Read Q'anjob'al Mc 13 Bible Online

Mc 13 - Q'anjob'al bible

Mc 13

¹A yet lanan yeltek Jesús yul templo Dios, max yalon jun is cuywom bay axca ti': —Meẍtol, ila wal junjun juntzan ch'en ti', yetok juntzan na ti', caw mimek, ẍi bay.

²Axa yalon Jesús bay tu': —Chi wal ayach tol a juntzan mimek na chel ti', c'al juntzan ch'en latz'bil aj ti', c'amxa junok ok cancan yiban yet ch'enal. Pilan ok ec' bulnajok, ẍi bay.

³Max lajwi tu xin, max toj eb bay jun tzalan Olivo, a is paq'uil tu', a tu' ay templo Dios. Max ay chotan Jesús bay tzalan tu xin, axa Pedro yetok Jacobo, Juan c'al Andrés, max k'anlej el eb bay yet ayic' eb tx'oklil yetok, axca ti':

⁴—Chi jochej chal ayon, ¿bak'in wal ok jay jun max al ayon tu'? ¿Tzet yechelej ok tx'ox Dios, yet toxaxac'al ok yun juntzan tu'? ẍi eb bay.

⁵Axa yalon Cham bay eb tu': Aj nabalc'al che yut e ba, yet watx' c'am junok mactxel ok ion aytek e sat,

⁶yujtol xiwil mac ok banoc in bi yiban: Ayin ton Cristo in, ẍi eb, ok tz'ak yalon eb. Xiwil anima ok yiaytek eb sat.

⁷Ok e yab yoc mimek owal. Ok e yaben k'umal juntzanxa ijan chi oqui, palta manchak ex xiwi, yujtol yowalil caytu' ok ujok. Manto lajubok yulyibank'inal ti'.

⁸Yujtol ay juntzan mimek conob ok yak'lej owal yetok yet mimek conobal. Ok yak'len aj eb yajaw owal yetok yet yajawilal. Xiwil bay ok ec' quixcab. Ok jay mimek wajil yiban anima. A juntzan tu', yichbanil yatakilalixtoc'al yayji. Ay wal juntzanxa ok jayok.

⁹Ayex ti xin, tec'anc'al che yut e ba, yujtol ok ex alay oc yul k'ab eb k'umbalbawom. Ok ex mak' eb yul nail bay chi wajbaj ba eb jet israelal yin culto. Ok ex yitok eb satak eb yajaw, c'al satak eb rey, yujtol max e yaoc e c'ul win. Caytu' ok yun jay e yiban xin, yet watx' ok je' e yaloncan el wabixal bay eb.

¹⁰Yowalil babel ok alchajcan el k'anejal yet colbanilej bay junjun conob, catatu' ok jay lajubal.

¹¹A yet ok ex ilaytok satak eb yajaw tu', manchak e na' yin ayokto yuj tzet ok e yala', tamwal chex oc il yuj. A tzet ok ak'lay e yal yuj Dios yet jun bek tu', a che yala'. Yujtol mayexnak ok ex k'anjabok, palta a Cham Espíritu Santo ok k'anjab el e yin.

¹²Ay eb uẍtakejal, ok yaoc yuẍtak yul k'ab camich. Ay c'apax eb mamej, caytu' ok yut ba yin is yuninal. Ay eb uninalej ok yak'lej owal yetok is mam, c'al is txutx, cax ok yaon oc eb yul k'ab camich.

¹³Masanilxac'al anima ok chichonbok oc c'ul e yin, yujtol max e yaoc e c'ul win, palta a mac tec'anc'al waayi masantac'al chi yal cami, a ton eb tu' ok colchajok.

¹⁴Palta ok jay jun etnewom yajbil el yuj Dios. A mac chi ilon aj jun abix ti', nachajokab el yuj. A yet ok il-layok tol ayic' jun tu' bay tol man is mojok yayji ec'ok, tokokab eb ayic' bay Judea bay tzalanlak.

¹⁵Axa mac ayajtok yiban pananil yatut*fn* yet jun c'ual tu', manchakxa aytek, cax manchakxa octok yul yatut tu' yiontowal eltek jabokxa is tzetak yetal, cax chi toj elok.

¹⁶Yetok eb ayic' xol is mulnajil, manchakxaokab meltzoj yintak toj yion is pichil.

¹⁷A yet jun tiempoal tu', ok'bal c'ul eb ix yobix, yetok eb ayto yune' chi yak' txutxwok.

¹⁸Tewanek bay Dios, tol manokab nabil k'inalok*fn* yet ok ex el tu'.

¹⁹Yujtol axca jun miman yailal ok jay yet jun tiempoal tu', c'amto bay maxax uj junelok, yecheltaxc'al max watx'nej Dios yulyibank'inal ti'. Asan ch'an junel tu', c'amxa bak'in ok uj junelxa axca tu'.

²⁰Ta c'am chi c'otxbaj Dios jun tiempoal yailal tu', c'am junok mac ok colchajcan el yul k'ab camich, palta yuj is camc'ulal yin eb sic'bilxa el yuj, xan ok c'otxbanej.

²¹Ta ay mac ok alon ayex axca ti': Ilekto wali, tix Cham Cristo ayic' cayti', ta ẍi; ma Ilekto wali, tix ayic' bay tu', ta ẍi e yutelayi, manchak e cha' e yabej.

²²Yujtol ay juntzan eb ok tz'ak yaloc ba Cristoal, ok tx'oxaj ba, c'al juntzan eb ok tz'ak yaloc ba chekbejok Dios. Ok tz'ak tx'ox eb yechelej, c'al milagro, yuj yion aytek sat eb anima. Toltax a eb sic'bilxa el yuj Dios, ijanxac'al ok ayc'ay eb yuj eb.

²³Palta ayex ti', tec'anc'al che yut e ba. Ayokto chi waloncan masanil juntzan ti' ayex.

²⁴A yet jun tiempoal tu', a yet ok lajwok ec' jun miman yailal tu', ok k'ekk'olil yakan c'u, c'amxa c'apax sakk'inal xajaw.

²⁵Cax ok titc'ay waycan satcan; yetokc'al juntzan tzet yetal ay is yipalil bay satcan, ok tzicobtanelayok.

²⁶Ok lajwok tu xin, axa yilon eb anima tu' wayol xol asun, ayin Chekbilintek yuj Dios xol eb jet animail ti'. Ok in jay yetok masanil wikbej, c'al in mayk'ak'al.

²⁷Ok in chek eb wángel, cax ok ec' wajon aj eb eb sic'bil el wuj bay masanil yulyibank'inal ti'.

²⁸Abek jun abix ok waltek yuj te higo. A yet chi uninbi k'ablak te', yet lananxa tit xak te', e yojtakxa tol toxa chi oc nabil k'inal.

²⁹Cayton tu', a yet ok e yilon jay juntzan ti', nachajokab el e yuj, tol toxa chin jayi.

³⁰Wal yel chi wal ayex, mantoc'al cam anima ayic' yet jun tiempoal ti', cax ok yunen masanil juntzan max wal ti'.

³¹A satcan c'al yulyibank'inal ti' ok lajwok, palta a in k'anej man ok ec' tzet chi yala'.

³²Palta c'am mac ojtaknej tzet c'ual, c'al jantak hora ok in jayok. A eb ángel bay satcan, man yojtakok eb. Ayin ti', ti pax wal C'ajol in Dios, palta man wojtakok. Asan Cham Dios Mamej yojtak.

³³Yuj tu', caw aj nabal che yut e ba, makwajanek, yujtol man e yojtakok bak'in ok jay tiempoal jun tu'.

³⁴Axca ton junok winak chi toj ec'jab najat, chi can yatut. Chi yaloncan bay eb is moso tzet chi yuncan junjun eb, cax chi yalon c'apax can bay nak taynem puerta, tol chi taynej nak puerta tu' sic'libil.

³⁵Axca eb mosejal tu' cayex tu', man e yojtakok bak'in ok in jayok, ma tol k'ekbintakil, ma chuman ak'bal, ma yet lananxa yok' no caẍlan, ma a wal sakbi el xin. Yuj tu', makwajanekc'al,

³⁶yet watx' manokab axcaok tol waynak ex elok, cax ok in jay tzac'najok.

³⁷A juntzan chi wal ayex ti', chi wal bay masanil anima c'apaxok: Makwajanekc'al, ẍi Jesús.