Read Q'anjob'al Zac 12 Bible Online

Zac 12 - Q'anjob'al bible

Zac 12

¹A Jehová, Cham max watx'nen satcan, max watx'nen c'apax ay yich tx'otx' tx'otx' ti', Cham chi ak'on c'apax is yiquisal eb anima, caytu' chi yun yalon yin Israel axca ti':

²Ayin Jehová in ti', ok wut tol yuj Jerusalén ok ec' k'ek'on juntzan nacionlak ay is cawilal tu', axca uq'uem an, a yet ok yak'on eb owal yin Jerusalén tu', c'al yin juntzanxa conoblak ay yul yet Judá.

³A yet tu', ok wutcantok Jerusalén axca junok ch'en tol manxa yalilok bay juntzanxa nación. A mactxel ok yochej ok yak'lej yion ajok, ok yasjoktok yuj. Masanilxac'al nacionlak ok waj ba yak'on owal yin Jerusalén.

⁴Yuj tu xin, ayinxa ok in xibtej masanil no chej wajan ec' bay tu'; axa eb ayoc yiban no', ok occan eb yin yaxc'ayinakilal. Ok in taynej eb yinatil Judá, cax ok wuteni tol manxa ok je' yilwan is chej juntzan nación tu'.

⁵A wal yet ok yilon eb yajawilal Judá juntzan ti', cax ok yalon eb axca ti': A wal Jehová, Cham Yajaw yin Masanil, is Diosal eb aj Jerusalén jetok, a wal chi ak'on is yipalil eb, ẍi eb.

⁶A yet tu', ok wut eb yajawilal Judá axca junok tzak'ak' toxac'al cakxayinak chi oc xol te si', axca wal xak k'ak'al junok yuchan taj chi oc xol ixim trigo yinxa topanil yayji; ok yak'on lajwok el eb masanil juntzan nación ay is cawilal bay yetc'ulal is watx', c'al bay is q'uexan. A yet tu', a eb cajyom bay Jerusalén, watx'c'al ok yun yayji ec' eb junelxa bay is conobal.

⁷Palta ayin Jehová in ti', yin babelal ok in colcan el eb yinatil Judá, yet watx' man ok maynej ba eb yinatil David, c'al yetok masanil eb cajan bay Jerusalén yintak eb aj Judá.

⁸Ayin Jehová in ti', ok in taynej c'apax eb cajan bay Jerusalén tu'. A eb c'am wal yip xol eb tu', caw wal tec'an ok yun eb axca rey David. Axa pax eb yinatil David, lajan is tec'anil eb axca wet, ma axca wángel babel toj satak eb.

⁹A wal yet tu', ayin ok wak' lajwok tzanc'al tzet nacional ok yak' owal yetok Jerusalén tu'.

¹⁰Ok wak' nabalej chabejtak wuj, c'al nabalej yoc yin tewilal ayin, bay eb yinatil David, yetokc'al bay masanil juntzanxa eb cajyom bay Jerusalén. Axa yet ok in il-lay yuj eb max in tekoni, ok ok'aj eb axca yok' junok yuj camichal jun c'otan is c'ajol, ma yuj is babel c'ajol.

¹¹Ok oc wal jun miman cusc'ulal bay Jerusalén, axca wal cusc'ulal chi uj yuj jun dios chi yik Hadad-rimón bay ac'al yet Meguido.*fn*

¹²Junjunc'al makan inatilej bay nación tu', tx'ok tx'okc'al bay ay eb yet chi ok' eb, axca yinatil David, c'al yinatil Natán, c'al yinatil Leví, c'al yinatil Semei, c'al yetok juntzanxa makan inatilej, tx'ok tx'ok chi ok' eb; c'al yistzil eb, tx'ok bay chi ok' c'apaxok.