max ex ikbani.

⁵Ex in conob, naektek tzet yetal nabil yuj Balac reyal Moab, axa is paktzebal max yak' Balaam is c'ajol Beor. Naek c'apaxtek tzet max uj bay nan xol Sitim yetok Gilgal, cax che naontek, tzet max ex wut in coloni, ẍi Jehová.

⁶Chi k'anlej eb israel axca ti': ¿Tzet ok jak' bay Jehová yet ok on oc yin ayilal bay, a ton Cham Dios Axac'al Ocok? ¿Ok mi on oc satak Cham yetok no calnel jun abil is k'inal, yet chi jak' tz'a no' yin xajanbalil?

⁷¿Ok mi wal tzalojbok aj Jehová, ta chi jak' junok mil no icham calnel yin xajanbalil, yetok junok lajoneb mil nuk' aceite tol chi bey yakan? ¿Ma xin, ta chi jak' co babel unin yin xajanbalil yuj co yobtakil? ẍi eb.

⁸Chi paktzej is chekbej Dios: Ex wet conob, mayal yal Jehová tzet yetal tol watx' yul is sat, c'al tzet yetal tol chi yochej Cham ayon, a ton juntzan ti': Tojol chi jut co ba, ayokab co camc'ulal yin eb jet animail. Yin yaynakilal yikem chi jut co ba bay Cham co Diosal, ẍi is chekbej Dios.

⁹Lanan yawji Jehová bay is conob; chi yalon Cham axca ti': Aj nabal mac chi cam yaben yin yaynakilal. Jayokab e nabal yuj yailal, ayokab welapnok yul e sat, ayin tol chi waoc yailal tu'.

¹⁰¿Tom ok tok c'ayc'ulal wuj tol a bay yatut eb yobtakwom, xiwilxa beyomal wajan ec'ok tol max yi' eb yin yobtakil, yetok c'apax juntzan echbal man tz'akanok, tol yajbil wuj?

¹¹¿Tzet ok yun wak'on mimanc'ulal yiban juntzan anima ti', tol a echbal man tz'akanok chi k'an eb?

¹²A juntzan beyom xol conob ti', elk'om eb, etnem anima eb. Jantak ex cajan ex bay jun e conob ti', lek'ti ex.

¹³Yuj wal tu' xan ok waoc e yailal. Ok ex wak' lajwok ay yuj e mul.

¹⁴Ok ex lowok, palta man ok noj e c'ul, ac'ala' tit e wajil. Ok e wajaj e tzetak yetal, palta man ok colwaj jabok e yetok. Ta c'uxan ayto wal tzet ok colchaj el e yuj xin, axa yin owal ok wak' lajwok ayok.

¹⁵Ok e yaw e yawoj, palta c'am jabok tzet ok e wajajok. Ok e tec' e yolivo, palta man ok e k'an jabok aceite. Ok e tec' e yuva, palta man ok e yuc' vino.

¹⁶Yujtol che yikej tzet yetal max yal Omri, c'al Acab is c'ajol, cax che beybalnenxac'al is beybal eb max beybalnej. Yuj tu' xan ok wak' jayoc yailal c'al buchwal k'anej e yiban. Caytu' ok yun e yaben yail q'uixwilal satak eb acaw in conob, ẍi Jehová.