Read Q'anjob'al Mt 11 Bible Online

Mt 11 - Q'anjob'al bible

Mt 11

¹A yet max lajwi yalon Jesús juntzan chekbanilej ti' bay eb is lajcawan cuywom tu xin, max toji. Cax max ec' yulak conoblak bay jun lugar tu', yuj ec' yalon yabix eb anima, c'al cuywajcanok.

²A yet jun tiempoal tu' ayoc Juan, cham ak'om bautismo yul preso. Max yabej tzetak yetal lanan el yunen Cristo, xan max chektok cawan is cuywom bay.

³Max k'anlen eb bay Cham axca ti': —¿Ach mi Cham lanan jechbanen jayi, ma tx'ok junokxa chi jechbanej jay xin? ẍi eb bay.

⁴Axa tak'wi Jesús bay eb axca ti': Asek, cax che yalon yab Juan juntzan che yab ti', c'al juntzan che yil ti'.

⁵Che yal bay, tol ay eb c'amc'alta' chi je' yilwi, chixa ilwi eb tinani'. A eb c'amc'alta' chi je' beyi, chixa bey eb tinani'. A eb ayoc lepra yin, chi elcan yin eb. A eb c'am chi yabej, chixa yab eb. Aylaj eb camnak, lanan yictzojcan ajok. Lanan yal-laycan el k'anejal yet colbanilej bay eb meba'.

⁶Watx' yet eb c'am chi somchajcan el c'ul win. Caytu' che yut e yalon bay Juan yet chex apni, ẍi Jesús bay eb.

⁷A yet mayal toj eb xin, cax max c'oli yalontek Jesús yuj Juan tu' bay eb anima ayic' tu', axca ti': Naektek tzet max bet e yil bay tz'inan tx'otx'. ¿A mi junok te aj chi ec' meeok yuj cak'ek' max bet e yila'?

⁸Ta man ajok, ¿tzet max bet e yil xin? ¿Ma a junok winak watx' pichay max bet e yila'? E yojtakxa tol a eb watx' pichayi, a bay yatut eb rey ay eb.

⁹Ta c'amak xin, ¿tzet max bet e yila'? ¿Ma a junok chekbej Dios max bet e yila'? Wal yel chekbej ton Dios jun max bet e yil tu'. Palta a Juan tu', man asannejok chekbej Dios tu' yopiso.

¹⁰A ton yabixal Juan ti' yalnakcan Dios yul tx'an Un Tz'ibbilcanok bay chi yal axca ti': Ok in chek babjok jun in chekbej a satak, yet watx' chi toj watx'nej a be, ẍi.

¹¹Wal yel chi wal ayex, tol a xol masanil anima yulyibank'inal ti', c'am junok anima ec'ban yelapnok yintak Juan, cham ak'om bautismo tu'. Palta a xol eb ayxa oc yul k'ab Dios xin, ta ay junok yaynakil yayji, ec'banc'alta' watx'il yet, yintak cham tu'.

¹²Yettaxc'al max chaon el yich Juan tu' yak'wi bautizar, masantac'al tinani', xiwil anima mayal oc yul k'ab Dios. Ay eb tec'an chi yut ba, chi yak'on yip yaon oc ba yul k'ab tu'.

¹³A yet c'amto cham tu', max c'olic'al yalon masanil eb chekbej Dios, tol ok oc Dios yajawilal. Cay c'apax tu' yal-laycan yul ley Moisés.

¹⁴Ta che yochej che yaoc yin e c'ul tzet chi wal ti', ok nachaj el e yuj, tol a Juan tu', a ton Elías echbanebil jayi.

¹⁵A juntzan che yab ti', naobtanejek sic'libil.

¹⁶Ok waltek ayex tzetbil yayji nabal anima yet jun tiempoal ti'. Lajan eb axca unin chi ec' chotlajbok txonbal, chi c'oli yawjitok bay yet uninal axca ti'.

¹⁷Nabac'al max jetnej co ba co xuon co chirima e yuj, majc'al ex canalwok paxok. Yetok c'apaxok, nabac'al max co bitnej juntzan bit cusiltakxac'al yoqui, palta majc'al e tz'ak ok' pax e ba jetok, ẍi eb.

¹⁸Yujtol a beybal Juan tu', c'am tzet watx' chi yochej chi lo', c'al chi yuq'uej, xan chi yal eb, tol a junok espíritu yob chi etneni.

¹⁹Max lajwi tu', max in jay ayin Chekbilintek yuj Dios xol eb jet animail ti'. Ayin ti', chin lowi, chi wuc'a', palta chi yal eb wuj axca ti': A Jesús tu' asanc'al loj c'al uq'uej vino chi yochej. Yamigo ba yetok eb tekom el tojlabal, c'al yetok juntzanxa eb yob is beybal, ẍi eb wuj. Palta a eb ayoc jelanilal Dios yin, chi txecloj el is jelanil eb tu' yin tzet chi el yuneni, ẍi Jesús bay eb.

²⁰Max lajwi tu', max chaon el yich Jesús yalontek is yobtakil eb anima bay juntzan conoblak bay xiwil milagro max yunej. Caxc'al xiwil milagro max el yunen nan xol eb bay tu', palta c'am jabok max na ba c'ul eb yin is yobtakil, xan max yal axca ti':

²¹A wal ayex ti' ex aj Corazín, caw wal ok'bal ex c'ul, c'al ex aj Betsaida, ok'bal ex c'apax c'ul. K'inalok ta a bay Tiro, yetok bay Sidón max uj juntzan milagro max uj e xol ti', payxatax mi max na ba c'ul eb yin is yobtakil. Payxatax mi max yaoc eb el pichilej, yetok c'apaxok, xam yajtok eb tik'ak'il tan yin is jolom.*fn*

²²Yuj tu xan chi wal ayex, a yet ok jay jun c'ual beyc'ulal, yelc'al miman yailal ok e cha' yintak eb aj Tiro, yetok eb aj Sidón.

²³Ac'ala' ex aj Capernaum, che na' tol e moj e yilay can masantac'al chex ajapnok satcan. Palta ok ex ilay ayok, masantac'al ok ex ayapnok xol eb camnak. Ta a bay Sodoma max uj juntzan milagro axca juntzan max uj e xol tu', max mi na ba c'ul eb yin is yobtakil, ay mi ec' is conob eb tu' tinani'.

²⁴Yuj tu xan chi wal ayex, a yet ok jay jun c'ual beyc'ulal, yelxac'al miman yailal ok e cha' yintak eb aj Sodoma tu', ẍi Jesús.

²⁵A yet jun tiempoal tu', max txajli Jesús, max yalon Cham yin is txaj axca ti': Mamin, Yajaw ach bay satcan, c'al bay yulyibank'inal ti', chi wal watx' k'anej ayach, yujtol max ebaj el juntzan ti' bay eb jelan, c'al bay eb caw ay nabal yul sat eb yet animail. Axa bay eb axca unin max ak' ojtaknelay elok.

²⁶Caytu' max ot caytu' Mamin, yujtol caytu' max yun chaon a c'ul, ẍi bay Dios.

²⁷Max lajwi tu xin, max yalon c'apax axca ti': Max yak'can in Mam masanil tzetak yetal yul in k'ab. C'am junok mactxel ojtaknej in ayin is C'ajol in ti', asan in Mam ojtaknen in. Yetok c'apaxok, c'am mac comonc'al chi ojtaknen el in Mam. Asan ayin is C'ajol in ti' wojtak, yetok eb mac bay chi yal in c'ul chi wak' ojtaknelay elok.

²⁸Sebaxek ayin e masanil ex c'unbinak ex el yuj mulnajil, c'al ex caw wal al e yikatz. Ok ex wak' xewok.

²⁹Ikek jun ikatz ok wak' e yika'. Cuywanek wintak, yujtol ayin ti' manso in, yaynakil chi wut in ba, cax ok e yion xewilal e yanimail.

³⁰A jun ikatz chi wak' e yik ti', man alok, cax man c'apax yatakok in e yak'on serbil, ẍi Jesús bay eb.