Read Q'anjob'al Miq 7 Bible Online

Miq 7 - Q'anjob'al bible

Miq 7

¹Max yalon is chekbej Dios: ¡Ay… ok'bal in c'ul! Lajan inxac'al axca eb chi ec' sayoj uva, ma higo yet chi lo', yet mayal lajwi ec' sat awoj. Palta c'amxa an satej maxto cani, tamwal an babel satej caw ochebil.

²Axca tu' wayji, yujtol c'amxa chi ilchaj junok anima tol watx', ma tojolto is nabal satak Dios. Asanxanej mak'oj cam anima chi yochej eb chi yunej. Chi yalej ay eb yal is satak junjun.

³Meẍtol wal eb yin yunen yobtakil. A eb ay yikbej, toxc'a chi yi wal ec' eb pak bay yet conob; axa eb juez chi cha eb montebal tumin chi ak'layi. A eb tol mimek yelapnok, chi yun eb tzet yetal chi tit yin c'ul. Chi junanen ba eb tu' yin yetnen eb yet animail.

⁴A mac watx'to wal xol eb, lajan wal yetok te q'uix. A mac tojolto wal chi yunej, lajan wal yetok te cak q'uix. Palta xin, cawilxa chi jayoc c'ual yet ok ak'lay yailal e yiban yuj Dios, axca max yun yalon el eb chekbej yuj Cham. Axac'al somc'ulal ok aj can e xol.

⁵C'amokab wal che yaoc yin e c'ul tzet chi yal e vecino, tamwal che yaoc junok e yamigo yipok e c'ul. Chi camc'al e naon tzet che yal yetok e yetbi.

⁶Yujtol a eb c'ajolej, ok buchcan el eb is mam, c'al eb ix une'ej ok pitnej ba eb bay is txutx, c'al eb ix alibej ok oc eb ix ajc'ulal yin yalib. Acaw eb ayic' yul yatut ok yajc'ulnej ba.

⁷A pax ayin ti xin, a Jehová ayoc yipok in c'ul. Asan Dios in Colomal chin yipc'ulnej, yujtol ok yab Cham tzet ok wala'.

⁸Ex tol ajc'ul ex oc jin, manchak ex tzaloj yuj tzet chon oni. Caxc'al chon ayc'ayi, palta ok on aj pax wan junelxa. Caxc'al chi oymoj oc k'ekk'inal jin, palta a Jehová ayoc co sakk'inalok.

⁹Max oc co mul bay Jehová, yuj tu' xan ok jak' techaj is yowal c'ul, masantac'al yet ok on beyc'ulnen Cham, ok watx'nej el co k'anej. A Jehová ok yak' jil sakk'inal, ok jil tzet ok on yut colon el Cham.

¹⁰Ok yak' Cham yil eb jajc'ul jun ti', toxac'al ok q'uixwokcan aj eb yuj. Max yalon eb ayon axca ti': ¿Baytal ay Jehová e Diosal tu'? ẍi eb. Palta a tinani' ok jil wal yayc'ay eb, cax ok tec'lay ay eb, axca wal tec'lay ay tx'otx' tz'otz'ew bay yulak calle.

¹¹Ex aj Jerusalén, ok ajapnok c'ual yet ok ca watx'nelay aj murallail e conob, c'al bic'oj e makbej.

¹²Toxa chi jay is c'ual yet ok jayoc juntzan anima ayex, petoj eb bay masanil nación. Ok tittac'al bay Asiria, c'al bay Egipto, cax ok tittac'al bay a' Nilo c'al bay a' Éufrates. Ok tit eb tac'al bay a' marlak, c'al bay siquilal tx'otx' bay najat.

¹³Tz'inan tx'otx'xac'al ok yuncan yulyibank'inal, yujc'al is mul eb cajyom.

¹⁴Taynej a conob Mamin, axca no' a calnel tol et yayji. Aycan bay xolak k'akte' tx'oklil, axa bay yinlak xin, ay wal yax ac'unlak. Itok axcac'alta' max on yet payxa, bay lobal calnel bay yet Basán, c'al yet Galaad.

¹⁵Chi tak'wi Jehová, chi yalon axca ti': Ok wak' e yil tzet yetal tol c'ayubtakxac'al, axca max wun yet max ex eltek bay Egipto, ẍi Cham.

¹⁶Yuj tu' xan ok yil juntzan nacionlak, cax ok q'uixwokcan aj eb e yuj, caxc'al miman yipalil eb; axa ok yuncan aj eb, axcaxac'al tol c'am chi je' k'anjab eb, cax c'am chi je' yaben eb.

¹⁷Yinxac'al xiwc'ulal ok jutxic' ba eb xol pokok axca labaj. Ok eltek eb bay is cuartel yuj wal xiwc'ulal eb tu'. Ok xiw eb ayach, ach Jehová co Diosal.

¹⁸C'am junokxa Dios lajan etok, yujtol ach ti', ach chak' tancan is mul jantakto eb a conob chito cani; chi tojcan c'ayc'ulal is yec'nakilal eb oj. C'am chi ayji ec' yowal a c'ul yin tojbalk'inal, yujtol chi el wal yin a c'ul a tx'oxon a camc'ulal.

¹⁹Cusokab a c'ul jin on junelxa. Axca tol cha mukcan aytok co mul on. K'okcantok co yobtakil on bay najatil yich a' mar.

²⁰Ayokabc'al a watx'c'ulal c'al a camc'ulal jin on Mamin, axca max yun ak'on a ti' yettaxc'al payxa bay eb jichmam on, a ton Abraham c'al Jacob.