Read Q'anjob'al Mt 17 Bible Online

Mt 17 - Q'anjob'al bible

Mt 17

¹Obxitax tu', max yiontok Jesús Pedro yetok Jacobo c'al jun yuẍtak Jacobo tu' chi yik Juan. Asan eb max ilaytok yuj Cham. Max toj eb bay jun miman tzalan.

²A bay tu' max q'uexpoj yili Cham max yil eb. Max tzekeki aj sat Cham axca c'u. Axa is pichil, sak lubinakxac'al yili.

³Junixto bek tu', max ul tx'oxon aytek ba Moisés yetok Elías, max k'anjab eb yetok Cham.

⁴Axa yalon Pedro bay Cham axca ti': —Mamin, caw wal watx' jet, yujtol ayon ec' cayti'. Ta chi yal a c'ul, chi co watx'nej oxebok lanchu cayti': junok et, junok yet Moisés, c'al junok yet Elías, ẍi bay Cham.

⁵Lananto wal k'anjab Pedro tu', cax max ay boc'naj jun asun chi tzekeki yiban eb. Ay jay belan k'anej max oc xol jun asun tu', max yalon axca ti': A ton in C'ajol bay xiwil chi camel in c'ul ti'. Caw chin tzaloj yetok. Acbajek e txiquin bay, ẍi.

⁶A yet max yaben eb cuywom jay belan k'anej tu', max ay paknaj eb sat tx'otx'. Caw wal max xiw eb sic'libil.

⁷Max jayoc Jesús c'atan eb, max matxban oc k'ab yiban eb. —Ajanek wan, manchak ex xiwi, ẍi bay eb.

⁸Axa yet max yilontek eb, c'amxa mac ayic'ok, asanxanej Jesús ayic' tx'oklil.

⁹A yet lanan paxaytek eb bay jun tzalan tu', max yalon Cham bay eb axca ti': —Ayta bay e yal jun max e yil ti'. Ato yet mayal quin ictzoj aj xol eb camnak, ayin Chekbilintek yuj Dios xol eb jet animail ti', catatu' che yalon elok, ẍi bay eb.

¹⁰Catatu bian max k'anlen eb is cuywom tu' bay: —A eb meẍtol yin ley Moisés, chi yal eb axca ti': A Elías yowalil babel ok jay satak Cham Cristo, ẍi eb. ¿Tzet yuj xan chi yal eb axca tu'? ẍi eb bay.

¹¹Axa yalon bay eb tu' axca ti': —Yel ton chi yal eb, tol yowalil chi jay Elías tu' yin babelal yuj watx'nen masanil.

¹²Palta chi wal ayex, tol ulnakxa ec'ok; palta maj nachaj el yuj eb anima tatol a'. Yuj tu' xan max yak' wal eb yochwan yin axca chi yochej. Caytu' ok wut c'apax waben yail yuj eb, ayin Chekbilintek yuj Dios xol eb jet animail ti', ẍi bay eb is cuywom tu'.

¹³Catatu' bian max nachaj el yuj eb, tol a Juan, cham ak'om bautismo chi yal Cham.

¹⁴Axa yet max apni oc eb bay bulan ec' anima tu', max jayoc jun winak bay Jesús. Max bekon ay jajan ba bay yakantak Cham, cax max yalon bay axca ti':

¹⁵—Mamin, ok' a c'ul yin jun in c'ajol chi tit oybinak sat yin. Caw wal chi yetnej c'ul yuj. Ay bay chi toj xol k'ak', ma yulak aej yuj.

¹⁶Max witek bay eb a cuywom ti', palta maj watx'jok yuj eb, ẍi bay Jesús.

¹⁷Yuj tu' xan max yal Jesús axca ti': —¡A…, a wal ayex ti', caw wal c'am che yaoc e c'ul yin Dios, caw wal pit ex! Mimanxa tiempoal wayji ec' e yetok. ¿Bak'intoc'al ok nachaj el e yuj xin? Chi yab yail in c'ul e yuj. Asi', itek nak unin tu' ayin, ẍi.

¹⁸A yet max jay nak unin tu' bay, max tzuwaj Cham yin jun espíritu yob ayoc yin nak unin tu', cax max yukten el yin nak. Axa yet jun bek tu' max jaycan c'ul nak yuj.

¹⁹Axa yet max can Jesús tx'oklil yetok eb is cuywom, max k'anlen eb bay: —¿Tzet yuj xan maj el jun espíritu yob tu' yin nak juj on? ẍi eb bay.

²⁰—Yujtol c'am che yaoc e c'ul yin Dios. Wal yel chi wal ayex, tatol che ya wal oc e c'ul yin, caxc'al jab ch'an che yut e yaon oc e c'ul yin axca junok bak' mostaza, ok je' e yalon bay junok witz axca ti': Elan cayti', asi' bay junokxa lugar, ta quex chi bay, ok el e yuj. Masanilc'al tzet yetal ok je' e yuj, tatol yel wali che yaoc e c'ul yin Dios,*fn* ẍi bay eb.

²²A yet lanan yec'jab Jesús yetok eb is cuywom bay yul makbej Galilea, max yalon bay eb axca ti': —Ayin ti' caxc'al Chekbilintek yuj Dios xol eb jet animail, palta ok in alay oc yul k'ab eb anima.

²³Ok in yak' cam eb, axa yet cabjial ok in ictzonelay pax ajok, ẍi bay eb. A yet max yaben eb juntzan ti', caw wal max cus c'ul eb.

²⁴A yet max apni oc eb bay conob Capernaum, max jayoc eb tekom el tumin yet templo Dios bay Pedro, max k'anlen eb axca ti' bay: —¿Chi mi yak' jun e cuyomal tu' ch'en waj tumin chi k'anlay yuj templo Dios, ma c'am chi yak'a'? ẍi eb.

²⁵—Chi yak'a', ẍi bay eb. A yet max octok Pedro yul na, a Jesús max babji k'anlen bay: —Simón, ¿tzet cha na'? ¿mac bay chi tekil eb rey yulyibank'inal ti' ch'en tojlabal? ¿a mi bay eb yuninal eb, ma a bay eb tx'ok conobal? ẍi bay.

²⁶—A eb tx'ok conobal chi ak'oni, ẍi Pedro. Yuj tu xan max yal Jesús bay: —Ta caytu xin, a eb uninalej man yowalilok chi yak' eb yet.

²⁷Palta yet watx' man yobok chi yab eb, asi' bay ti a' mar, chaon aytok anzuelo yul a'; a no babel txay chi michchaji, che ajtek. A yul ti' jun txay tu' ok ilchaj jun tumin oj, k'okbil ok yab in tojlabalok, c'al yuj et. Asi', ak'can bay mac chi tekon el ch'en tu', ẍi Jesús bay.