Read Q'anjob'al Mt 6 Bible Online

Mt 6 - Q'anjob'al bible

Mt 6

¹Xe yil c'al e ba, manokab asannejok satak eb anima, watx' che yut e ba. Ta asannej satak eb watx' che yut e ba, c'am jabok paktzil ok e cha' bay co Mam ayic' bay satcan.

²Yuj tu xin, a yet che yak'on jabok e sabal bay junok meba', manchak e yalil xol anima axca chi yut ba eb cabsat. Yujtol a eb tu', chi tx'oxxac'al el eb yulak nail wajayil yin culto, c'al yulak calle, yet watx' chi al-lay eb watx'il. Wal yel chi wal ayex, a watx' k'anej chi al-lay yin eb tu', a chi oc is paktzilok.

³A pax ex xin, aokab yet che yak'on jabok tzet yetal bay eb meba', maj je' e yalon bay anima. Caxc'al a bay mac yelxac'al watx' e yak'on yetok, maj je' e yalon bay.

⁴Ak'ek e sabal tu' yin ewantakil. Caxc'al yin ewantakil che yak'a', palta chi yil co Mam Dios, xan ok paktzej ayex.

⁵A yet chex txajli, manchak e yut e ba axca eb cabsat, yujtol a eb cabsat tu', caw chi cha' c'ul eb txajli yulak nail wajayil yin culto, c'al bay chi waj ba eb anima, yet watx' chi al-lay eb watx'il yuj anima. Wal yel chi wal ayex, tol a ton watx' k'anej chi al-lay yin eb tu' chi oc is paktzilok eb.

⁶Palta ayex ti xin, a yet chex txajli, ocanektok yul e na, che makchej e puerta, cax chex txajli bay co Mam Dios, Cham ayic' e yetok. Caxc'al c'am mac chi ilon e txajli, ok yabc'alta' Cham, cax ok paktzen Cham e txaj tu'.

⁷A yet chex txajli tu', manokab ac'alokc'al tzet che yalubtanej, axca eb manto ojtaknenok Dios. Yujtol a eb tu', a naon eb tol yuj miman chi yut eb yakan is txaj, xan ok ablay eb yuj Dios.

⁸Yuj tu xan manchak e yut e ba axca eb tu xin, yujtol yojtakxa co Mam Dios tzet caw yowalil chi oc e yuj, yet mantoc'al e k'an bay.

⁹Yuj tu xin, caytu' che yut txajlok e ba axca ti': Ach co Mam, tol ay ach ec' bay satcan, mimanokab yelapnok a bi.

¹⁰Jayan ul ak'on yajawilal cayti'. Axcaokab yunen ochwan bay satcan tu', cayokab tu' yunen sat tx'otx' ti'.

¹¹Ak' co lobej ok co lo' junjun c'u co k'ana'.

¹²Ak' tan co yobtakil, axca ayon ti' chi jak' mimanc'ulal yin eb ay tzet chon uteni.

¹³Manchak on a cha' ikbelaytok yin yobtakil, cax chon a colon c'apax el yul k'ab jun yajawil yobtakil,*fn* quex chi.

¹⁴Ta che joc'ay yin e c'ul yobtakil eb ay tzet chex uteni, cax ok ak'lay tan e yobtakil yuj co Mam ayic' bay satcan.

¹⁵Palta ta c'am che joc'ay xin, maj yak' c'apax tan co Mam Dios e yobtakil.

¹⁶A yet chex oc yin c'ajbanc'ulal, manchak e yut e ba axca eb cabsat. Yujtol a eb tu', cusiltakxac'al chi yut eb sat, yet watx' chi txecloj el satak anima tol aynaj oc eb yin c'ajbanc'ulal. Wal yel chi wal ayex, tol a ton yuj chi il-lay eb yuj eb anima tu', a ton chi oc is paktzilok eb, xan c'amxa paktzil eb ok cha' bay Dios.

¹⁷Palta ayex ti xin, a yet chex oc yin c'ajbanc'ulal, mixnajanek, cax che ch'ichontok e xil,

¹⁸yet watx' c'am chi nachaj el yuj anima ta ayex oc yin c'ajbanc'ulal. Axca tu xin, asan co Mam Dios ojtaknej tol ay ex oc yin c'ajbanc'ulal, ok paktzej Cham e c'ajbanc'ulal tu'.

¹⁹Manchak e wajbaj e beyomal yulyibank'inal ti', yujtol chi ijbitok, chi k'uxbitok, ma chi toj yuj elk'om.

²⁰Yelxac'al watx' tol a bay satcan che wajbaj e beyomal. A bay satcan tu', c'am chi oc yijal, c'am chi k'uxbitok, c'amxa c'apax elk'om chi elk'anentok.

²¹Yujtol a bay chi co wajbaj co beyomal, a tu' chi ja c'apaxtok co nabal.

²²A co bak' sat, axca tol is tzektebal co mimanil yayji ocok. Yuj tu xin, ta junnej tzet bay ayoc co sat, sakk'inal on chi yal tu', cax watx'c'al tzet chi el junun yetok co mimanil.

²³Palta ta ay ex tx'ok tx'ok bay che yaoc e sat xin, chex cancan xol k'ekk'inal yuj. A e sakk'inalil tu', ta chi q'uexpoj oc yin k'ekk'inalil, ok ex canxac'al xol k'ekk'inal.

²⁴C'am junok mactxel chi je' jun lajanc'al yak'on serbil cawanok patrón, yujtol chi mi yajc'ulnej ba yetok junok, cax chi camc'ulnen ba yetok junokxa. Ay mi junok ay yelapnok yul sat, axa junokxa c'am mi yelapnok yul sat. Yuj tu' xan c'am chi je' tol jun lajan co camc'ulnen jak'on serbil Dios c'al co camc'ulnen ch'en tumin.

²⁵Yuj tu xan chi wal ayex, tol manchak ex oc il yuj e cawil cayti', yuj e lobej c'al yuj e pichil. Ta chi yak' Dios e cawil, ¿tom ato wal e lobej man ok yak'a'? Ta max yak' Dios e mimanil, ¿tom ato wal e pichil man ok yak'a'?

²⁶Ilab no tz'iquin, c'am yawoj no', c'am jatx'oj no'. Tok ay tzet chi wajbajcan no', palta a co Mam Dios ay bay satcan chi ak'on lobej no'. Iltax chi yak' lobej no tz'iquin tu', akxam wal ayex ti' tol miman e yelapnok yintak no' yul sat Cham.

²⁷Tok ay junok ex chi je' e yaon oc nanokxa vara tz'akil e tel yujc'al chex oc il.

²⁸Yetok c'apaxok, ¿tzet xan chex oc il yuj e pichil? Iek e nabal yin an xumaquil ac'un tinani'. A an xumac tu', c'am chi mulnaj an, tamwal chi tx'alwi c'apax an.

²⁹Palta chi wal ayex, tol caxc'al xiwil watx'il yili pichil cham rey Salomón max yaocok, palta majc'alta' apnok yili axca an xumac tu'.

³⁰Iltax wal xiwil watx'il yili an xumac tu' yuj Dios. Tol watx' yili an tinani'; axa yecal xin, chi takilok, axa yet taknakxa elok, cax chi tz'a'i, ¿tom ayexto wal, man ok ex pichlay yuj Cham? ex c'am wal che yaoc Dios yin e c'ul.

³¹Yuj tu xin, xan manchak ex oc il, cax chex alxi aj yuj e lobej e yuc'a', tamwal yuj e pichil.

³²A eb man ojtaknenok Dios, caw chi yiajtek eb c'ulok sayon ec' juntzan tzet yetal ti'. Axa ayon xin, a co Mam ay bay satcan, yojtakxa tol caw chi oc yopiso juntzan ti' juj.

³³Xan ak'ek e yip e yaon oc e ba yul k'ab Cham wal sic'libil, cax watx'c'al che yut e beybal axca wal chi yochej c'ul. Ta ok e yun axca chi wal ti', ok yak' Cham masanil juntzan tzet yetal ti' ayex.

³⁴Yuj tu xin, manchak ex oc il yuj tzet ayex yecal, yujtol man e yojtakok tzet ibil oc yuj jun c'u yecal tu', xan maj je' e yoc il. K'okbilc'alnaj che naobtanej yin tzetak yetal ibil oc yuj junjun c'u.