Read Q'anjob'al Mc 12 Bible Online

Mc 12 - Q'anjob'al bible

Mc 12

¹Axa yalontek Jesús jun abix tx'oxom el cuybanilej. Max yalon axca ti': Ay jun winak max yaw juntzan uva sat jun is tx'otx'.*fn* Max coralneni, max watx'nen jun olan bay ok teq'uil yal yuva tu'. Max tz'akon c'apax aj jun ilbal uva xol tu'. Max lajwi tu', max yaoncantok is tx'otx' tu' majanil, yetokc'al yawojal bay juntzan mulnajwom. Max toj ec'jab bay junxa lugar najat.

²Axa yet max ajapnok tiempoal wajlay el an uva tu xin, max chekontok jun is chekbej bay eb mulnajwom tu', yuj toj chaon nak jantak yet cham t'inan yioni.

³Max apni oc nak xin, max tzac'ontek eb, max mak'on eb. Lajwic'al tu' cax max chekon pax eb, c'am jabok tzet max yi' nak.

⁴Max chekontok cham aj tx'otx' tu' junxa is chekbej bay eb junelxa, palta max mak' yasjok eb jolom nak, caw yob max yut ba eb yin.

⁵Maxto wal chektok cham junxa. Axa junxa tu xin, max camxac'al yuj eb. Xiwiltoc'al juntzanxa eb max chektok. Ay eb toc'al max yasji mak'layi; ay eb xin, max camxac'al eb.

⁶Ay jun c'otan is c'ajol cham aj tx'otx' tu', caw chi camil c'ul cham yin. Yinxac'al tzunanil max chekon c'apaxtok cham is c'ajol tu'. Ok xiw eb bay in c'ajol ti', ẍi cham yul is c'ul.

⁷Palta a yet lanan yapni nak, max wajan alnen eb majan tx'otx'wom tu' axca ti': Ti chi jay is c'ajol cham aj tx'otx'. A yet ok cam is mam nak, a ok ioncan tx'otx' ti' satakok. Co mak'ek camok, ayonxa ok jican tx'otx' ti', ẍi eb.

⁸Xan a yet max apni nak max mitx'on eb, cax max mak'on cam eb, cax max bet k'okoncan el eb tilak el tx'otx' tx'otx' tu'.

⁹Chin k'anlej ayex xin, ¿tzettax ok utlay eb majan tx'otx'wom tu' yuj cham aj tx'otx' tu' che na'? Ok yak' cam cham eb, yet ok jayok, cax ok yaoncantok is tx'otx' tu' majanil bay juntzanokxa mactxel.

¹⁰¿Tom c'amto bay che yil yul tx'an Un Tz'ibbilcanok bay chi yal axca ti': A ch'en ch'en max yintaknej el eb watx'nem na, a ch'en max oc yin jolom txiquin na.

¹¹A jun ti' max yun Cham Jajawil, cax chi c'ayaj co c'ul yuj, ẍi yul tx'an Un Tz'ibbilcan tu'? ẍi Jesús bay eb.

¹²Max yak'lej eb mitx'on Jesús, yujtol max nachaj el yuj eb, tol a eb chi al-lay yuj jun abix tu'; palta chi xiw eb bay anima, xan max bekil eb Cham, axa paxtok eb tu'.

¹³Max lajwi tu xin, max cheklaytek jaywan eb fariseo yetok jaywan eb is partido Herodes bay Jesús yuj yak'len eb yikban ayc'ay Cham yuj junok tzet yetal chi yala', cax chi yak'on queja eb yaloni.

¹⁴Maxc'al jay eb xin, max yalon eb bay: —Mamin Meẍtol, jojtak tol yel tzet chala'. Jojtak c'apaxok, tol jun lajanc'al chot a c'ul yin anima masanil, yujtol lajanc'al yelapnok eb yul a sat, cax chach cuywaj wal yin yel yin jun beybalej chi cha c'ul Dios. ¿Tzet cachi ach ti'? A ch'en tumin chi k'anlay el ayon yuj cham yajaw bay Roma, ¿ay mi leyal chi jak'a', ma c'amak? ¿Watx' mi chi jak' ch'en, ma c'amak cha na'? ẍi eb bay.

¹⁵Palta yojtakxa Cham tol cabsatil eb chi oni, xan max yal bay eb axca ti': —¿Tzet yuj xan che yak'lej in e yikban ayc'ayok? Iektek junok ch'en tumin tu' wila', ẍi bay eb.

¹⁶Axa yiontek eb jun tumin tu'; max k'anlen Jesús bay eb: —¿Mactxel jun ayoc yechel sat yin jun tumin ti'? ¿Mactxel jun ayoc is bi yin ch'en ti'? ẍi bay eb. —Yechel sat cham yajaw bay Roma yetokc'al is bi cham, ẍi eb bay.

¹⁷—Ak'ek tzet yetal yetc'alta' cham yajaw tu' bay cham xin. Axa tzet yetal yetc'alta' Dios, ak'ek c'apax bay, ẍi bay eb. A yet max yaben eb juntzan tu', toc'al max c'ayaj c'ul eb.

¹⁸Lajwi tu' max jay juntzan eb saduceo bay Jesús, a ton eb chi aloni tol c'am chi ictzoj aj eb camnak. Max yalon eb bay Cham axca ti':

¹⁹—Mamin Meẍtol, a Moisés tz'ibnejcan axca ti': K'inalok ay junok mac chi cami, cax chi can yistzil, palta c'am junok yuninal max elcanok. Axa junok nak uẍtakejal yowalil chi ion ix, yet watx' ta chi el yuninal junxa tu', axca tol yuninal nak max cam tu' chi yun yoqui. Caytu' max yut yaloncan Moisés.

²⁰A junel, ay ukwan winak yuẍtakc'al ba. Max oc yistzil nak babel winak, palta max camtok nak, c'amc'al yuninal nak max elcanok.

²¹Axa junxa nak uẍtakejal max ioncan ix. Max cam c'apaxtok junxa nak tu', ac'ala' c'am c'apax yuninal max elcanok. Ac'ala' max yun nak yet is yox uẍtakejal.

²²Yukwanil eb nak max yilejc'al ix. C'amc'al eb max elcan junok yuninal. Lajwi camtok eb nak yukwanil xin, cax max cam c'apax ix.

²³A yet ok ictzoj aj eb camnak tu xin, ¿mac wal junok yel wali ay yalon yet yin ix? Yujtol maxc'al yilej eb nak ix yukwanil, ẍi eb saduceo tu'.

²⁴Axa yalon Jesús bay eb tu': —Caw wal che yak' c'aytok e ba, yujtol man e yojtakok tzet ẍi tx'an Un Tz'ibbilcanok. Man e yojtakok c'apaxok jantak wal mayk'ak'al Dios.

²⁵A yet ok ictzoj aj eb camnak tu', tok okto yilej ba eb anima, yujtol axcaxa eb ángel bay satcan ok yuncan el eb.

²⁶Palta toc'alta' txequelxa yayji tol ok ictzoj aj eb camnak. ¿Tom c'am bay che yil tzet tz'ibbilcan yuj Moisés yul tx'an Un Tz'ibbilcan xin, yuj tzet max yal Dios yet max k'anjab eltek xol k'ak' k'ak' yin te q'uix? Max yalon Dios bay Moisés axca ti': Ayin ti' is Diosal in Abraham, Isaac, c'al Jacob, ẍi.

²⁷Yuj tu' xan jojtak tol maj c'ayil eb, yujtol max yalcanok tol is Diosal eb yayji. Yuj tu xin, caw che yak' c'aytok e ba, ẍi Jesús bay eb.

²⁸Ay c'apax jun meẍtol yin ley Moisés max jay bay Cham, tol max yab teyelen ba eb saduceo tu' yetok Jesús. Max yabej tol watx' max yut paktzen Cham is k'anlebal eb, xan max yak' c'apax jun is k'anlebal bay Cham axca ti': —¿Mactet junok chekbanilej yel miman yelapnok yintak masanil? ẍi nak bay.

²⁹Max yalon Cham bay: —Tix ton jun chekbanilej ec'ban yintak masanil ti': Abek xin ex wet israelal, a Cham Jajawil co Diosal, junnej ton Cham.

³⁰Camc'ulnejek Cham Jajawil co Diosal yin masanil e c'ul, c'al yin masanil e yanimail, c'al yin masanil e nabal, c'al yetok masanil e yip, ẍi.

³¹Ac'ala' junxa ok wal ti', txenxa man lajanok yetok jun babel tu': Che ya'ilnej e yet animail axca chi yut e ya'ilnen e ba junjun ex, ẍi. C'am junokxa chekbanilej yel miman yelapnok yintak cab ti', ẍi Jesús.

³²Axa yalon nak cuywom yin ley tu' bay: —Watx' ton Mamin, yel ton chala'. Junnej ton Dios, cax c'am junokxa.

³³Yowalil ton chi co camc'ulnej Dios yin masanil co c'ul, yin masanil co nabal, yin masanil janimail, c'al yin masanil jip. Yetok c'apaxok, yowalil chi co ya'ilnej eb jet animail axca chi jut co ya'ilnen co ba junjun on ti'. A cab ti', ec'ban yelapnok yintak masanil xajanbal chi ak'lay tz'a satak Dios c'al masanil sabalej chi ak'lay bay, ẍi nak.

³⁴A yet max yaben Jesús tol watx' max yut tak'wok ba nak bay, max yalon bay axca ti': —Jabxanej wal oc yul k'ab Dios, ẍi bay. Yuj tu xin, c'am junokxa mac max tec'baj ba k'anlen junokxa tzet yetal bay Cham.

³⁵A yet max cuywaj Jesús yul templo Dios junel, max yal axca ti': —¿Tzet xan chi yal eb meẍtol yin ley Moisés tol a Cristo yinatil David? ẍi eb.

³⁶Yujtol a David tu', ak'bil yal yuj Cham Espíritu Santo axca ti': Max yal Dios Jajawil bay Cham Wajawil: Ayan chotan bay in watx' k'ab ti', masantac'al ok wacan oc eb ajc'ul oc en yalan akan,*fn* ẍi Dios bay Cham Wajawil, ẍi David.

³⁷Caytu' max yut yalon David tu', tol a Cristo, is Yajawil yayji. Yuj tu', txequel tol man asannejok tol yinatil David yayji Cham, ẍi Jesús bay eb. Xiwil anima max aben cuywaj Cham, cax max tzalojxac'al aj eb yabeni.

³⁸A yet lanan cuywaj Jesús xol anima tu', max yal bay eb axca ti': Che yilc'al e ba, yujtol a eb meẍtol yin ley Moisés, caw ay is may beybal eb. Chi cha c'ul eb yec' tok'ok'ok yetok is jokan pichil chi yaocok.*fn* A yet chi yion ay ba anima bay eb yulak calle, watx'xac'al chi yab eb.

³⁹A bay nail wajayil eb yin culto, asan bay chi ay chotan eb mimek winak chi yochej eb chi ay chotanok. A yet chi oc pax mimek loj, asan bay chi ay eb mimek winak chi ay eb.

⁴⁰Chi yion ec' eb yatut eb ix camnakxa yichamil. Chi lajwinaj tu', najat chi yut eb yakan is txaj, yet watx' chi na eb anima tol watx' eb. Yuj tu', yel miman yailal ok cha eb, ẍi Jesús.

⁴¹Chotan ay Jesús yul templo junel, bay cawilal chabal ofrenda, max yilonc'al yaon aytok anima is yofrenda. Xiwil eb beyom mimantak chi yut yaon aytok yet.

⁴²Lanantoc'al wal tu', max jay jun xal ix camnakxa yichamil, cax meba' ch'an xal. Max yaon aytok xal cab melyu centavo yet, caw jab wal ch'an yet xal tu'.

⁴³Axa yawtentek Jesús eb is cuywom tu', max yalon bay eb: —Wal yel chi wal ayex, a jun xal meba' ix camnakxa yichamil ti', ec'ban yofrenda xal max ec' yaytok yintakc'al masanil eb max ec' yaytok yet yul chabal ofrenda ti'.

⁴⁴Yujtol junjunc'al mactxel, sobrailxac'al tumin eb max ec' yaytok. Axa jun xal ti xin, caw wal meba' ton xal; palta echc'al max yaytok xal is tumin yin ofrendail, ẍi bay eb.