Read Q'anjob'al Zac 9 Bible Online

Zac 9 - Q'anjob'al bible

Zac 9

¹A ton wal jun k'anej ti' max yal Jehová, tol ok yak' yailal yul yet Hadrac, c'al miman conob Damasco, yujtol ayoc sat Jehová yin masanil nacionlak, axca yayji oc sat yin masanil is tribual Israel.*fn*

²Ay c'apax oc sat Cham yin Hamat, a tu' ay tilak makbej Hadrac. Ay c'apax oc sat Cham yin Tiro, c'al yin Sidón tol aj nabal eb.

³A conob Tiro tu' max watx'nej aj muralla, cax max wajban oro c'al plata yinxa bulanil, axcaxa chi yun wajlay oc bulan tx'otx'.

⁴Axa Jehová ok ion ec' masanil bay, ok k'oklaytok is beyomal tu' bay yul a' mar, cax ok tz'acantok jun conob tu' masanil.

⁵A yet ok yilon conob Ascalón jun ti', ok xiwcan ajok. Yelxac'al miman ok yun yaben c'apax ya'il conob Gaza. Axa Ecrón, caw miman yailal ok yab c'apaxok, yujtol ok aycan c'ay is yipc'ulal sat tx'otx'. A Gaza tu', ok cancan yin c'amxa reyal; axa Ascalón, c'amxa junok anima ok cajaycan bay.

⁶Axa bay Asdod, somanxac'al yayji anima ok cajay ec' bay tu'. Chi yalon Jehová axca ti': Axca wal tu' ok yun wion ay is maynejbail eb filisteo.

⁷Manxa ok wak' chi eb no chibej tol aytoc'al oc is chiq'uil, tamwal okto octok yul is ti' eb juntzan loj tol ay yowalil, atac'ala' yalon ley, palta a xol juntzan anima tu', ayto eb ok canok, ok occan eb wetok. Lajanxa ok yuncan eb axca eb aj Judá. Axa eb aj Ecrón tu', lajanxa ok yuncan eb axca eb jebuseo.

⁸Cax ok in ayjokc'al ec' yetok in conob, yuj in taynen eb bay tzanc'al mac ejércitoal chi ec'tok cayti' yaloni. A eb etnewom, majxac'al etnelay in conob yuj eb, ayin wal caw ok wil in conob tu', ẍi Cham.

⁹Axca ti' yalon Jehová: Tzalojanek ex aj conob Sión. Bitnanek yin tzalojc'ulal ex aj Jerusalén. Ilab wal jay e reyal e xol, tojol Cham. A' ok ak'on colbanilej. Yaynakil ok yut ba, ayaj Cham yiban jun no burrito, is yune' jun no txutx burro.

¹⁰Ok wak' lajwok el is carruaje Efraín, c'al is chej eb bay Jerusalén c'al is julbal eb yet owal. A e rey ok alon el junc'ulal bay masanil nacionlak, cax ok yajawbok bay is ti a' mar, masantac'al bay junxa ti a', chi tojtac'al bay a' Éufrates, masantac'al bay lajubal tx'otx' tx'otx'.

¹¹A wal ayex aj Jerusalén ex ti', yuj wal in trato e yetok, tol watx' yayji oc yuj chiq'uil junok xajanbal, xan ok ex wiajtek bay jun olan najat yich bay c'am aej, bay preso e yayji.

¹²Mac ex aj preso ex, tol ayinxa oc yipok e c'ul, meltzojanek bay watx' ok ex ayjok. Chi wal ayex, tol ayin ok wak' yaxilal e yiban. Ec'ban ok yun in paktzen ayex, yintak bay max e yab ya'il ti'.

¹³Ok in k'anbalnej Judá axca julbalej, axa Efraín ok in k'anbalnej yin bak'ok in julbal tu'. A eb aj Sión ok wut eb axca wespada, yin wak'on owal yin eb aj Grecia, ẍi Cham.

¹⁴A wal caw Jehová ok tx'ox ba yiban is conob. Axca rayos ok yun julwaji. A Jehová, Cham Yajaw ok xu' is trompeta, cax ok ec' lemnaj xol owal cak'ek' chi tit bay sur.

¹⁵A Jehová Cham Yajaw yin Masanil ok colwaj yin is conob tu'. Ok tec'lay ay eb chi julwaj yuj eb is conob tu', cax ok yak' lajwok el eb is yajc'ul. Toxac'al ok el yaw eb conob Cham tu' xol owal axca eb uq'uem an. Ok pulcantok chiq'uil eb ajc'ul yuj eb, axca chi yun pulcantok yin txiquinlak altar chiq'uil no xajanbal ayay yul sec'.

¹⁶A wal yet jun c'ual tu', a Jehová ok colcan el is conob axca chi yun colon junok ilom calnel no calnel. Toxac'al ok tzekeki yili eb yet Cham bay yul is conobal; axcaxac'al yili ch'en ch'en manxa watx'ilok yili yin junok corona.

¹⁷Caw wal watx' xin, caw wal watx' yili eb aj conob tu'. Yuj xiwil trigo c'al vino, watx'xac'al ok yun ch'ib eb ach'ej c'al eb k'opoj.