Read Q'anjob'al Mc 11 Bible Online

Mc 11 - Q'anjob'al bible

Mc 11

¹A yet lananxa yapni Jesús yetok eb is cuywom cawilal conob Jerusalén, bay tz'eyil Betfagé yetok Betania, bay cawilal tzalan Olivo, max chek babjok Jesús cawan eb is cuywom.

²Max yalon bay eb axca ti': —Babjanektok bay jun aldea co sataktok ti'. A yet ok ex apnok ocok, ay jun no ach'ej burro pixan ocok, ok ilchaj e yuj. C'amto junok mac chi aj junelok yiban no'. Che xuyilok cax che yiontek.

³Ta ay mac chi alon axca ti' ayex: ¿Tzet xan che xuyil no'? ta ẍi, tix che yut e yalon ti': Tol ok k'anabax no' yuj Cham Jajawil. Ayman ok ul jak'can no', quex chi, ẍi bay eb.

⁴Axa babji eb tu', max ilchaj no ach'ej burro tu' yuj eb. Pixan oc no' ti' jun na bay ti' be, axa xuyon el eb tu'.

⁵Ay mac ayic' bay tu', max k'anlen el eb bay eb cuywom tu' axca ti': —¿Tzet che yunej? ¿Tzet xan che xuyil no burro ti'? ẍi yutelay eb.

⁶Max yalon eb axca max yun cuylay eb yuj Jesús, cax max beklaytek no' bay eb.

⁷Max yiontek eb no' bay Cham. Max yaon ajtok eb is pichil tz'amok no', axa yaj Jesús yiban no' tu'.

⁸Yak'ban chi beyi, xiwil anima chi litx'baj ay is pichil satak yul be.*fn* Ay mac xin, k'ablak te' chi bet pak'tek cax chi yaon ay yul be tu'.

⁹A eb babel satak, c'al eb tzakan oc yintak, chi aj yaw eb yuj tzalojc'ulal yin ipejal, chi yalon eb: —Yuj wal dios. Al-layokab watx' k'anej bay Cham chekbiltek yuj Cham Jajawil.

¹⁰Jalek watx' k'anej yin Cham ok oc co yajawilok ti', axca max yun yoc jichmam David yin yajawilal payxa. Jak'ek yuj diosal bay Dios, ẍi eb.

¹¹A yet max apni Jesús yul conob Jerusalén, max octok yul templo Dios. Max ec' t'ananok yin masanil tzetak yetal ay yul tu', palta yelc'ulalxac'al yay c'u, xan max meltzoj pax bay conob Betania yetok eb is cuywom lajcawanil.

¹²A yet max k'inibi aj yet junxa c'ual, yet petoj eb bay Betania, max tit is wajil Jesús yulak be.

¹³Axa max yilontok najat, ay jun te higo, cax ay xak te'. Axa toj yilon tu'; tokc'al ay junok sat te' ayocok. Asanc'al xak te' ay, yujtol man tiempoalok yak'on te' sat.

¹⁴Yuj tu' xan max yal yin te higo tu' axca ti': —C'amxa mactxel ok loon sat te', ẍi. Max yab eb cuywom yalon axca tu'.

¹⁵Catatu' bian max apni eb bay Jerusalén, cax max octok Jesús yul templo Dios. Max c'oli yukten eltek jantak eb chi txonji yul tu', c'al eb chi manji. Max tenon aj pac'labok meẍa eb q'uexom tumin, c'al ẍila eb txonom paloma.*fn*

¹⁶Majxa chaic' etxetxok junok mactxel yetok is tzetak yetal yul templo tu'.

¹⁷Axa c'oli cuywaj nan xol eb tu' axca ti': —Albilcan yuj Dios axca ti' yul tx'an Un Tz'ibbilcanok: A in templo ti', ok al-lay yin tol nail txaj yayji yuj masanil conoblak, ẍi. Palta ayex ti', axcaxac'al junok nach'en bay chi c'ubaj el ba eb elk'om, caytu' che yutej, ẍi bay eb.

¹⁸A juntzan tzet max yun Jesús ti', max yab eb yajawil eb sacerdote, c'al eb meẍtol yin ley Moisés. Max xiwaj eb yuj, yujtol miman yelapnok juntzan is cuybej yul sat anima masanil, xan max say eb tzetbil chi yut yak'on camok.

¹⁹Palta a yet max k'ekbican ayok, max el Cham yul conob tu' yetok eb is cuywom.

²⁰Axa yet max ec' eb yet k'inibalil yet junxa c'ual cawilal te higo max catabnej Jesús ewi, mayal takaj te' yetokc'al is xe'.

²¹Axa naontek Pedro tu', max yalon bay Jesús axca ti': —Mamin Meẍtol, ilab te higo a catabnejcan ewi, mayal takaj te', ẍi bay.

²²Max yalon Jesús bay: —Aek oc e c'ul yin Dios.

²³K'inalok ay junok ex che yal bay jun witz ti' axca ti': Elan cayti'. K'okaytok a ba yul a' mar, ta quex chi. Ta c'am che yak' cabc'ulal, ta che yaoc yin e c'ul tol ok yun axca che yal tu', wal yel ok yunej.

²⁴Xan chi wal ayex, a yet chex txajli, che yaoc yin e c'ul tol ok e cha' tzet che k'an tu'. Ta che yaoc yin e c'ul, ok ak'lay ayex.

²⁵Ta ay mac chi oc is mul ayex, a yet chex txajli, joek c'ay is yobtakil tu' yin e c'ul. Ta caytu' che yutej, ok jolay c'apax c'ay e yobtakil yuj co Mam Dios,*fn* ẍi Jesús bay eb.

²⁷Axa yapni pax eb bay Jerusalén junelxa tu', max octok Jesús yul templo Dios, c'oli yec'jabc'al yul. Max oc c'apaxtok eb yajawil sacerdote yetok eb meẍtol yin ley Moisés, c'al eb ichamtak winak.

²⁸Cax max k'anlen eb bay Cham axca ti': —¿Tzet ekbej yuj tu xan max on juntzan ti ewi? ¿Mactxel ak'nej ekbej tu'? ẍi eb bay.

²⁹Axa yalon bay eb tu': —Ay c'apax jun tzet yetal ok in k'anlej el ayex. Ta ok e tak'wej ayin, cax ok walon ayex mac ak'nej wikbej wunen juntzan ti'.

³⁰¿Mac ak'nej yikbej Juan xan max ak'wi bautizar anima, Dios mi, ma anima? Alek ayin, ẍi bay eb.

³¹Axa c'oli yalubtanen eb is xol tu', cax max yalon eb axca ti': ¿Tzet wal chi jut jalon bay? Ta chi jala' tol a Dios ak'nej yikbej, a xam yalon ayon tu': ¿Tzet yuj xan maj e yapax oc yin e c'ul xin? ẍi mi.

³²Palta maj c'apax je' jaloni tol anima ak'nej yikbej, ẍi eb. Caytu' chi yut yalubtanen eb, yujtol chi xiw eb bay eb anima; yujtol a pax Juan tu', caw chekbej Dios yayji yul sat eb anima masanil.

³³Xan max yal eb bay Jesús axca ti': —Man jojtakok mac ak'nej yikbej Juan tu', ẍi eb. —Ta caytu xin, maj wal c'apax ayex mac ak'nej wikbej wunen juntzan ti', ẍi bay eb.