Read Q'anjob'al Nah 3 Bible Online

Nah 3 - Q'anjob'al bible

Nah 3

¹Ok'bal c'ul is conobal eb etnewom c'al eb mak'om cam anima. C'am lajubal tzet elk'anebil yuj eb.

²Axa tinani', a bay yul is conobal eb chi awji bil garrote. Nilili bil carruaje, tx'okxa bil yay yakan chej. Toxac'al chi aj jirlabok carruaje.

³Chi il-lay yec' no chej. Toxac'al chi joplabi yec' espada. Chi jopopi yili txam lanza. Yinxa milal bisil eb chi yasji; yinxa bulanil yayji eb camnak. C'amxa yalbanil mimanilej, toxac'al chi telc'ojtok anima yin.

⁴Caytu' max yun jayoc yiban conob Nínive yujtol caw wal max etnelay juntzanxa conoblak yuj, axca junok ajmul ix chi montej oc eb winak yin, axca junok ix caw wal watx' yili, ochbejtakxac'al. A wal eb yajaw bay Nínive, caw wal jelan eb yin ajbalil, c'al yin monten juntzanxa conoblak, yet chi can eb yalan yikbej.

⁵A Jehová Yajaw yin Masanil chi aloni: Ayin wal oc ajc'ulal yin conob Nínive. Ok in tx'ox wal el is q'uixwiltakil bay xol masanil conob, axca chi yun yilay el pichil junok ix ajmul ix satak conob, yuj tx'oxlay el is q'uixwilal,

⁶cax chi k'oklay oc masanil tzet yetal tz'iltak yin, yin tx'oxlayi tol yajbil elok. Caywal tu' ok yun in tx'oxon el q'uixwiltakil conob Nínive.

⁷A masanil mactxel ok ilon ocok, toxac'al ok el eb bay. Ok yalon eb axca ti': A wal Nínive, mayal lajwi ayok. ¿Macto wal ok ok' c'ul yin? ¿Bayto wal ok yi' mac ok mimanc'ulnenok? ẍi mi eb.

⁸Tokwal yelxac'al watx' Nínive yintak Tebas, a ton jun conob ay bay ti a' Nilo, tol oybil c'apax aj yuj xiwil aej. A a' ayoc axca is murallailok, ayoc a' yuj colbalbaok.

⁹C'amxa chi bischaj eb soldado yet Etiopía c'al yet Egipto max colwaj yetok; eb aj Fut c'al eb aj Libia ayoc eb yetok.

¹⁰Palta xin, a eb aj Tebas max ilay c'apaxtok yin presoal. Axa yuninal eb, max mak'lay poj eb bay txiquinlak calle. Max alay oc suerte yin eb mimek winak yayji, yuj yil-lay mac ok ionok, max oc c'apax cadena yin eb ikbajwom yayji xol eb.

¹¹Ac'ala' c'apax ex aj Nínive, axcaxac'al uq'uem an ok e yuncanok. Ok e yak'lej e c'uban el e ba bay eb ajc'ul, palta nabaxac'al; yowalil ok ex c'ayc'alta' elok.

¹²A masanil e cuartel, lajanxac'al ok yun axca sat te higo k'inxa, chi titc'ay c'otlabok; ta ay mactxel chi tzicon te', palanxac'al loon sat te' tu'.

¹³A eb e soldado lajanxac'al eb axca eb ix ix; a puertail-lak e conob jakanxac'al bay eb ajc'ul, mayal tz'atok masanil is makil yuj k'ak'ej.

¹⁴Ex aj Nínive, ayokab e ya', yet watx' ok techaj e yuj, yet oyan oc eb ajc'ul e yin; aek oc yipomal e muralla, ocanek yin tec'oj tz'otz'ew, cax che yiontek moldeal yet ladrillo.

¹⁵Caxc'al che yun masanil juntzan ti', palta ok ex camc'alta'a. Ok ex ak'lay tz'aok, ma ok ex tzoc'lay camok. Ok ex c'ayc'alta' elok, axca awoj chi lajwi el yuj no chapulín. Max aj can e bisil axca no chapulín, ma axca no tzac'.

¹⁶A wal eb e txonjom, max ajxac'al can bisil eb, yelxac'al ec'ban max yun eb yintak waycan. Axca no chapulín chi yak' lajwok masanil tzet yetal, cax chi toji, axca tu' eb.

¹⁷A eb e soldado sic'bil elok, lajan wal eb axca junok miman bulan no chapulín tol chi occan bulan bay satlak pared yet ay sicnab, axa yet chi el yakan c'u xin, chi toj jenenok. Tok ayto mac yojtak bay chi ca toji.

¹⁸Ach reyal Asiria, a eb taynemal a conob, waynakxa aj eb. A eb ayoc yin yopiso etok chi xew eb, a eb a soldado sakleminaktok eb bay jolomlak witz, tok ayto mactxel chi je' wajban oc eb.

¹⁹A jantak max yun lajwi ay a conobal ti', c'amxa watx'jubal. A yuj yas tu', ok lajwokxac'al ayok. A masanil mactxel ok aben yabixal tzet chach oni, toxac'al ok tzak' eb k'ab yuj tzalojc'ulal. ¿Mac wal txel tol maj yab yail yuj a yobc'ulalil tol c'amxa yalbanil? ẍi Jehová.