Read Q'anjob'al Mt 23 Bible Online

Mt 23 - Q'anjob'al bible

Mt 23

¹Max lajwi tu xin, max yalon Jesús bay eb anima, c'al bay eb is cuywom axca ti':

²A eb meẍtol yin ley Moisés yetok eb fariseo, ay ton yopiso eb cuywaj yin ley Moisés.

³Yuj tu xin, ikejek tzanc'al tzet chi yal eb, cax che beybalneni. Palta a beybal eb xin, man e beybalnej, yujtol a tzet chi yal eb, tok chi beybalnej eb.

⁴A juntzan chekbanil chi yak' eb, lajan axca junok ikatz c'am chi lacchaj juj. Chi wajbaj eb, cax chi yak'on eb jika'; palta a eb xin, tok chi yochej eb chi oc lacan yin jabok. Caytu' chi yun yak'on eb jik juntzan chekbanil caw ya'.

⁵A masanil tzet chi yun eb, asan yuj yil-lay yuj anima xan chi yun eb. Caw mimek patxjab juntzan tz'um bay tz'ibbil oc jabok k'anej co Mam Dios, chi yaoc eb yin is k'ab, c'al yin is nan sat. Chi yaon oc eb jokquiẍtak pichilej, jokquiẍtak is tilak.*fn*

⁶A bay chi oc mimek loj, asan bay puch watx' chi ay chotan eb. Yetok c'apax bay nail is culto eb, asan bay chi ay chotan eb mimek winak chi ay chotan eb.

⁷A yet chi ec' eb yulak calle, caw chi tzaloj eb yet chi yion ay ba anima bay eb. Caw chi tzaloj eb yet chi al-lay oc eb meẍtolal.

⁸Palta ayex ti xin, manchak e cha' e yal-lay oc meẍtolal, yujtol junnej e meẍtol, a ton Cristo, tol ayin toni. Axa ayex xin, e yuẍtak e ba, e yanab e ba e masanil.

⁹C'am junok mactxel bay yulyibank'inal ti' chi je' comonc'al che yaloc e mamok. Yujtol junnej e Mam, a ton Cham ay bay satcan.

¹⁰Manchakokab ex al-lay yajawil, yujtol junnej e Yajawil, a ton Cristo, tol ayin toni.

¹¹Tzanc'al mac bekanc'al c'ul yoc mosejal e xol, a ton jun tu' yelxac'al miman yelapnok.

¹²Tzanc'al mac chi yiaj can ba, ok utlay yin yaynakilal, axa eb chi yi aytek ba, a ton eb tu' ok ilay can.

¹³Axa ayex meẍtol ex yin ley Moisés ti xin, yetok ex ayex fariseo ex ti', caw ok'bal ex c'ul. Cabsat ex. Ilab che tenoc wanaj anima yoc yul k'ab Dios. Maj ex oc ayex ti', tamwal che cha' c'apax oc eb chi yochej chi oqui.*fn*

¹⁵Ex meẍtol yin ley Moisés, c'al ex fariseo, caw ok'bal ex c'ul. Cabsat ex. Pilan che yoymanej yulyibank'inal yetoklaj a' mar, yuj ec' e monten oc junok mactxel e yetok yin e religión. A eb che yak' ganar yoc tu', toc'al chi etax el nabal eb e yuj. Yuj tu xin, moj ec'ban yailal eb chi yi' e yintak.

¹⁶Ayex ti', lajan ex axca junok mactxel c'am chi je' yilwi, chito wal tz'ak quetz junokxa mactxel. Caw ok'bal ex c'ul, yujtol che yal axca ti': Ta ay junok mactxel chi loctek bi templo Dios yet chi yak'on is ti', man wal yowalilok chi yun is ti tu'. Palta ta a bi ch'en oro bay templo Dios chi loctek xin, yowalil chi yak' yun tzet max yal tu xin, quex chi.

¹⁷Yuj tu xin, caw c'am e nabal. Axca wal tol c'am chi je' e yilwi jabok. ¿Baytet ay junok yel miman yelapnok che na'? ¿A mi ch'en oro tu' tx'oklil, ma a templo Dios tu'? A ch'en oro tu', asan yujtol yet is templo Dios ch'en, yuj tu' xan yet Dios ta' yayji.

¹⁸Che yalon c'apax axca ti': Ta ay junok mac chi loctek bi altar, bay chi ajtok xajanbal yet chi yak'on is ti', man yowalilok chi yun is ti tu'. Palta ta a xajanbal batxan ajtok yiban tu' chi loctek is bi, yowalil chi yak' yun tzet max yal tu xin, quex chi.

¹⁹Yuj tu xin, caw c'am e nabal. Axca wal tol c'am chi je' e yilwi jabok. ¿Baytet ay jun yel miman yelapnok che na'? ¿A mi xajanbal tu', ma a jun altar bay chi ajtok batxan tu'? A jun xajanbal tu', yujtol ayxa ajtok yiban altar tu', xan yet-xa Dios yayji.

²⁰Yuj tu xin, ta ay mac chi loctek bi jun altar bay chi ajtok xajanbal tu', man asannejok jun tu' lanan locontek bi. Palta lanan locontek bi masanil tzet batxan ajtok yiban c'apaxok.

²¹Ac'ala' mac chi loctek bi templo Dios, man asannejok templo tu' lanan locontek bi; palta lanan c'apax locontek bi Cham cajan bay tu'.

²²Ta ay mac chi loctek bi satcan, chi yal elapnok tol lanan locontek bi is despacho co Mam Dios, lanan locontek c'apax bi Dios, yujtol a bay satcan tu' ayic'ok.

²³Ex meẍtol yin ley Moisés, c'al ex fariseo, caw ok'bal ex c'ul. Cabsat ex. Che yak'naj is diezmoal an alawen, an aniẍ, c'al an comino, palta juntzan chekbanil Dios miman yelapnok, tok che yikej, a ton wal juntzan chekbanil chi aloni, tol yowalil watx'okab chi jut co ba, chi ok' co c'ul yin jet animail, cax chi jun tzet chi jala'. Palta ilab c'am yelapnok juntzan ti' yul e sat. Matawal tol che yikej juntzan ti', cax che yiken pax juntzanxa tu'.

²⁴Ayex ti', lajan ex axca junok mac c'am chi je' yilwi, cax chito wal tz'ak quetz junokxa mactxel. Lajan ex axca junok mactxel chi yi ajtek junok us chi tojc'ay xol yuc'a', axa junok camello chi turaytok.

²⁵Ex meẍtol yin ley Moisés c'al ex fariseo, caw ok'bal ex c'ul. Cabsat ex. Ayex ti' lajan ex axca junok mactxel asan yin vaso, c'al yin plato chi tx'ajilok, palta yul, caw wal tz'iltak. Axca ton tu' ayex ti', caw wal watx'xac'al che yut e ba satak anima; palta axa yin ewantakil xin, toxac'al chex oc beyomal yuj e yetnen anima yuj e yak'on yochwan e pek'al.

²⁶Ayex fariseo ex ti', axca wal tol c'am chi je' e yilon jabok. Watx'nejek oc e nabal yin babelal, catatu' watx' ex c'apax satak anima.

²⁷Ex meẍtol yin ley Moisés, c'al ex fariseo, ok'bal ex c'ul. Caw cabsat ex. Lajan ex wal axca junok nichoal camnak watx' yili, sak tx'ijinakxac'al. Palta a yul, nojnak el yuj bakil camnak, c'al yuj tzet man watx'ok.

²⁸Cayex wal ton tu xin, yujtol a yul sat eb anima, watx'naj che yut e ba; palta caw cabsat ex yul e c'ul, cax caw ay e yobtakil.

²⁹Ex meẍtol yin ley Moisés c'al ex fariseo, ok'bal ex c'ul. Caw wal cabsat ex. Ayex ti', che watx'nej aj mukbanil eb chekbej Dios, cax che watx'nen oc yelbubal is mukbanil eb watx' nabal tu'.

³⁰Cax che yalon paxok: K'inalok ta ayonxa ec' yet max ec' eb jichmam yet payxa tu', maj on mi colwaj yetok eb, yin co mak'on cam juntzan eb chekbej Dios, quex chi.

³¹Palta a yet che yalon axca tu', che tx'oxk'abnej elok tol yinatil ex eb max mak'on cam eb chekbej Dios tu'.

³²A tzet max chail yich eb e yichmam tu' yunen xin, a lanan e lajonxac'al canok.

³³Ayex ti', caw jelan ex yin yobtakil axca junok labaj. ¿Tzet wal ok e yut e colon el e ba yul k'ab yailal bay infierno?

³⁴Abek. Ok in chektok juntzan eb chekbej Dios ayex, c'al juntzan eb jelan yin yet Dios, yetok juntzan eb meẍtol. Ay eb ok e yak' camok, ok e curusnej eb. Ay eb, tol ok e mak' yulak nail bay che yak' culto. Ok e yuktej ec' eb bay conoblak.

³⁵Yuj tu xin, a is camichal masanil eb anima watx'c'al max yut ba, tol mak'bil camok, a' ok alay oc e mulok, chi chail yich yin is camichal Abel, nak watx' is beybal, masantac'al yin is camichal Zacarías,*fn* c'ajol Berequías, a ton mak'bil cam bay yamak'il templo Dios, nan xol templo yetok altar.

³⁶Wal yel chi wal ayex, tol a camichal masanil eb tu', a' ok oc e mulok mac ex ayex ec' ti' tinani'.

³⁷¡Ay…, a wal ayex ti' ex aj Jerusalén! ¡Che mak' wal cam eb chekbej Dios, axa juntzanxa eb chekbiltek yuj Cham e nan e xol, che k'okch'ennej eb! Xiwil el max wochej max quex wawtejtek ayin, axca junok no caẍlan chi k'uttejtek yune', cax chi mojoni, palta maj yal e c'ul.

³⁸Abek, a jun e templo ti', ok tz'ink'oj canok.*fn*

³⁹Chi wal ayex tol c'amxa bay ok e yil win, masantac'al yet ok e yalon axca ti': Al-layokab watx' k'anej bay Cham chekbiltek yuj Cham Jajawil, quex chi, ẍi Jesús bay eb.