Read Q'anjob'al Mt 28 Bible Online

Mt 28 - Q'anjob'al bible

Mt 28

¹A yet max ec'can c'ual xewilal, cax max sakbi aj yet domingo yet babel c'ual semana, max toj María aj Magdala, yetok junxa María bay max bet ak'laycan is mimanil Jesús.

²A yet lanan toj eb tu', max ec' jun quixcab caw ow, max ayol jun yángel Cham Yajaw bay satcan, cax max apni oc bay mukan Jesús. Max balon el ch'en makilej, cax max ay chotan yiban ch'en.

³Caw wal chi tzekeki yili axca rayo, cax sak is pichil axca sak bacom.

⁴A yet max yilon eb soldado ayic' taynen ch'en ch'en tu', max luklun aj eb yuj xiwilal. Max telc'ojtok eb, axca tol max camil eb.

⁵Axa yalon jun ángel tu' bay eb ix axca ti': —Manchak ex xiwi. Wojtak tol a is mimanil Jesús, Cham max curusnelayi, a' chi ul e yila'.

⁶C'amxa ec' Cham cayti'. Mayal ictzonelay aj Cham, axca max yut yalon ayex. Titanek tonabi, cax che yilon bay max ec'lej Cham.

⁷Chi lajwi tu', chex toj yin ayman, chi toj e yalon bay eb max ec'lej cuywok yintak, tol mayal ictzonelay aj xol eb camnak. Ok babjok yapni Cham e satak bay Galilea. Ok e yil yin bay tu'. A juntzan ti' chi ul wal ayex, ẍi jun ángel tu' bay eb ix.

⁸Axa yel eb ix bay ch'en mukbanil tu' yin aymanil; max toj yalon eb bay eb cuywom Jesús. Max xiw eb, palta caw max tzaloj c'apax eb.

⁹Lananto toj wal eb, max tx'oxon aj ba Jesús bay eb, max yak'on cawil c'ul eb, cax max jitzonxac'altok ba eb c'atan. Max yion ay ba eb bay, cax max oc lak'naj eb yin yakan.

¹⁰Max yalon Cham bay eb: —Manchak ex xiwi. Asek, alek bay eb in cuywom tol chi toj eb bay Galilea. A bay tu' ok yil eb win, ẍi bay eb.

¹¹Lananto wal toj eb xal ix tu xin, max meltzoj jaywan eb soldado chi taynen ch'en ch'en tu', bay conob. Max apni eb bay eb yajawil sacerdote, pilan max bet yal eb tzet max uji.

¹²Max lajwi yaben eb masanil tzet max uj tu', max toj eb lajtinen ba yetok eb ichamtak winak ay yikbej, yuj yak'on eb mimanok tumin bay eb soldado tu'.

¹³Xan max yal eb bay eb: —Caytu' ok e yut e yalon axca ti': Lanan co way yet ak'balil, max ul yiontok eb cuywom is mimanil tu', quex chi.

¹⁴Ta chi yabaj cham yajaw jun ti', c'am e pena, okxa co montej cham ayon ti', yet watx' c'am tzet chi elol e yiban, ẍi eb bay eb.

¹⁵Axa chaon eb soldado ch'en tumin tu'. Max ec' yalon el eb axca max yun yal-lay bay eb tu', xan a jun lek'tial k'anej ti', chitoc'al yal eb israel tinani'.

¹⁶Max toj eb cuywom Jesús yusluc'wanil bay Galilea. A bay jun tzalan max yalcan Cham bay eb, a tu' max apni eb.

¹⁷A bay tu' max yil eb yin Cham. Max yion ay ba eb bay; palta ay jun cawan eb maj yaoc yin c'ul.

¹⁸Max jitztek ba Jesús c'atan eb yusluc'wanil, max yalon bay eb: —Max ak'lay wikbej yiban masanil tzet ay bay satcan, c'al yiban masanil tzet ay bay yulyibank'inal ti'.

¹⁹Yuj tu xin, asek cuywaj xolak anima bay junjun conob, yet watx' ok oc eb in cuywomok. Che yak'can bautizar eb yin bi Dios Mamej, yin in bi ayin Dios C'ajolej in ti', c'al yin bi Dios Espíritu Santo.

²⁰Che cuycan eb, yet watx' masanil tzet max walcan ayex, ok yikej eb. Ojtaknejek el sic'libil, tol ayinc'al ec' e yetok masantac'al ok jay lajubal, ẍi Jesús bay eb.