Read Q'anjob'al Sof 1 Bible Online

Sof 1 - Q'anjob'al bible

Sof 1

¹A ton wal jun k'anej ti' max yal Jehová bay Sofonías yet ayoc Josías, c'ajol Amón, yin reyal bay Judá. A Sofonías tu', c'ajol Cusi, cax is yitxiquin Gedalías, yichmam c'apax yayji Amarías c'al Ezequías.

²A wal caw Jehová chi alon axca ti': Ok wak' lajwok masanil tzet yetal ay bay sat tx'otx' ti'.

³Ok wak' lajwok eb anima yetok no no', no tz'iquin, c'al yetok no txay. Ok wak' lajwok yobtakil yetok eb yobtakwom, cax ok wion el eb anima sat tx'otx' ti'.

⁴Ok waoc yailal yin conob Judá, yetokc'al yin masanil eb cajan bay Jerusalén. Cax ok wak'on lajwok ay ayilal chi oc bay dios Baal bay conob ti'. C'amxa bay ok txeclojcanok; toltax c'apax bi eb sacerdote ok in jo c'ayok.

⁵Cax ok wak'on lajwok eb chi ajtok bay yibanlak na txajlok bay waycan, yetok eb chi ay jajan yin quin yak'on binajok; palta chi yak' binaj c'apax is diosal chi yik Milcom.

⁶Ok wak'on c'apax lajwok eb chi pojil ba win, a ton eb c'am chi jayoc ayin Jehová in, yin ul k'anlen is nabal.

⁷Numayanek in satak ayin Jehová Yajaw in ti', yujtol a c'ual yowal in c'ul cawilxa ay. Mayal in watx'nej el no xajanbal yet junc'ulalil. Mayal c'apax in sic'can el mac awtebil low wuj.

⁸A yet jun c'ual tu', ok wawal oc yailal yiban eb yajaw yayji, yetokc'al yiban eb c'ajol rey, yetokc'al yiban juntzanxa eb chi yaoc pichil eb tx'ok conobal.

⁹Ok wa c'apax oc yailal yiban eb comonc'al chi oc yulak na, a ton eb chi yak' noj yatut is patrón yuj beyomal chi yi eb yuj mak'wajwomal, c'al yuj etnewomal.

¹⁰A yet jun c'ual tu', ok ablay yoc aw bay puertail yet no txay, bay yet is cab makan conob. Cax miman ok yun bil pojtok bay tzalanlak.

¹¹Awjanek, mac ex cajan ex bay jun makan bay ay txonbal, yujtol masanil eb txonjom ok cam eb, masanil eb chi ak'on tumin majanil, ok lajwok el eb.

¹²A yet jun c'ual tu', ok in saywal wil Jerusalén axca chi yun saylay yetok tzektebalej junok tzet yetal chi c'aytok. Ok waoc yailal yiban eb anima c'am tzet chi na' tinani', cax chi yalon eb yul yet axca ti': A Jehová, tok ay tzet yetal chi paktzej ayon yin watx'il, tamwal yin yatakilal, ẍi eb.

¹³Yuj tu' xan a jantak is beyomal masanil, ok ilay ec'ok, c'al yatut eb ok uchlay ayok. Ok watx'nej aj eb yatut, palta manxanak eb ok cajay yul. Ok yaw eb is yuva, palta manxanak eb ok uq'uen vinoal an, ẍi Jehová.

¹⁴Cawilxa ay jun c'ual yet yowal c'ul Jehová, caw wal miman yayji ocok. Cawilxa ay, yelc'ulalxac'al jayocok. Abek, a wal yet jun c'ual tu', toltax a eb soldado caw wal tec'an waayi, ok ok' eb yuj xiwc'ulal.

¹⁵A wal yet jun c'ual tu', c'ual wal yowal c'ul Cham, yailal, c'al cusc'ulal. A yet tu', ok uchchajtok conob, tz'ininixac'al ok yuncanok. A yet tu' ok k'ekbok, k'ekk'olinakxac'al ok yunej. Moyanxac'al ok yunej. Caw wal pim ok yun yoc ewan.

¹⁶A yet jun c'ual tu', c'ual xulay trompeta yuj owal c'al yel yaw eb soldado yak'on owal yin conob tol ayoc is murallail, c'al can ay aj is torreal.

¹⁷Chi yalon Jehová axca ti': Ok wawal oc eb anima yin bilc'ulal, xan lajanxac'al ok yun yec'jab eb axca yec'jab eb c'amc'alta' chi ilwi, yujtol max oc wal yobtakilal eb in satak. A is chiq'uil eb, toxac'al ok pulcan ay axca aej; axa is mimanil eb, toxac'al ok aj can bulan axca tza' no no', ẍi Cham.

¹⁸Tamwal yuj is plata eb anima, tamwal yuj ch'en yoro eb, ok colchaj eb yet jun c'ual yowal c'ul Jehová tu'. Yujtol a yowal c'ul Cham ok ak'on lajwok masanil nacionlak. Yin wal jun bekal ok lajwok ay masanil eb cajan bay yulyibank'inal ti', axca chi yun junok tzet yetal yuj k'ak'ej.