Read Q'anjob'al Zac 3 Bible Online

Zac 3 - Q'anjob'al bible

Zac 3

¹Axa max tx'oxlay wila', tol a cham sat sacerdote Josué lecan oc satak Cham yángel Jehová; axa bay yetc'ulal is watx' k'ab Josué tu', a tu' lecan oc Satanás, yet chi yaloctok is mul Josué tu' yuj.

²Axa yalon Cham yángel Jehová tu' bay Satanás axca ti': A Jehová, Cham max sic'on el conob Jerusalén, a' ok ach tzuonok; yujtol a jun winak ti', lajan wal axca junok cux chi ilay eltek bay xol k'ak'ej, ẍi.

³A pax Josué xin, caw wal tz'iltak is pichil ayocok, lecanc'al oc satak Cham yángel Jehová.

⁴Axa cham ángel tu' max alon bay juntzan is chekbej lecan oc satak, tol chi ilay el is tz'iltak pichil Josué ayoc yuj tu'. Ayman max yal bay Josué axca ti': Chi cam eloni, a chi yal elapnok jun ti', tol ayin chi wican el a mul. A tinani' ok wak' an pichilej yet k'in aocok, ẍi.

⁵Lajwi tu', max waloni: Matawal chi alay aj junok is k'oxil jolom Josué tu' caw wal sak, quin chi. Max yaon aj eb yin is jolom xin, axa yaon oc eb is pichil yet k'in tu'. Yak'ban tu', waanc'al ec' Cham yángel Jehová bay tu'.

⁶Lajwi tu', max yalon Cham yángel Jehová bay Josué axca ti':

⁷A ton wal juntzan ti' chi yal Jehová Cham Yajaw yin Masanil: Beybalnejc'al in beybal, cax chekenc'al masanil tzet max wak' onej. Tatol ok on masanil juntzan tu', ok ach occan yilomalok in templo, c'al a taynen yetok yamak'il. Ayin ok wak' ekbej yin oc in satak axca eb in chekbej ayoc in satak ti'.

⁸Chi cam aben xin Josué, ach ti', tol sat sacerdote ayji ocok. Cax chi cam yaben c'apax eb ayoc yin opiso etok, yujtol ayex ti', tx'oxbanil e yayji yuj junok tzet lanan jayocok. Ok witek in chekbej, a ton jun mac chi yik Wolej.

⁹Ayin chi waoc satak Josué jun ch'en ch'en tol ay ukeb is paq'uil. Ayin wal caw ok in tz'ibej oc juntzan k'anej yin. Axca tu xin, yin wal junnej c'ual ok wiel is mul eb cajyom bay jun nación ti'.

¹⁰A wal yet ok apnok jun c'ual tu', a ayex ti', ok e yawtelej e ba. Yinxac'al tzalojc'ulal ok yun e xew yalan yenel xak e yuva, c'al e yigo. Ayin Jehová in Yajaw in yin Masanil chi walon jun ti', ẍi Jehová, ẍi cham ángel.