Read Q'anjob'al Mt 5 Bible Online

Mt 5 - Q'anjob'al bible

Mt 5

¹Axa yet max yilon Jesús jun miman bulan anima, max ajtok bay jun tzalan, cax max ay chotan bay tu', axa yapni oc eb is cuywom tu' is c'atan.

²Max c'oli cuywaj bay eb axca ti':

³A eb chi yojtaknej el ba tol man watx'ok eb yul yet satak Dios, caw watx' yet eb, yujtol ayxa oc eb yul k'ab Cham aj satcan.

⁴A eb chi cus is c'ul yuj yobtakil, caw watx' yet eb, yujtol ok mimanc'ulnelay eb yuj Dios.

⁵A eb yaynakil chi yut ba, caw watx' yet eb, yujtol ok yi' eb jun lugar max yalcan Dios.

⁶A eb chi yochej chi watx'nej oc is beybal wal yin masanil is c'ul, caw watx' yet eb, yujtol ok oc Dios yetok eb yin watx'ji oc beybal eb.

⁷A eb chi ok' c'ul yin yet animail, caw watx' yet eb, yujtol axa Dios ok ok' pax c'ul yin eb.

⁸A eb junxanej yayji is nabal yin yet Dios, caw watx' yet eb, yujtol ok ayjok ec' eb yetok Cham.

⁹A eb ak'om tan owal, caw watx' yet eb, yujtol ok al-lay eb yuninalok Dios.

¹⁰A eb chi yil yailal, yujc'al tol watx' is beybal, caw watx' yet eb, yujtol ayxa oc eb yul k'ab Cham aj satcan.

¹¹Axa pax ex xin, ta wujc'al chex tx'emlayi, ta wujc'al chex bajlayi, cax chi nalay aj k'anej e yin, caw watx' e yet.

¹²Tzalojanek sic'libil, yujtol caw miman watx'ilal ok e cha' is paktzilok bay satcan. Axca wal chi yun e yilon yailal ti', cay wal tu' max yun yilon eb chekbej Dios yailal yet payxa.

¹³Axca atz'am atz'am chi watx'nen oc tzet chi loji, cayex tu yulyibank'inal ti'. K'inalok ta chi c'ay c'achial jabok atz'am atz'am, ¿tzetto wal ok yun c'achibi junelxa? C'amxa yopiso. Toxac'al chi k'oklay elok, cax chi tec'laytok yuj anima.

¹⁴Axca junok tzektebal, cayex tu' bay yulyibank'inal ti'. K'inalok ta ay junok conob ayajtok chon junok tzalan, caw miman txequel sic'libil.

¹⁵A yet chi co tzekon co tzektebal, tokwal a yalan junok cajón chi jaoctok, palta a yiban serbil chi jajtok, yet watx' chi tzektenelay masanil eb ayic' yul na yuj.

¹⁶Axca junok tzektebal, cayexokab tu xin, txeclojokab e sakk'inal satak anima, chi yal yelapnok, e watx' beybal, yet watx' chi yal eb watx' k'anej yin co Mam Dios ayic' bay satcan.

¹⁷Xe na talaji tol yuj ul wuchon lajwok ley Moisés, c'al juntzan cuybanilej max yak' eb chekbej Dios yet payxa, xan max quin jayi. C'amak. Palta yuj ul in watx'nen ocok, xan chin jayi.

¹⁸Wal yel chi wal ayex, tol yowalil ok yun masanil tzet tz'ibbilcan yul tx'an ley tu'. Yet aytoc'al ec' yulyibank'inal ti', c'al satcan, tamwal jabok tzet yul tx'an Un Tz'ibbilcan tu' tol man ok yunej. Tamwal junok letra, tamwal junok punto, tol ok ec' tzet chi yala', masantac'al ok yun masanil tzet tz'ibbilcan tu'.

¹⁹Ay juntzan chekbanil yul tx'an ley tol txennej yelapnok chi jila'; palta a mactxel tol c'am chi iken masanil, cax chi yak'on c'apax yun anima, yet watx' c'am chi yikej c'apax eb, a ton jun mactxel tu', yaynakil yelapnok xol eb ayoc yul k'ab Cham aj satcan. A pax eb chi iken masanil tzet chi yal ley tu xin, cax chi yalon c'apax eb bay anima yet watx' chi yikej c'apax eb, a ton eb tu' miman yelapnok xol eb ayxa oc yul k'ab Cham.

²⁰Yuj tu xan chi wal ayex, tol yowalil watx' che yut e beybal yintak beybal eb meẍtol yin ley Moisés, c'al eb fariseo. Ta c'amak, majc'alta' je' e yoc yul k'ab Cham aj satcan.

²¹Ay bay max jab tzet albilcan bay eb jichmam yet payxa, bay chi yal axca ti': Man e mak' cam e yet animail. Tzanc'al mactxel chi mak' cam junok yet animail, yowalil chi ilaytok satak ley, cax chi beyc'ulnelayi, ẍi.

²²Palta ayinxa chi wal ayex, tzanc'al mactxel chi chichon oc c'ul yin junok yet animail, yowalil ok beyc'ulnelayok. Tzanc'al mactxel chi buchil junok yet animail, ok beyc'ulnelay yuj eb sat yajaw. Tzanc'al mactxel chi bajil junok yet animail, ay is may chi tojcan infierno, bay xol k'ak'ej.

²³Yuj tu xin, ta lanan e toj e yak'on tz'a e yofrenda, cax chi tit yul e c'ul tol ay junok mactxel bay max oc e mul,

²⁴batxbajekcan ay e yofrenda tu' yich altar, cax chi toj e watx'nen yayji e cusc'ulal yetok jun mactxel tu'. Chi lajwi tu xin, chex jayi, cax che yak'on e yofrenda.

²⁵K'inalok ta ay junok mactxel chex awten satak juzgado yuj junok k'anej, ak'ek e yip e watx'nen jun k'anej tu' yulak be yetok, cax c'am chex ilaytok satak yajaw yuj. Yujtol ta mayal ex apni satak yajaw, axa cham yajaw tu' chex aon oc yul k'ab eb policía, axa e tojcan preso tu'.

²⁶Wal yel chi wal ayex, tol maj ex bekchaj preso tu', ta man tz'akanok che tojlanej e multa.

²⁷Ay bay max jab tzet albilcan yul ley Dios, bay chi yal axca ti': Manchak e yaoc e mul yul k'ab e yetbi junjun ex, ẍi.

²⁸Palta ayinxa chi wal ayex: Tzanc'al mac winakil chi ilon oc junok ix ix yuj yochen ocok, mayal mulji yul is c'ul yin ix.

²⁹K'inalok ayex chex ak'lay ayc'ay yin yobtakil yuj e bak' sat bay e watx', cax chi etax el e nabal, yelxac'al watx' tol che yiiltek jun e bak' sat tu', cax che k'okon elok. Yujtol yelxac'al watx' ta a junok yetbeyom e mimanil c'am, yintak pax tol masanil e mimanil chi k'oklaytok bay infierno.

³⁰K'inalok ta ayex, a e watx' k'ab chex ak'on ayc'ayok, cax chi etax el e nabal, yelxac'al watx' tol che tzoq'uil jun e k'ab tu', cax che k'okon elok. Yujtol watx' e yet ta junnej yetbeyom e mimanil c'am, yintak pax tol masanil e mimanil chi k'oklaytok bay infierno.

³¹Albil c'apaxcan junxa ti' yet payxa tu': A mac chi pojlej ba yetok yistzil, yowalil chi watx'nej junok tx'an yunal pojlejbail, cax chi yak'oncan nak tx'an bay ix, ẍi.

³²Palta ayin chi wal ayex: Ta ay junok mactxel chi pojlej ba yetok yistzil, palta c'am pax mul ix ix tu' chi yaoc yul k'ab yichamil tu', ti wal a yichamil tu' chi aontok ix yin mul bian. Yetok c'apaxok, ta ay junok mactxel chi ion ix max pojlej ba yetok yichamil tu', mul chi yunej.

³³Ay bay max jab tzet max al-laycan bay eb jichmam yet payxa, bay chi yal axca ti': Ta che locbajtek bi Cham Jajawil yet che yak'on e ti' yin junok tzet yetal, yowalil che yak' yun tzet che yal tu', ẍi.

³⁴Palta ayin chi wal ayex: C'amokab bak'in che loctek junok tzanc'al tzet biejal. Maj je' e locontek bi satcan, yujtol a tu' chotan ay Dios yak'on yajawil.

³⁵Yetok c'apax sat tx'otx' ti', maj je' e locban bi, yujtol axca tol batxlub yakan Dios yayji. Yetok c'apax conob Jerusalén, maj je' e locban bi, yujtol is conob Cham Rey miman yelapnok.

³⁶Tamwal e jolom, c'am chi je' che locbajtek. Iltax c'am chi je' e yuj e yak'on sakbok ma e yak'on k'ekbok junok xil e jolom.

³⁷A yet chex k'anjab xin, Ja', quex chi, ma C'amak, quex chi. Maj je' e locontek tzanc'al tzet biejal, yujtol a bay nak diablo chi tit juntzan ti'.

³⁸Ay bay max jab tzet albilcan yet payxa, tol chi yal axca ti': Ta ay mac chi mak' poj bak' sat yet animail, mak'layokab c'apax poj yet. Ta ay mac chi mak'on eltek ye yet animail, mak'layokab c'apax eltek yet, ẍi.

³⁹Palta ayin chi wal ayex: Manchak e lajbaj yobc'ulal e yet animail. A ti e yet, ta ay mac chi mak'ontok jun pac'ok e sat, acbajektok jun pac'xa bay.

⁴⁰Ta ay mac chi yochej chi tok'on ec' e camiẍ satak ley, bekek c'apaxtok e jokan pichil bay.

⁴¹Yetok c'apaxok, ta ay mactxel chex tenon oc yalan yikatz, yuj toj e yak'oncan yulak be nanok legua, as ak'ekcan junok legua bay.*fn*

⁴²Tzanc'al mactxel chi k'anon majanej junok tzet yetal ayex, ak'ek bay, cax manchak e basnej.

⁴³Ay bay max jab tzet albilcan yet payxa, tol chi yal axca ti': A eb watx' e yak'on yetok, camc'ulnejek eb. Axa eb yob e yak'on yetok xin, chichonokab oc e c'ul yin eb, ẍi.

⁴⁴Palta ayin chi wal ayex: Yowalil che camc'ulnej eb ajc'ul oc e yin c'al e txajli yuj eb chex etneni.

⁴⁵Axca ton ti' ok e yut e tx'oxon elok tol yuninal ex co Mam ayic' satcan. Yujtol a co Mam tu', chi yak' ajol c'u yiban eb yob c'al yiban eb watx'. Yetok c'apaxok, chi yaay nab yiban eb yob is nabal, yetok c'apax yiban eb watx' is nabal.

⁴⁶Ta asan ch'an eb chex camc'ulneni ok e camc'ulnej paxok, ¿xin ta ok e cha' is paktzil jun e camc'ulal tu' che na'? Toltax eb tekomel tojlabal, cayton tu' chi beybalnej eb.

⁴⁷Yetok c'apaxok, ta asannej yetok eb e watx'il anima bay watx' e k'anjabi, ¿xin ta watx' che na'? Toltax eb manto ojtaknenok Dios, cay c'apax tu' beybal eb.

⁴⁸Tz'akakiokab che beybalnej masanil tzet yetal watx' xin, axca co Mam ayic' bay satcan, tz'akan yin masanil tzet yetal watx'.