Read Q'anjob'al Nah 1 Bible Online

Nah 1 - Q'anjob'al bible

Nah 1

¹A jun k'anej ti' max yal Jehová bay Nahum aj Elcos, yuj yalon el yin conob Nínive.

²A Jehová Dios toni, tol chi paktzej yetok yowal c'ul bay eb chi ion ec' satak. Chi paktzej bay eb yob chi yut ba bay, caw wal chi tit yowal yin eb ajc'ul.

³A Jehová man c'unok tit yowal; palta ay yipalil, yowalil chi yaoc yailal yiban eb ay is mul. A yiban cakxuchum cak'ek', a tu' chi ec'jab Cham; axa asun, pokokal yakan yayji ocok.

⁴A Cham chi aloni, cax chi tanaj a' mar. Ac'ala' Cham chi ak'on tan c'apax aj masanil a' aej. Chi etaxcantok yili masanil tx'otx' tx'otx' bay Basán, yetokc'al bay witzal Carmelo. Cax chi etax c'apaxtok yili an xumac bay Líbano.

⁵Caw wal chi bilaj juntzan witz satak Cham, cax chi uljitok tzalanlak. A masanil tx'otx' tx'otx' ti', chi bilajok yet chi tx'oxon ba Cham; chi luklon aj yulyibank'inal yetok masanil anima

⁶¿Mactxel chi je' tec'ban ba satak yowal c'ul Cham? ¿Mactxel chi je' tenon oc wanaj yowal c'ul? A yowal c'ul tu', chi ay jopnaj axca k'ak'ej; satak wal Cham chi pojtok ch'en ch'en.

⁷Caw wal watx' c'ul Jehová; colbalba yayji Cham yet ay yailal. A eb chi yaoc c'ul yin, chi col-lay eb yuj.

⁸A pax eb yob chi yut ba bay Cham xin, chi lajwi eb, axca chi yun yiklaytok masanil tzet yetal yuj elom aej; a k'ekk'inal ok tokcan yiban eb ajc'ul yuj.

⁹¿Tzet yetal che na' yin Jehová? A wal Cham ok ak'on c'ayil eb ajc'ul yin junelnej. C'am mac ok je' tec'ban ba cayelok satak Cham.

¹⁰Caxc'al tol lajan eb axca te q'uix jelquiẍtakxac'al, cax tol uq'uem an eb yuj is vino, palta ok lajwok ay eb axca chi yun tz'a ay takin ch'im.

¹¹A bay Nínive, a tu' ay mac chi naon yobc'ulalil yin Jehová, a ton jun ak'om c'ulej yin yobal.

¹²Yuj tu' xan chi yal Jehová bay is conob axca ti': Caxc'al mi xiwil bey eb aj Asiria, tol tec'an eb, palta ok c'aylay el eb. Ayin max waoc yailal e yiban, palta manxa ok wutc'al axca tu'.

¹³Ok wak' c'ayil yikbej eb asirio ayoc e yiban, cax ok in nic'on coj cadena ayoc e yin, ẍi Cham.

¹⁴A wal caw Jehová chi alon bay reyal Asiria: C'am enatil ok ach ak'oncan binajok. Ok wak' lajwok ay juntzan a diosal ayic' yul is templo. Txequelxa yayji a mukbanil, yujtol c'am elapnok, ẍi Jehová.

¹⁵Ilek wali, lanan jayoc bay jolomlak witz jun mac chi alon el yabixal junc'ulal. Ex aj Judá chaek e k'in, ikejek bay max e yak' e ti'. C'amxa bak'in ok ex etax yuj eb yobtakwom tu'; mayal lajwi ay eb yin junelnej.