Read Q'anjob'al Mt 3 Bible Online

Mt 3 - Q'anjob'al bible

Mt 3

¹A yet ayto ec' eb bay Galilea tu', max toj Juan cham ak'om bautismo, bay jun tz'inan tx'otx' yul yet Judea. Max c'oli yalon k'anej Dios bay eb anima max apni oc abxalwok bay.

²Max yal bay eb axca ti': Naek e ba yin e yobtakil, yujtol a Cham Yajaw bay satcan, toxa ok txecloj wal aj is yikbej, ẍi.

³A ton Juan ti' max al-lay yin ayokto yuj cham chekbej Dios chi yik Isaías, yet max yaloncan axca ti' yul tx'an Un Tz'ibbilcanok: Ay jun mactxel bay tz'inan tx'otx' chi awji, chi yalon axca ti': Watx'nejek junok is be Cham Yajaw, t'inek junok be bay Cham, caytu' yaloni, ẍi yul tx'an Un Tz'ibbilcanok.

⁴A pichil Juan tu' ayocok, xil camello chembil, cax tz'um ayoc is c'alilok. A jun makan no tzac' chi chiji chi chi', cax yichlakteal yalcab chi yuq'uej.

⁵Axa eb aj Jerusalén, yetok eb aj Judea, c'al jantak eb cajan tilak a' Jordán, chi bet eb abxalwok bay cham.

⁶Chi jakil eb is yobtakil bay Dios, cax chi ak'laycan bautizar eb yuj Juan bay yul a' Jordán tu'.

⁷Xiwil eb fariseo, yetok eb saduceo chi jayoc bay cham, yuj ul yak'lay bautizar eb yuj, palta max yal cham bay eb axca ti': Ayex ti' caw wal jelan ex yin ioj aytek satej, axca no labaj. ¿Mac max alon ayex tol chi je' e colon el e ba bay jun miman yailal ok jay e yiban yuj yowal c'ul Dios?

⁸Ta chi na ba e c'ul yin e yobtakil, yowalil watx' che yut e beybal, yet watx' chi txecloj elok tol yel, mayal e na e ba.

⁹Man e yal axca ti': C'am tzet chi co na', yinatil on Abraham, man quex chiok. Yujtol chi wal ayex, k'inalok ta chi yal c'ul Dios, chi je' yuten oc juntzan ch'en ti' animail, cax chi oc yinatilok Abraham e q'uexelok.

¹⁰A jun miman yailal ok jayok, lajan axca junok winak watx'xa yayji yetok yechej yich junok te' yet chi k'akon ajok. Masanil te te' man watx'ok sat chi yak'a', chi tzoc'ajok cax chi yak'on tz'a'ok.

¹¹Ayin ti', chex wak' bautizar yul a', yuj txecloj elok tol yel wali, mayal na ba e c'ul. Palta ay wal junxa mactxel tzakan jay wintak, a' ok ak'on Espíritu Santo ayex, ma k'ak' ok yak' ayex xin, axca tol ok ex ak'lay bautizar yuj. A jun mactxel chi wal tu', yelxac'al miman yelapnok wintak. Yuj tu' xan man in mojok wak'on serbil, tamwal wion oc is xanab, man in mojok.

¹²A jun mactxel chi wal tu', lajan yetok junok winak chi txayej is trigo yuj yioncan el ixim yakanej xol ixim bak'ej. Chi c'ubajcantok ixim bak'ej bay is c'una', axa ixim yakanej, chi yak' tz'a xol jun k'ak' c'am oxlajon bak'in chi tani, ẍi Juan tu' bay eb.

¹³A yet jun tiempoal tu', petoj Jesús bay Galilea, cax max jay bay Juan yet ayic' bay ti a' Jordán, yuj ul k'anon is bautismo bay.

¹⁴Yet babelal maj yal c'ul Juan max yak' bautizar. A ti yet, max yal bay Jesús axca ti': —In moj ayin ti' chin ak' bautizar, achxalaj chochej chach wak' bautizar, ẍi Juan tu' bay.

¹⁵Axa yalon Jesús bay axca ti': —Manchak a ten tinani', yujtol moj jiken masanil tzet chi yal Dios, ẍi bay. Axa yiken Juan tu'.

¹⁶Maxc'al lajwi yak'lay bautizar Jesús cax max ajtek yul a'. Yet wal jun bek tu', max jakchaj satcan max yila'. Axa max yiloni, max ayol Yespíritu Dios yiban axca junok no paloma.

¹⁷Cax max ablay yoc jay belan k'anej ti' bay satcan: A ton jun in C'ajol ti' camc'ulnebil wuj, caw chin tzaloj yetok, ẍi.