Read Q'anjob'al Mt 24 Bible Online

Mt 24 - Q'anjob'al bible

Mt 24

¹Max eltek Jesús yul templo Dios xin. Lananxa wal toji, max jitzonxac'altek ba eb cuywom c'atan. Max c'oli tx'oxon oc eb nalakil templo Dios bay.

²Palta max yal Cham bay eb axca ti': —Ayex ti' che yil juntzan na ti', palta wal yel chi wal ayex, a masanil juntzan ch'en latz'bil aj ti', c'amxa junok ok cancan yiban yet ch'enal. Pilan ok ec' bulnajok, ẍi bay eb.

³Max lajwi tu xin, max toj bay jun tzalan chi yik Olivo, axa yay chotan tu'. Max apni oc eb is cuywom bay, cax max k'anlen eb bay: —Chi jochej chal ayon, ¿bak'in wal ok jay jun max al ayon tu'? ¿Tzet yechelej ok tx'ox Dios, yet jabxanej a jayi, yetok c'apax yet ok lajwok jun tiempoal ti'? ẍi eb bay.

⁴Axa yalon bay eb tu': —Caw aj nabal che yut e ba, yet watx' c'am junok mactxel ok ion aytek e sat.

⁵Yujtol xiwil mac ok banoc in bi yiban, cax ok yalon eb axca ti': Ayin ton Cristo in, ẍi eb, ok tz'ak yalon eb. Xiwil anima ok yiaytek eb sat.

⁶Ok e yab yoc mimek owal. Ok e yab k'umal juntzanxa owal ijan chi oqui. Palta manchak ex xiwi, yujtol yowalil ok yunc'alta' juntzan tu'; asan xin, mantonak lajubal tu'.

⁷Ay wal juntzan mimek conob ok yak'lej owal yetok yet mimek conobal. Ok yak'lej eb yajaw owal yetok yet yajawil. Ok jay mimek wajil. Xiwil bay ok ec' quixcab.

⁸Palta a juntzan tu', yichbanil yatakilixtoc'al. Ay wal juntzanxa ok jayok.

⁹Ayex ti', ok ex ilaytok satak eb yajaw, cax ok e yilon yailal yuj eb; ok ex yak' cam eb. Masanilxanej anima ok chichon oc c'ul e yin wujc'al.

¹⁰A yet jun tiempoal tu', xiwil mactxel ok meltzoj pax yintak junelxa. Ok yajc'ulnej ba eb, ok yak'lej cam ba eb.

¹¹Xiwil mac ok yaloc ba chekbejok Dios. Yuj tu' xan xiwil mac ok yetnej eb.

¹²Ok aj can anima yin yobtakil; yuj tu', tok okto camc'ulnelej ba eb.

¹³A mac tec'an ok yut ba masantac'al lajub, a ton eb tu' ok colchajok.

¹⁴Axa jun watx' abix chi alon tzet ok yun yoc eb anima yul k'ab Cham aj satcan, yowalil ok al-laycan el bay masanil yulyibank'inal ti', yet watx' chi ablay bay junjun conob. Catatu' bian ok jay lajubal.

¹⁵Palta ay jun mac yajbil el yuj Dios, tol ok yetnej el juntzan tzet yetal. A cham Daniel, chekbej Dios yet payxa, a' alnejcan jun tu'. A mac chi ilon jun abix tu', nachajokab el yuj. A yet ok oc jun mactxel tu' yul templo Dios,

¹⁶a mac ayic' bay Judea, tokokab eb c'ubaj el ba bay tzalanlak.

¹⁷Axa mac ayajtok yiban pananil is na,*fn* yet ok oc elilal tu', manchakxa aytek yuj ul yionto wal eltek jabokxa tzet yetal yul na.

¹⁸Yetok eb ayic' xol is mulnajil, manchakxaokab meltzoj yintak toj yion is jokan pichil.

¹⁹A yet jun tiempoal tu', ok'bal c'ul eb ix yob ix, yetok eb ayto yune' chi yak' txutxwok.

²⁰Tewanek bay Dios tol manokab nabil k'inalok yet ok ex el tu', tamwal yet c'ual xewilalokab c'apaxok.

²¹Yujtol a jun miman yailal ok jay yet jun tiempoal tu', c'amto bay max ec' junelok axca tu' yecheltaxc'al max watx'nej Dios yulyibank'inal ti'. Tamwal ayto bay ok ec' junokxa axca tu'.

²²Ta c'am chi c'otxbaj Cham tiempoal yailal tu', c'am junok mactxel ok colchajcan el yul k'ab camich. Palta yujc'al is camc'ulal Cham yin eb sic'bilxa el yuj, xan ok c'otxbanej.

²³Ta ay mac chi alon ayex axca ti': Ilek wali, tix Cham Cristo ayic' cayti', ma: Ilek wali, tix ayic' bay tu', ta ẍi e yutelayi, man e cha e yabej.

²⁴Yujtol ay juntzan eb ok tz'ak yaloc ba Cristoal ok tx'oxaj ba, c'al juntzan eb ok tz'ak yaloc ba chekbejok Dios. Ok tz'ak tx'ox eb yechelej, c'al milagro, yuj yion aytek sat eb anima. Toltax a eb sic'bilxa el yuj Dios ijanxac'al ok ayc'ay eb yuj eb.

²⁵Ayokto, cax chi waloncan juntzan ti' ayex.

²⁶Yuj tu xin, ta ay eb ok alon axca ti' ayex: Ilabi, ayic' Cristo bay tz'inan tx'otx', ta ẍi eb, c'am chi toj e yila'. Ta ay eb chi alon pax axca ti': Ilabi, ayic' bay jun na tu', ta ẍi eb, man e cha e yabej.

²⁷Yujtol axq'uijan wal junok rayo pilan chi txecloj yuj bay masanil yulyibank'inal ti', chi txecloj bay chi ajol c'u, c'al bay chi tojcan c'u, caytu' ok yun txecloj in jay ayin Chekbilintek yuj Dios xol eb jet animail ti'.

²⁸Tzanc'al bay telancan ay is mimanil junok camnak, a tu' chi waj ba no ostoc.

²⁹A yet ok lajwok ec' jun miman yailal tu', ok k'ekk'olil yakan c'u, c'amxa c'apax sakk'inal xajaw. Axa waycan ok titc'ay satcan. Yetok juntzan tzet ay is yipalil bay satcan, ok tzicobtanelayok.

³⁰Catatu' bian, cax ok txecloj aj jun yechel bay satcan, yin tx'oxoni tol ayin Chekbilintek yuj Dios xol eb jet animail ti', in jayi. Axa anima bay junjun conob bay yulyibank'inal ti', ok ok' eb yet ok yilon eb in jay xol asun, yin miman wikbej c'al in mayk'ak'al.

³¹Ok xulay ch'en trompeta yin caw ipejal, axa in chekon eb wángel tu' cax ok ec' wajon aj eb eb sic'bil el wuj bay masanil yulyibank'inal ti'. Ok ec' ilay aj eb, masantac'al bay chi lajwi yulyibank'inal ti'.

³²Abek jun abix ok waltek yuj te higo. A yet chi uninbi k'ablak te', yet lananxa tit xak te', e yojtakxa tol toxa chi oc nabilk'inal.*fn*

³³Xan a yet ok e yilon yunen juntzan ti', nachajokab el e yuj, tol toxa chin jayi.

³⁴Wal yel chi wal ayex, mantoc'al cam anima ayic' yet jun tiempoal ti', cax ok yunen masanil juntzan chi wal ti'.

³⁵A satcan ti', c'al yulyibank'inal ti' ok lajwok; palta a in k'anej, maj ec' tzet chi yala'.

³⁶Palta c'am mac ojtaknej tzet c'ual, c'al jantak hora ok in jayok. Eb ángel bay satcan, man yojtakok eb. Ayin ti' C'ajol in Dios, palta man wojtakok, asan Cham Dios Mamej yojtak.

³⁷Axca tzet max uj yet jun tiempoal yet max ec' cham Noé, caytu' ok yun yet jun tiempoal yet ok in jay ayin Chekbilintek yuj Dios xol eb jet animail ti'.

³⁸Yujtol a yet c'amto chi jay jun miman aej mukwajwom tu', tok ay tzet chi na' anima; chi low eb, chi yuq'uen a' eb, laj yilen ba eb, c'al yaontok eb cutz'in alibejal, masantac'al yet jun c'u yet max octok cham Noé yul te arca.*fn*

³⁹Maj nachaj el jabok yuj eb, masantac'al max jay jun aej mukwajwom tu', cax max cam eb masanil. Axca wal max yun eb yet jun tiempoal tu', caytu' ok yun anima yet ok in jay tzac'naj ayin ti'.

⁴⁰K'inalok ta ay c'apax cawanok winak junej chi mulnaji, ay jun ok ilaytok, ay jun ok canok.

⁴¹K'inalok ay cawanok ix lanan cawni, jun ok ilaytok, jun ok canok.

⁴²Yuj tu', makwajanek, yujtol man e yojtakok jantak hora ok in jay ayin Yajaw in ti'.

⁴³K'inalok junok cham aj na tinani', ta yojtak jantak ak'bal chi jay junok elk'om, caw wal makbil yuj, cax c'am chi cha oc elk'om yul yatut.

⁴⁴Yuj tu xin, makwajanek, yujtol a yet man naanok el in jayubal e yuj, cax ok in jay lemnaj ayin Chekbilintek yuj Dios xol eb jet animail ti'.

⁴⁵K'inalok ay junok patrón yetok is moso. Ay junok yikem, jun ay is nabal, a ton jun tu' ok yaoc yopiso yin yilomalok yatut, yetok masanil tzet ay bay; palta ¿mactxel jun yikem tu' che na'?

⁴⁶A ton jun lanan mulnaj axca wal chi yochej cham patrón tu' yet ok jay junelxa. Caw watx' yet jun tu'.

⁴⁷Wal yel chi wal ayex, ok yaoc cham yin yajawil yiban masanil tzet ay cham.

⁴⁸Palta ta a jun moso tu' yob is nabal, chi na' tol maj jay cham patronej tu' yin aymanil,

⁴⁹yuj tu' chi c'oli michchaj oc yet mosejal mak'oni, chi ec' low yetok eb uq'uem an, cax chi uc'wi an yetok eb.

⁵⁰A yet man naanok jay is patrón tu' yuj, a ton yet tu' ok jayok.

⁵¹Axa yaon oc cham miman yailal yiban tu'. Ok yacantok cham yetok eb yet cabsatil. A bay tu' ok ok'ok, c'al natx'atx'i ye yuj yail.