Read Q'anjob'al Mt 12 Bible Online

Mt 12 - Q'anjob'al bible

Mt 12

¹A yet jun tiempoal tu' max ec' Jesús yul jun be xol juntzan trigo yetok eb is cuywom yet jun c'ual xewilal. C'uxanc'al max tit wajil eb cuywom tu', xan max yiil eb jayeb jolom ixim trigo tu', cax max batzon el eb c'uxu'.

²A yet max yilon jaywan eb fariseo axca tu xin, max yalon eb bay Jesús: —Ila wal juntzan a cuywom ti', lanan batzon el eb trigo yet c'ual xewilal ti'; palta ay yowalil co mulnaj yuj co ley,*fn* ẍi eb bay Cham.

³Axa yalon Cham bay eb axca ti': —¿Tom c'amto bay che yil tx'an Un Tz'ibbilcanok, tzet yunnak David junel, yet max tit is wajil yetok eb ajun yetok?

⁴Max octok yul templo Dios, max loon ixim pan yet Dios yayji, yetok eb ajun yetok tu'.*fn* A juntzan pan tu', asan eb sacerdote ay leyal looni. A pax David yetok eb ajun yetok tu xin, man leyalok tol chi lo eb, palta c'am chi oc mulok eb.

⁵¿Ma c'amto che yil yul ley Moisés tol a eb sacerdote, eb chi ak'wi serbil yul templo, tok chi yikej ba eb yet c'ual xewilal? Palta c'am chi oc mulok eb.

⁶Chi wal ayex xin, tol a cayti' ay junok mactxel yelxac'al miman yelapnok yintak templo Dios tu'.

⁷Matawal tol mayal nachaj el e yuj tzet albilcan yuj Dios, yul tx'an Un Tz'ibbilcanok bay chi yal axca ti': Chi wochej tol chi ok' e c'ul yin e yet animail, yintak pax e yak'on tz'a xajanbal ayin, ẍi. K'inalok ta chi nachaj el jun tu' e yuj, c'am mi che yak' low yin eb c'am is mul.

⁸Ayin ti' chi je' walon tzet chi je' el junen yet c'ual xewilal, yujtol Chekbilintek yuj Dios xol eb jet animail, ẍi Jesús bay eb fariseo tu'.

⁹Max lajwi tu xin, max toj Jesús, max octok yul nail wajayil bay chi oc culto.

¹⁰Ay jun winak sicbinak el jun is k'ab bay tu', palta ay eb chi yochej chi ilchaj junok k'anej chi oc mulok Jesús, xan max k'anlej eb bay Cham axca ti': —¿Ay mi leyal chi ak'lay jaycan c'ul junok ya'ay yet c'ual xewilal? ẍi eb bay.

¹¹Max tak'wi Jesús bay eb: —K'inalok ta ay junok ex chi toj junok e calnel yul junok olan yet c'ual xewilal, ¿tom c'am chi toj e yiajtek?

¹²Akxa junok anima, yelxac'al miman yelapnok yintak junok calnel. Yuj tu' xan chi ton je' jak'on junok watx'c'ulal yet c'ual xewilal, ẍi bay eb.

¹³Lajwi tu xin, max yaloni: —Bitok a k'ab, ẍi Cham bay nak winak tu'. Axa biontok nak tu' is k'ab, cax max watx'jican axca tac'a junxa k'ab nak.

¹⁴Axa yeltok eb fariseo tu' yina, cax max c'oli lajtinen ba eb yin Jesús yuj tzet chi yut yak'on cam eb.

¹⁵A yet max yojtaknen el Jesús tzet lanan naon oc eb yin xin, axa toj tu'. Xiwil anima max tzakloj yintak, tom jantaknej eb ya'ay max jaycan c'ul yuj Cham.

¹⁶Max yalon Cham bay eb axca ti': —C'am junok mac bay che yala' mactxel max ak'on jaycan e c'ul, ẍi bay eb.

¹⁷Tix max yut yalon bay eb ti', yet watx' chi yun tzet albilcan yuj cham Isaías chekbej Dios, yet max tz'ibencan tzet max yal Dios bay, tol chi yal axca ti':

¹⁸A ton jun in chekbej sic'bil el wuj ti'; caw ay in camc'ulal yin, ay ton wal in tzalojc'ulal yin. Ok wacan oc Wespíritu yin, axa yalon el nan xol eb man Israelok tu', tol ok beyc'ulnelay eb yin watx'il.

¹⁹C'am bay ok yak' owal. C'am bay ok aj yaw k'anjabi. Man ok ablay yel yaw yulak calle.

²⁰Ay eb caw ok'bal c'ul, axca wal te pojil aj, ma xin axca junok mecha yet tzektebal toxa chi tani, caytu' eb. Palta a ton ok colon el eb, man ok yak' low yin eb. Cayton tu' ok yunej, masantac'al ok occan yin Yajawilal. A yet ok yak'on Yajawilal tu', watx' ok yutej.

²¹Cax a' ok yaoc masanil eb conoblak yipok is c'ul, ẍi Dios yul tx'an Un Tz'ibbilcanok.

²²Ay jun winak max ilaytek bay Jesús, tol c'am chi je' yilwi, c'am chi je' c'apax k'anjabi, yujtol ay jun espíritu yob ayoc yin. Palta max jaycan c'ul yuj Jesús. Yuj tu xin, xan max ilwican ajok, cax max k'anjab c'apaxcan ajok.

²³Masanil eb anima max ilon jun ti', max c'ayaj c'ul eb, cax max yalon eb: ¿A mi jun yinatil David echbanebil juj ti'? ẍi eb.

²⁴Palta a yet max yaben eb fariseo jun ti', max yalon eb axca ti': Chita' je' yion el jun winak tu' espíritu yob yin anima, yujtol a yajawil eb tu' ayoc yetok, jun chi yik Beelzebú, ẍi eb.

²⁵Max yojtaknej el Jesús tzet chi na' eb, yuj tu xan max yal bay eb axca ti': K'inalok ay junok miman conob bay chi pojchaj eb yajaw, cax chi yak'len aj eb owal, chi lajwi ay jun conob tu'. K'inalok ay junok conob, ma xin junok nail anima chi pojchaj yuj owal, chi lajwi ayok.

²⁶Ilab xin, cayton tu' yayji Satanás, ta chi pojchaj yetok yet espíritual yob, ¿tom ok mayjok yin yopiso?

²⁷Ayin ti' che yala' tol yuj yikbej Beelzebú chi wican el eb espíritu yob tu'. Ta yel ta' che yala', ¿mac pax txel ayoc yetok eb e cuywom yet chi yion el eb eb espíritu yob tu'? Yuj tu xin, acaw wal eb e cuywom tu' chi tx'oxon elok tol c'aynak ex tok.

²⁸Ta a yuj yikbej Yespíritu Dios chi wican el espíritu yob tu' yin anima, a ton yin jun ti' chi txecloj elok tol mayal chaoc Dios yak'on yajawilal co xol.

²⁹K'inalok junok winak caw ay yip tinani', tok ay junok mac comonc'al ok je' yoc elk'an yul yatut. Asannej ta ay junokxa chi tzakay pixoncan ay nak bian, catam tu' chi je' yelk'anentok yul yatut nak tu'.

³⁰A eb manak wetok ayocok, ajc'ul oc eb win. A eb c'am chi wajban oc eb wetok, a ton eb chi ak'on saklemcantok eb.

³¹Yuj tu xan chi wal ayex, tol tzanc'al tzet yobtakil chi yal anima, c'al tzet chi el yuneni, ok ak'lay tan is yobtakil tu' yuj Dios. Palta a mac chi buchon Cham Espíritu Santo xin, c'amxac'al chi ak'lay tan is mul yiban.

³²Ta ay junok mac chi alon junok tzet yetal yob win, ayin Chekbilintek xol eb jet animail yuj Dios ti', ok ak'lay tan is yobtakil tu' yiban. Palta a mac chi yal buchwal k'anej yin Cham Espíritu Santo, c'am oxlajon bak'in ok ak'lay tan is yobtakil yiban, tamwal yet jun tiempoal ti', tamwal yet yajtok tu'.

³³Ilab tol chi nachaj el te te' yuj is sat, xan naek, tatol watx' te te', watx' c'apax sat chi yak'a', tatol yob te te', yob c'apax sat chi yak'a'.

³⁴Ayex ti', lajan ex axca labaj. Yob ex. Yuj tu', ¿tom ay jabok tzet watx' chi je' e yaloni? Yujtol a tzet ay bay co nabal, a' chi jala'.

³⁵A mac watx' is nabal, watx' tzet chi yala', yujtol asan tzet watx' ay yin is nabal. A pax eb yob is nabal xin, yob c'apax tzet chi yal eb, yujtol asan tzet yob ay yin is nabal eb.

³⁶Chi wal ayex tol a yet ok jay jun c'ual beyc'ulal, ok beyc'ulnelay masanil anima yuj masanil k'anej c'am yopiso chi yala'.

³⁷A Dios ok ex beyc'ulnen yuj tzet che yala'. Ata ok alonok, ta ok oc tzet max e yal tu' e mulok ma c'amak, ẍi Jesucristo.

³⁸Ay juntzan eb meẍtol yin ley Moisés, c'al juntzan eb fariseo max alon bay Jesús axca ti': —Meẍtol, chi jochej cha tx'ox junok milagro jila', ẍi eb bay.

³⁹Yuj tu xan max yal Jesús bay eb: —A wal ayex yet jun tiempoal ti', caw yob ex, manak yin Dios che yaoc e c'ul. Toc'al che k'an milagro e yila', junok tzet chi tx'oxon yipal Dios. Palta junnej milagro ok tx'oxlay ayex, a ton junok axca jun tx'oxbil yuj Dios yin jun is chekbej chi yik Jonás.

⁴⁰A Jonás tu', oxeb c'u oxeb ak'bal aynaktok yul c'ul jun no miman txay. Axca max yun Jonás tu', axca tu' ok wun ayin Chekbilintek yuj Dios xol eb jet animail ti'. Oxeb c'u, oxeb ak'bal ok in aytok yul tx'otx'.

⁴¹A yet max ec' yalon Jonás yabixal Dios bay eb aj Nínive, max na ba eb. Axa tinani', ti pax wal ec'ban in yintak Jonás tu', palta tok yuj tu' che na e ba. Yuj tu' xan ato yet ok jay jun c'ual yet ok ex beyc'ulnelayok, ok aj wan eb aj Nínive, ok yalon aj eb e yobtakil tu'.

⁴²Ilab c'apax jun xal yajaw bay Sur yet payxa. Caw wal najat titnak xal, max ulic' xal abxalwok bay cham Salomón, yujtol xiwil is jelanil cham. A tinani', ti pax wal ec'ban in yintak Salomón tu', palta c'am chi ulic' anima abxalwok ayin. Yuj tu xan ato ok jayoc jun c'ual yet ok ex beyc'ulnelayok, ok aj wan xal, cax ok yalon aj xal e yobtakil.

⁴³K'inalok ay junok espíritu yob chi el yin junok anima tinani', chi ec' bay lugarlak takin yuj sayon ec' bay watx' chi xewi. Palta c'am chi ilchaj bay watx' chi ayji, xan chi na' axca ti':

⁴⁴Ok in meltzoj bay in cajlub bay petoj in tac'a, ẍi. Axa yet chi meltzoj tu xin, chi yilon oc yin jun anima tu', tol lajan axca junok na c'am mac cajan yul, q'uisisi, watx'nebil elok.

⁴⁵Xan chi toj yitek ukwanokxa yet espíritual yob, ec'banxa is yobtakil yintak, cax chi watx'nenxac'al cajay ba eb yin jun anima tu'. Yuj tu xan yelxac'al yob chi yun yeloc yintak yet babelal. Axca ton jun anima tu', cayton tu' ok yun yetaxxac'al el nabal eb anima ti', ẍi Jesús.

⁴⁶Lananto wal k'anjab Jesús bay eb anima, max apni oc is txutx yetok eb yuẍtak. Asan ti na max apni oc lecan eb. Max yochej eb max k'anjab yetok.

⁴⁷Xan ay jun max alon yab Jesús axca ti': —Ayic' a txutx yetok eb oẍtak ti na. Tolab chi yochej eb chi k'anjab etok, ẍi bay.

⁴⁸Axa tak'wi Cham bay axca ti': —¿Mactxel in txutx tu', mactxel eb wuẍtak tu' cha na'? ẍi.

⁴⁹Axa tx'oxon oc eb is cuywom tu' bay, max yalon axca ti': —A ton eb ti' axca in txutx yayji, a ton eb ti' axca wuẍtak yayji.

⁵⁰Yujtol tzanc'al mac chi iken yochwan in Mam bay satcan, a ton eb tu' axca tol wuẍtak, axca tol wanab, axca tol in txutx, ẍi.