Read Q'anjob'al Mt 4 Bible Online

Mt 4 - Q'anjob'al bible

Mt 4

¹Cax max ilaytok Jesús yuj Yespíritu Dios bay jun tz'inan tx'otx', yet chi yak'lej nak diablo yikban Cham yin yobtakil.

²C'am tzet max lo' Cham yin cawinak c'ual, c'al cawinak ak'bal. Lajwi tu' max tit is wajil.

³Axa yapni oc nak diablo tu' bay, yuj yak'len yikban Cham yin yobtakil, cax max yaloni: —Tutun tol C'ajol ach Dios, xan al bay juntzan ch'en ti', tol chi oc ch'en yin lojal, ẍi bay Jesús.

⁴Axa tak'wi Jesús, max yaloni: —Chi yal yul tx'an Un Tz'ibbilcan axca ti': Man asannejok yuj loj chi je' jiquisbi; palta chi je' c'apax jiquisbi yuj masanil k'anej chi yal Dios, ẍi yul tx'an Un Tz'ibbilcan tu', ẍi Cham bay.

⁵Max lajwi tu xin, cax max ilaytok yuj nak diablo bay jun conob tol asan Dios ay yet, a ton conob Jerusalén, cax max ilay ajtok yuj bay chon templo.

⁶Max yalon nak bay axca ti': —Tutun tol C'ajol ach Dios, xan k'okto wal aytok a ba cayti', yujtol chi yalcan yul tx'an Un Tz'ibbilcan axca ti': Ok chektek Dios eb is yángel yet watx' chach taynelayi. Ok ach quetzlay aj yuj eb, yet watx' c'am cha chipil akan yin ch'en, ẍi yul tx'an Un tu', ẍi nak tu' bay Cham.

⁷Axa tak'wi Jesús axca ti': —Palta chi yal c'apax yul tx'an Un Tz'ibbilcan tu' axca ti': Manchak e yak' porobal, Cham Jajawil co Diosal, ẍi yul tx'an Un, ẍi Jesús bay.

⁸Axa yilaytok yuj nak diablo tu' bay chon jun tzalan caw wal can ayajok, cax max c'oli tx'oxontok nak bay Cham masanil mimek conoblak yulyibank'inal ti', c'al tzetak mimek yelapnok bay junjun conob tu'.

⁹Max lajwi tu xin, max yalon nak bay Cham axca ti': —Masanil juntzan chin tx'oxtok ayach ti', ok wak' ayach, ta chach ay jajan ayin, cax chalon a ba ayin, ẍi bay.

¹⁰Axa yalon Jesús bay axca ti bian: —Ach Satanás, elan in c'atan, yujtol chi yal yul tx'an Un Tz'ibbilcan axca ti': Iek ay e ba bay Cham Jajawil co Diosal. Asan Cham che yak' serbil, ẍi tx'an, ẍi Jesús bay.

¹¹Axa yel Satanás tu' c'atan Jesús, cax max toji, cax max jayoc eb ángel ul yak'on serbil Cham.

¹²A yet max yaben Jesús tol ayoc Juan yul preso, cax max toj bay Galilea.

¹³Majxa cajay bay Nazaret, palta axa bay Capernaum max cajayi. A jun conob tu' a bay ti a' mar ay. Bay tilak tx'otx' yet Zabulón, c'al tx'otx' yet Neftalí, a tu' ay.

¹⁴Axca ton ti' max uji, yuj yunen el tzet max yal cham chekbej Dios chi yik Isaías, tol max yal axca ti':

¹⁵A ti a' mar ay tx'otx' yet Zabulón c'al tx'otx' yet Neftalí,*fn* bay k'axepal ec' a' miman Jordán: A bay tu' ay jun conob chi yik Galilea, junej ay yetok eb man israelok.

¹⁶A jun conob tu' cajan xol k'ekk'inal, ok yil jun miman sakk'inal; ok chaw jun sakk'inal tu' bay eb cajan ec' xol k'ekk'inal tol ay is may, ẍi tx'an Un Tz'ibbilcanok.

¹⁷Maxc'al apni oc Jesús bay jun lugar tu xin, cax max c'oli yalon el k'anej Dios bay eb anima, max yalon bay eb axca ti': Naek e ba yin e yobtakil, yujtol a Cham Yajaw bay satcan, toxa ok txecloj wal aj is yikbej, ẍi bay eb.

¹⁸Lanan yec'jab Jesús ti a' mar bay Galilea, cax max yilon yin Simón, cham chi yik Pedro yetok jun yuẍtak chi yik Andrés. Lanan txaywi eb bay tu', yujtol txaywom eb.

¹⁹Axa yalon Jesús bay eb axca ti': —Tzaklojanek cuywok wintak, cax ok wak'on e yopiso. Axca che yut e mitx'on no txay ti', caytu' ok e yut e yiontek eb anima ayin, ẍi Cham bay eb.

²⁰Max bekxac'al can eb is txim yet jun bek tu'. Yuj cuywi eb, xan max tzakloj eb yintak.

²¹Max beytoj janic'xa, axa max yilon yin cawanxa yuẍtak c'apax ba, a ton Jacobo yetok Juan, eb c'ajol Zebedeo. Ayoc eb yul barco yetok is mam. Lanan sayon yil eb is txim, yet max awtelay eb yuj Jesús.

²²Yet-xac'al c'apax jun bek tu', max bekcan eb is barco c'al is mam eb tu', cax max oc eb cuywomok Jesús.

²³Bay masanil yulak yet Galilea max ec' Jesús yetok eb. Max ec' Cham cuywaj yulak nail bay chi wajbaj ba eb israel yin culto, cax chi yaloncan el watx' abix, tzetbil chi yun yoc eb yul k'ab Cham aj satcan. Max jaycan c'ul masanil mactxel ya'ay yuj tzanc'al tzet ilya'il yuj Cham.

²⁴Masanil anima yul yet Siria max aben k'umal Jesús, xan max yi jay eb eb ya'ay yuj tzanc'al tzet ilya'il bay Cham. Yetok eb ayoc espíritu yob yin, yetok eb chabil oybinak sat yuj, c'al eb sicbinak el is mimanil, max ilaytek eb masanil bay, cax max jaycan c'ul eb masanil yuj.

²⁵Xiwil anima aj Galilea max tzakloj yintak Cham, c'al eb aj Decápolis, eb aj Jerusalén, c'al eb aj Judea, yetok eb aj k'axepaltok a' Jordán.