Read Q'anjob'al Mt 8 Bible Online

Mt 8 - Q'anjob'al bible

Mt 8

¹Axa yet max paxaytek Jesús bay jun tzalan tu xin, xiwil anima max tzakloj yintak Cham.

²Ay jun winak caw ya'ay sic'libil yuj jun ilya' chi yik lepra. A jun winak tu' max jayoc bay Jesús, cax max bekon ay jajnaj ba satak Cham cax max yaloni: —Mamin, ta chi yal a c'ul chi je' jaycan in c'ul oj, ẍi nak bay Cham.

³Xan max matxbaj oc Cham k'ab yiban nak, max yaloni: —Chi yal in c'ul. Ti chi jaycan a c'ul, ẍi Cham. Yet-xac'al jun bek tu' max jaycan c'ul nak yuj Cham.

⁴Lajwi tu xin, cax max yalon Cham bay axca ti': —Ilabi, ayta bay alil jun ti'. Asi', cha tx'ox a ba bay junok eb sacerdote, cax chak'oncan a xajanbal bay Dios axca yalon ley Moisés, yet watx' chi il-lay yuj conob tol mayal jaycan a c'ul, ẍi Jesús bay nak.

⁵A yet max apni oc Jesús bay conob Capernaum, max jayoc jun capitán bay Cham, cax max oc tean yin,

⁶max yalon axca ti': —Mamin, a jun in chekbej ayic' wetok bay in na, max toj telan sat tx'at. Sicbinak el is mimanil, caw wal chi chiwaj yulak is mimanil chi yabej, ẍi bay Cham.

⁷Axa yalon Jesús bay cham axca ti': —Ti ok in tok xin, cax ok tok wak'oncan jay c'ul nak, ẍi Cham bay.

⁸Axa yalon cham capitán tu' bay Jesús axca ti': —Mamin, man in mojok chach oc yul watut. Asannejokab tol chach k'anjabtok cayti', axa jaycan c'ul nak in chekbej tu'.

⁹Wojtak jun ti', yujtol ayin ti', ay eb wajawil chin chekoni. Ac'ala', ay c'apax eb soldado chin cheka'. Ta ay junok mac chin cheka', chic'al yikej toji. Ta ay mac chi wawtej, chic'al yikej jayi. Yetok c'apaxok, ta ay tzet chin chek watx'nej junok in soldado, chic'al yikej watx'neni, ẍi bay Cham.

¹⁰A yet max yaben Jesús tzet max yal jun capitán tu', max c'ayaj c'ul, xan max yal bay eb tzakan oc yintak axca ti'; —Wal yel chi wal ayex, c'amto junok jet israelal maxax wil wal yaon oc c'ul yin Dios axca jun winak ti'.

¹¹Chi walon c'apax ayex, tol xiwil eb ok tit bay yichcan, c'al bay yayob c'u, cax ok ay chotan eb low yetok Abraham,*fn* yetok Isaac, c'al yetok Jacob bay meẍa Cham aj satcan.

¹²A eb jet israelal moj yoc bay jun loj tu', palta ay eb ok k'oklay eltok xol k'ekk'inal yina,*fn* bay ok oc ok'il, c'al natx'atx'i ye eb yuj yail, ẍi bay eb.

¹³Lajwi tu xin, axa yalon Jesús bay cham capitán tu' axca ti': —A tinani', paxanxa bay atut. Ok yunc'alta' tzet max aoc yin a c'ul, ẍi bay. Yet wal jun bek tu', max jay c'ul jun is chekbej cham capitán tu'.

¹⁴Max toj Jesús bay yatut Pedro. Axa max yiloni, telantok xal ni' Pedro tu' yuj jun k'ak'al ilya'.

¹⁵Axa yoc mitx'an Jesús yin k'ab xal tu'. Cac'al tu' max yun yel jun k'ak'al ilya' tu' yin, axa yaj wan xal tu', cax max c'oli yak'lay serbil eb yuj xal.

¹⁶Axa yet numumixac'al yay c'u, xiwil eb ayoc espíritu yob yin max ilaytek bay Cham, palta junnej k'anejal max yun yion el Cham eb espíritu yob tu'. Ac'ala' c'apax masanil eb anima ya'ay, max jaycan c'ul eb masanil yuj Cham.

¹⁷Tixton juntzan tzet max el yunen Jesús ti xin, yet watx' chi yuncan el tzet max yal cham chekbej Dios chi yik Isaías yet payxa, yet max yalon axca ti': A wal caw Cham max iontok jilya', lanan yaben yail co q'uexelok, ẍi.

¹⁸Axa yet max yilon Jesús tol manxa animaok oyanxac'al oc yin, max yikban ec'tok eb is cuywom bay junxa k'axepal a' mar.

¹⁹Palta a yet c'amto chi ec'tok eb tu', max apni oc jun meẍtol yin ley Moisés bay Cham, cax max yalon axca ti': —Ach in meẍtol, ok in tokc'al etok tzanc'al bay ok ach tok, ẍi bay Cham.

²⁰Axa yalon Jesús bay axca ti': —A no wax, ay is nach'en no', c'al no tz'iquin, ay is wayub no', palta ayin ti', caxc'al Chekbilintek yuj Dios xol eb jet animail, c'am jabok watut bay chin wayi, ẍi bay.

²¹Max yal c'apax junxa ayoc tz'akilok eb is cuywom bay axca ti': —Mamin, ok in ec'c'al etok cuywok. Asan xin, in mukcantok in mam bel, ẍi bay Cham.

²²Axa yalon Jesús bay axca ti': —Tzaklojan cuywok wintak. A eb camnakto el yul sat Dios, a eb chi je' mukoncan eb yet camnakil tu', ẍi Cham bay.

²³Lajwi tu xin, max octok Jesús yul barco, cax max oc c'apaxtok eb is cuywom yetok, axa k'axpoj eb tu'.

²⁴Palta lanan wal bey eb yiban a', cax max jay jun miman cak'ek' caw ow. Max c'oli bilaj sat a', cax chi toj a' yul te barco tu'. A pax Jesús xin, tol chi wayi.

²⁵Axa tenlay el wayan Cham yuj eb cuywom tu', max yalon eb bay Cham axca ti': —Mamin, col on. Ti wal chon paxay yich a', ẍi eb bay.

²⁶—¿Tzet yuj xan xiwil chex xiwi? ¿Tzet xan c'am wal che yaoc e c'ul yin Dios? ẍi Cham bay eb. Max lajwi tu xin, max aj wan Cham, cax max tenon oc wanaj jun miman cak'ek' tu', c'al a' mar, axa numay masanil tu'.

²⁷Toxac'al max c'aycan aj c'ul eb yuj Cham, max yalon eb axca ti': —¿Tzetlaj yayji jun winak ti', xan tojolc'al yiken cak'ek' bay, c'al a' mar? ẍixac'al eb.

²⁸Axa yet max ec'apnok Cham bay jun lugar chi yik Gadara, max jayoc cawan winak ayoc espíritu yob yin bay Cham, petoj eb bay chi muklay camnak. Yelxac'al ay is may eb, xan c'am mac chi ec' bay jun be tu'.

²⁹Axa wek'on el eb yaw tu', max yalon eb bay Jesús axca ti': —Jesús, ach C'ajol Dios, ¿tzet alon et jin? ¿Tom yin ayoktoc'al cax chach jayoc on ul aon oc yin yatakil? ẍi eb.

³⁰Axa cawilal tu' ay pax ec' jun miman bulan txitam chi tzuk yac'un,

³¹xan max yal eb espíritu yob tu' bay Jesús axca ti': —Ta chon oktej el yin eb anima ti', axa yin no txitam tu' chon a chaocok, ẍi eb bay Cham.

³²—Ocanek yin no' xin, ẍi bay eb. Xan max el eb yin eb anima tu', axa yin no txitam tu' max occan eb. Yuj tu xin, ayman max toj no' el yuj eb. Max k'okon el ba no' sat witz masanil, masantac'al max ayapnok no' yul a' mar, cax max jik'bi aytok no' yul a'.

³³Axa eb yilomal no txitam tu xin, max elaj eb, max toj eb yin aymanil bay conob, yuj toj yalon eb tzet max on no txitam tu', c'al yuj eb bay max elcan eb espíritu yob tu' yin.

³⁴Yuj tu' xan masanilxac'al conob max eltek ul yilon yin Jesús, cax max tewi eb bay Cham yet chi besil ba yul is conobal eb.