Read Q'anjob'al Mt 1 Bible Online

Mt 1 - Q'anjob'al bible

Mt 1

¹A jun libro ti' chi alontek yabixal Jesucristo yinatil David, tol yinatil c'apax Abraham. A ton is bi eb yichmam Jesucristo yin txolilal ti'.

²A Abraham a ay c'ajol Isaac, axa Isaac a ay c'ajol Jacob. Axa Jacob, a ay c'ajol Judá yetok juntzanxa eb yuẍtak.

³Axa Judá, a ay c'ajol Fares c'al Zara bay Tamar. Axa Fares, a ay c'ajol Esrom, axa Esrom a ay c'ajol Aram.

⁴Axa Aram, a ay c'ajol Aminadab. Axa Aminadab, a ay c'ajol Naasón. Axa Naasón, a ay c'ajol Salmón.

⁵Axa Salmón, a ay c'ajol Booz yune' Rahab. Axa Booz, a ay c'ajol Obed yune' Rut. Axa Obed, a ay c'ajol Isaí.

⁶Axa Isaí, a ay c'ajol cham rey David, axa cham rey David, a ay c'ajol Salomón yune' ix yistzilben Urías.

⁷Axa Salomón, a ay c'ajol Roboam. Axa Roboam, a ay c'ajol Abías, axa Abías, a ay c'ajol Asa.

⁸Axa Asa, a ay c'ajol Josafat. Axa Josafat, a ay c'ajol Joram, axa Joram, a ay c'ajol Uzías.

⁹Axa Uzías, a ay c'ajol Jotam. Axa Jotam, a ay c'ajol Acaz, axa Acaz, a ay c'ajol Ezequías.

¹⁰Axa Ezequías, a ay c'ajol Manasés, axa Manasés, a ay c'ajol Amón. Axa Amón, a ay c'ajol Josías.

¹¹Axa Josías, a ay c'ajol Jeconías yetok eb yuẍtak. A yul is tiempoal eb tu', max ilaytok eb Israel preso bay Babilonia.

¹²A yet ayxa ec' eb bay Babilonia xin, max alji Salatiel c'ajol Jeconías. Axa Salatiel, a ay c'ajol Zorobabel.

¹³Axa Zorobabel, a ay c'ajol Abiud, axa Abiud, a ay c'ajol Eliaquim. Axa Eliaquim, a ay c'ajol Azor.

¹⁴Axa Azor, a ay c'ajol Sadoc. Axa Sadoc, a ay c'ajol Aquim. Axa Aquim, a ay c'ajol Eliud.

¹⁵Axa Eliud, a ay c'ajol Eleazar. Axa Eleazar, a ay c'ajol Matán. Axa Matán, a ay c'ajol Jacob.

¹⁶Axa Jacob, a ay c'ajol José yichamil María, ix is txutx Jesús, Cham chi yik Cristo, a ton Cham Ak'bil Yopiso yuj Dios.

¹⁷Yuj tu xin, canlajonwan eb ichmamej yettaxc'al Abraham masantac'al David. Canlajonwan c'apax eb yettaxc'al David, masantac'al max ilaytok eb israel bay Babilonia. Canlajonwan c'apax eb, yettaxc'al max ilaytok eb bay Babilonia, masantac'al max alji Cham Cristo.

¹⁸Tix yoc yabixal yaljubal Jesucristo ti': Ayxa trato José yetok María. K'anejtoc'al, c'amto chi yilej ba eb, palta yobixxa pax María tu'. A Espíritu Santo max esnen oc jun unin tu' yin ix.

¹⁹A José tu', caw wal yikem yin is ley Moisés, palta maj yal c'ul max abchaj aj k'umal ix María tu' yuj anima, xan max yochej max lajwi ay jun is trato eb tu' yin ewantakil.

²⁰Ipan wal naon José jun tu xin, max tx'oxon aj ba jun yángel Cham Jajawil yin wayichejal bay, cax max yalon bay axca ti': —José, ach yinatil David, manchak ach xiw eon María estzilok, yujtol a jun unin ayxa oc yin ix tu', a Cham Espíritu Santo max esnen oc yin ix.

²¹A jun unin ok aljok tu', winak unin. Ok ak' yik JESÚS,*fn* yujtol a' ok colon el is conob xol yobtakil, ẍi jun ángel tu' bay José.

²²Max uj masanil juntzan ti', yet watx' chi yun tzet max yal Cham Jajawil, yet max yak'balnen jun is chekbej yalon axca ti':

²³A jun ix k'opoj ix, c'amto winak chi yilej, ok oc unin yin. Ok jay jun is winak unin. Emanuel ok yika', ẍi yul tx'an Un Tz'ibbilcanok. (Emanuel chi yal elapnok: Ayic' Dios jetok).

²⁴Axa yet max el lenaj wayan José tu', max yiken axca max yun yalon jun yángel Cham Jajawil tu' bay, cax max yion ix;

²⁵palta majtoc'al yilej ba eb, masantac'al max alji nak babel unin ix tu', cax max yak'on José tu' yik JESÚS.