Read Q'anjob'al Mt 25 Bible Online

Mt 25 - Q'anjob'al bible

Mt 25

¹Ok wal ayex, tzet ok yun yeloc eb anima, yet ok yak'on Cham aj satcan Yajawilal: A junel, ay lajonwan k'opoj ix. Max toj eb bay jun nupayil yet ak'balil, max yiontok eb is candil. Max bet eb chaon jay nak ok nupay tu'.*fn*

²Ay owan eb ix c'am wal is nabal, axa owanxa eb ix xin, aj nabal eb.

³A eb c'am wal nabal tu', c'amxa yaceite eb max yitok, asanc'al ch'an jab ayay yul is candil eb tu'.

⁴Axa pax eb ix jelan tu xin, maxto yi c'apaxtok eb ix yaceite yulak net.

⁵A nak ok nupay tu', caw max ec' hora jay nak. Yuj tu', max titaj wayan eb ix, axa wayaj eb ix masanil tu'.

⁶Palta chuman wal ak'bal, ay jun mac max awji bay eb: Ti wal chi jay nak ok nupayok. Asek chaek nak, ẍi bay eb ix.

⁷Axa yaj wan eb ix tu', max yaon oc eb ix k'ak'al candil.

⁸Axa yalon eb ix c'am is nabal tu' bay eb ix jelan axca ti': Ak'ek jabok jaceite e yetok co k'ana'. Ti wal chi tan co candil ti', ẍi eb bay eb.

⁹Maj jak'a'. Tatol chi jak' jabok e yet, maj mi yab jet, cax maj c'apax yab e yet. Asek e man jabok e yet bay chi txonlayi, ẍi pax eb ix.

¹⁰Yuj tu xin, max toj eb ix man jabok yet. Ay wal tok eb, max jaycan oc nak ok nupay tu'. A eb ix watx' yayji yetok is candil, max octok eb yetok nak bay nupayil tu', cax max makaycan puerta.

¹¹Axa yet max jayoc eb ix c'am wal is nabal tu', maxto awji octok eb: ¡Mamin, Mamin, jakon octok! ẍitowal eb.

¹²Palta max yalon eltek cham bay eb: C'amak. Wal yel chi wal ayex, man ex wojtakok, ẍi eltek cham bay eb.

¹³Yuj tu', chi wal ayex, makwajanek yujtol man e yojtakok tzet c'ual, c'al jantak hora ok in jayok, ẍi Jesús bay eb.

¹⁴Ok wal ayex, tzet ok yun yeloc eb anima, yet ok yak'on Cham aj satcan Yajawil. A junel, ay jun winak max toj bay junxa conob caw najat. A yet toxa wal chi toji, max yawtentek eb is moso c'atan, max yak'oncan juntzan is tumin yul k'ab eb.

¹⁵Ay jun nak bay max yak'can oyeb talento.*fn* Ay jun nak bay max yak'can cab talento. Ay jun nak bay max yak'can jun talento, atac'ala' bak'satil junjun max yilocok. Max lajwi tu xin, axa toj tu'.

¹⁶A nak mosejal max chaoncan ch'en oyeb talento tu', max yak' nak negocio yetok ch'en. Max yion nak oyebxa talento yetok ch'en.

¹⁷Ac'ala' c'apax nak max chaon ch'en cab talento, max yi c'apax nak cabxa talento yetok ch'en.

¹⁸Palta nak max chaon ch'en jun talento, max jot nak jun olan, cax max mukon nak ch'en.

¹⁹Payxatax tu', catatu' max jay cham is patrón eb tu', axa yion cham cuenta yetok eb yin ch'en tumin tu' yin junjunal.

²⁰A nak chanejcan ch'en oyeb talento tu', a nak babel max jay satak cham. Axa yak'oncan nak ch'en oyeb talento max yi yetok ch'en tu'. Max yalon nak bay is patrón tu' axca ti': Mamin, max ak'can oyeb talento ch'en tumin ti' ayin; palta tinani' xin, tix pax oyeb talento yune' ch'en max wi' ti', ẍi nak.

²¹Axa yalon cham patrón tu' bay nak axca ti': Watx' xin, caw watx' max ot mulnaj a ba ayin. Max ekej axca wal chi wochej. Yujtol yikem ach yin jab ti', yuj tu', xiwiltoc'al tzet ok wak' ayach, xan ak' tzaloj a c'ul wetok, ẍi cham bay nak mosejal tu'.

²²Max lajwi tu xin, max jayoc nak chanejcan ch'en cab talento. Max yalon nak bay is patrón tu' axca ti': Mamin, max ak'can cab talento ch'en a tumin ti' ayin; palta tinani xin, tix pax cab talento yune' ch'en max wi' ti', ẍi nak.

²³Axa yalon cham patronej tu' bay nak axca ti': Watx' xin, caw watx' max ot mulnaj a ba ayin. Max ekej axca wal chi wochej. Yujtol yikem ach yin jab ti', yuj tu', xiwiltoc'al tzet ok wak' ayach, xan ak' tzaloj a c'ul wetok, ẍi cham bay junxa is moso tu'.

²⁴Palta a yet max jayoc nak chanejcan ch'en jun talento satak cham xin, max yalon nak bay cham axca ti': Patrón, wojtak tol ch'aan ach. Cha jatx' tzet man awbilok oj. Toxac'al cha cha' tzet chi yi' junokxa anima yin is mulnajil.

²⁵Yuj tu xin, max in xiwaj ayach, max in mukon ch'en a tumin ti' yul tx'otx'. Tix ch'en a tumin ti' masanil xin, ẍi nak.

²⁶Axa yalon cham patrón tu' bay nak axca ti': Ach ti', mosejal achnaj yalbanil, palta c'am a watx'il. Caw isaj ach. Tutun tol ojtakxa tol chin jatx' bay tzet man awbilok wuj, cax chin chaon tzet chi yi' junokxa anima.

²⁷Yuj tu xin, matawal tol max atok ch'en in tumin ti' majanil, cax chin chaon pax ch'en yetok yune' yet chin jay ti', ẍi cham bay nak mosejal tu'.

²⁸Max lajwi tu xin, max yalon Cham bay juntzan eb ayic' bay tu': Iek ec' ch'en talento tu' bay nak. Ak'ek ch'en bay nak ay lajoneb talento yet tu'.

²⁹Yujtol a mac ay yet, ok ak'lay tz'akil bay, yet watx' chi aj can bay. Axa eb c'am wal yet, a jabok yet eb ayta'a, ok ilay ec' bay eb.

³⁰Axa nak mosejal c'am yopiso ti', chi toj e k'okcan eltok nak xol k'ekk'inal yina, bay ok ok'ok, c'al natx'atx'i ye yaben yail, ẍi Cham.

³¹Ayin Chekbilintek yuj Dios xol eb jet animail ti', ok in jay yetok eb wángel masanil, yetok in miman mayk'ak'al. Axa way chotan bay in despacho tu'. Catatu' ok txecloj elok tol caw miman welapnok.

³²Masanil anima bay junjun conoblak ok jayoc eb in satak. Axca junok nak ilom calnel chi pojil no calnel xol no chiwo, caytu' ok wut in pojon nan eb.

³³A eb axca tol in calnel yayji, ok can eb bay in watx' k'ab. Axa eb axca chiwo yayji, ok can eb bay in q'uexan.

³⁴Ayin rey in ti', ok wal bay eb ayic' bay in watx' k'ab axca ti': Ayex ti', albilcan ayex yuj in Mam, tol ok yak' is watx'c'ulal ayex. Ocanek wetok bay ok wak' yajawilal. Atax yet max watx'nen Dios yulyibank'inal ti', max watx'nencan jun ti' e yuj.

³⁵Yujtol a yet max tit in wajil, max in e yak' lowok. Max tit in takintial, max e yak'on tzet max wuq'uej. Max in ec'lej k'anoj posada, max e yak'on in posada bay e na.

³⁶Yet c'am in pichil, max e yak'on in pichil; yet ya' in ay, max quin ec' e yiloni. A yet ayin oc preso, max quin bet e yiloctok, quin chi, ok walon bay eb.

³⁷Axa eb watx' beybal satak Dios tu', ok tak'wok eb ayin axca ti': Mamin, ¿bak'ini wal ay a wajil max jila', c'al a takintial tu'? Tok ay tzet max jak' ayach.

³⁸¿Bak'ini wal max jilon ec' k'anoj posada tilak na, cax max jak'on a posada tu'? ¿Bak'ini wal c'amxa a pichil, cax max jak'on a pichil tu'?

³⁹¿Bak'ini wal ya' ach ay, ma bak'ini wal ayach oc preso, cax max ach bet jiloni? ẍi eb ayin.

⁴⁰Catatu' bian, ok walon bay eb axca ti': Wal yel chi wal ayex, a yet max e yak'on juntzan watx'c'ulal ti' bay eb wuẍtak c'al bay eb wanab, caxc'al bay eb c'am yelapnok, palta chi yal elapnok tol a ayin max e yunej, quin chi, ok walon bay eb.

⁴¹Ok lajwok tu xin, cax ok walon bay eb ayic' bay in q'uexan: Elanek ayex ti' in c'atan, tol catabnebil ex. Asek can xol jun k'ak' c'am bak'in chi tani, bay jun lugar watx'nebilcan yuj Dios, bay ok tokcan nak diablo yetok eb yángel.

⁴²Yujtol a yet max tit in wajil, maj in e yak' low jabok. Yet max tit in takintial, maj e yak' jabok tzet max wuq'uej.

⁴³Max in ec'lej k'anoj posada, maj e yak' in posada. A yet c'am in pichil, c'am jabok in pichil max e yak'a'. Yetok c'apax yet ya' in ay, c'al yet ayin oc preso, maj in bet e yil jabok, quin chi, ok walon bay eb.

⁴⁴Axa yalon eb ayin axca ti': Mamin, ¿bak'ini wal ay a wajil max jila' ma a takintial tu', yetok yet max ach ec' k'anoj posada, c'al yet c'am a pichil, c'al yet ya' ach ay tu', c'al yet preso ayji? ¿Tom ay bay maj on colwaj ayach xin? ẍi eb ayin.

⁴⁵Palta ok wal bay eb axca ti': Wal yel chi wal ayex, a yet maj ex colwaj bay eb wuẍtak tu', c'al bay eb wanab tu', caxc'al c'am yelapnok eb, palta chi yal elapnok tol a' ayin maj ex colwajok, quin chi, ok walon bay eb.

⁴⁶A eb tu', ok tok eb bay yailal yin tojbalk'inal, axa eb watx' is beybal satak Dios xin, ok cha eb k'inalej tol ayc'al yin tojbalk'inal, ẍi Jesús bay eb.