Read Q'anjob'al Zac 7 Bible Online

Zac 7 - Q'anjob'al bible

Zac 7

¹A yet is can c'ual waay yet is baloneb xajaw, (a ton xajaw chi yik Quisleu), yet is can abilxa yoc Darío yin reyal, a yet tu' max k'anjab Jehová ayin Zacarías in ti'.

²A yet tu', a eb aj Betel max chekontek Zarezer, c'al Regem-melec, yetok eb winak ajun yetok eb bay templo Jehová, Cham Yajaw yin Masanil, yet chi k'anlay colwal Cham,

³c'al k'anlen bay eb chekbej Cham, c'al bay eb sacerdote axca ti': ¿Ok mi co pichc'al co ba yetok pichilej yet cusc'ulal, c'al joc yin c'ajbanc'ulal yet is so' xajaw yet junjun abil, yuj max uchchaj ay templo, axcac'alta' chi junej masantac'al tinani'? ẍi eb.

⁴Axa Jehová max alon ayin axca ti':

⁵Al bay masanil eb anima bay yul nación ti', c'al bay eb sacerdote: Ayex ti', ayxa 70 abilxac'al e beybalnentek, tol che yaoc el pichilej e yin, c'al e yoc yin c'ajbanc'ulal yin yet is so' xajaw c'al yet is suk xajaw. Palta man yujok tol ay welapnok yul e sat, xan che yun jun tu'.

⁶Ac'ala' a yet chex lowi, c'al e yuq'uena', asan yuj e yak'on tzalojbok e c'ul yul e yet che yunej, ẍi Jehová, cachi, ẍi Cham.

⁷A yuchbanil ay templo chi nalaytek tu', a ton yuj yunencan el tzet max wak' yalil eb in chekbej yet payxa, yet ayic' Jerusalén yin junc'ulalil, c'al yet xiwil anima ayic' bay, cax xiwil c'apax conoblak oyan oc yinlak, c'al bay makbej Néguev, yetokc'al bay ac'al, ayc'al anima cajan bay tu'.

⁸Max k'anjab Jehová ayin, max yalon axca ti':

⁹A ton wal juntzan ti' walnak yet payxa bay in conob: Tojolokab ex yin e beyc'ulal, watx' che yut e c'ul, c'al cusoc e c'ul e yin junjun ex.

¹⁰Manchak e yetnej eb ix ix camnakxa yichamil, tamwal eb unin c'amxa mam c'amxa txutx, tamwal eb tx'ok conobal, c'al eb meba', tamwal e naon yin e yak'on yobc'ulalil e yin junjun ex, quin chi, ẍi Cham.

¹¹Palta eb conob, maj yikej eb; tx'ok bay t'anantok eb masanil, cax chacanxac'al max yut ba eb.

¹²Max yak'on cawbok el eb is nabal, axca ch'en sak ch'en, yet watx' c'am chi cha yab eb cuybanilej, c'al chekbanilej max yal Jehová Cham Yajaw yin Masanil yuj Yespíritu yin eb is chekbej yet payxa. Yuj wal tu' xan yelxac'al miman max yun tit yowal c'ul Jehová.

¹³Max yalon axca ti': Axca wal max yut ba eb tol maj yal c'ul max cha yab ayin, yet max in k'anjab bay eb; cayin c'apax tu' ayin ti', tamwal max in tak'wi bay eb yet max tewi eb ayin.

¹⁴Yuj wal tu' xan max wuch saklem eb, axca chi yut cakxuchum junok tzet yetal. Max tojcan eb bay juntzan nacionlak tol man yojtakok eb. Axa is nación eb, tz'inan tx'otx'xa max yuncan aj yintak eb. C'amxa junokxa mac max cajaycan ec'ok. A is nación eb, caw wal watx'; palta a wal eb max utencantok yin tz'inanil, ẍi Cham.