Read Q'anjob'al Mc 14 Bible Online

Mc 14 - Q'anjob'al bible

Mc 14

¹Cabejokxac'al yoc k'in Pascua eb israel, yet chi loon eb ixim pan c'am yich, axa wajban oc ba eb yajawil sacerdote tu', yetok eb meẍtol yin ley Moisés. Max c'oli lajtinen eb tzetbil chi yut mitx'on eb Jesús yin ewantakil, cax chi yak'on cam eb yaloni:

²Max yalon eb axca ti': —Maj je' co mitx'on yul k'in, yujtol ay is may ok tit yowal eb anima jin yuj, ẍi eb.

³Ayic' Jesús bay Betania, bay yatut Simón, jun ya'ay yet yalantok yuj lepra. Chotan ay Jesús lowi, max jayoc jun ix ix bay. Yetbi oc ix jun ch'en alabastro,*fn* nojnak yuj jun ambal suk'uk'i jab chi yik nardo,*fn* caw can is tojol. Max jayc'al ix, max bijon el ix nuk' ch'en, max tobon ajtok ix yiban jolom Jesús.

⁴Palta ay jun cawan eb ayic' xol eb ayic' bay tu' max tit yowal; axa yalon eb axca ti': —¿Tzet yuj xan toc'al chi etnelay el jun ambal suk'uk'i jab ti'?

⁵Aktam tol max txonlay elok, cax max pojlay ec' tojol xol eb meba', yujtol a jun ti' ec'ban mi junok 300 denario*fn* is tojol, ẍi eb. Caw wal max tzulay ix yuj eb.

⁶Axa yalon Jesús bay eb tu': —Bekek e yalon jun ti' axca tu', ¿tzet yuj xan yob che yal bay ix? A jun max yun ix win ti', caw watx'.

⁷A eb meba' che yal tu', ayc'al ec' eb e yetok. A yet ok e yochen e yak'on junok tzet yetal bay eb, ok je' e yak'oni; palta ayin ti', man tojbalk'inalok ayin ec' e yetok.

⁸Atac'ala' tzet max je' yuj ix yak'on ayin, a max yak' ix. Ayokto chi yaon oc ix jun suk'uk'i jab ti' yin in mimanil ti', yet watx' watx'xa wayji cax chin toj muklayok.

⁹Wal yel chi wal ayex, tzanc'al tzet lugaril yulyibank'inal ti' bay ok al-lay el k'anejal yet colbanilej, ok al-lay c'apax el yabixal jun tzet max yun ix ix ti', yuj nalaytek ix, ẍi bay eb.

¹⁰A Judas Iscariote, nak ayoc tz'akilok eb lajcawan cuywom Jesús, a' max betic' k'anjab yetok eb yajawil sacerdote yuj bet lajtinen yaon oc Jesús yul k'ab eb.

¹¹A yet max yaben eb, caw wal max tzaloj aj eb, xan max yak' eb ti' yak'on tumin bay Judas tu'. Axa c'oli sayon nak tzet ok yut yaon oc Jesús yul k'ab eb tu'.

¹²A yet babel c'ual jun k'in yet chi lolay ixim pan c'am yich, yet chi ak'lay cam no calnel yet Pascua, max yak' eb cuywom Jesús tu' jun k'anlebal ti' bay: —¿Baytal chochej chi toj co watx'nej junok lugar bay ok on lowok, yuj co naontek Pascua ti'? ẍi eb bay.

¹³Axa chekontok cawan is cuywom tu', max yalon bay eb axca ti': —Asek bay conob. Ay jun winak ok e yil yin bay tu', ibil oc jun moc aej yuj. Chex tzaklojc'al yintak.

¹⁴A bay chi apni ocok, che yal bay cham aj na tu' axca ti': Tix max yut yalon Cham co Meẍtol ti ayon: ¿Baytal ay jun cuarto bay ok in low yetok eb in cuywom, yuj co naontek Pascua ti'? ẍi, quex chi bay.

¹⁵Axa tx'oxon jun mimantak cuarto can ayex, tol watx'nebilxa elok. A tu' che watx'nej tzet ok co lo' tu', ẍi Jesús bay eb.

¹⁶Axa toj eb cuywom tu', max apni eb xol conob. Max ilchaj yuj eb axcac'al max yut yalon Jesús bay eb. Axa watx'nen eb tzet ok lo' eb yuj Pascua tu'.

¹⁷Axa yet k'ekbintakil xin, max apni Cham yetok eb is cuywom lajcawanil tu'.

¹⁸A yet lanan low eb yin meẍa tu', max yalon Jesús bay eb axca ti': —Wal yel chi wal ayex, a jun ok in aon oc yul k'ab camich, ayic' co xol ti', lanan low jetok, ẍi bay eb.

¹⁹Axa cusaj eb yet max yaben eb jun k'anej tu', xan junjunal max yut k'anlen el eb bay: —¿Mayin mi nak ayin ti'? ẍi eb yin junjunal.

²⁰Axa yalon bay eb tu': —A e xol e lajcawanil ay. Lanan low wetok yul jun plato ayay co nan ti'.

²¹Ayin ti', Chekbilintek yuj Dios xol eb jet animail, palta yowalil ok in cam axca yal-laycan yul tx'an Un Tz'ibbilcanok, palta ok'bal wal c'ul jun ok in aon oc yul k'ab camich tu'. Yel watx' yet, k'inalok ta majc'alta' aljok, ẍi bay eb.

²²Lanan wal low eb, max yion aj Jesús ixim pan. Max yalon yuj diosal yuj ixim. Max lajwi tu', max bijon ayok, max yak'on bay eb. —Loek, a ton in mimanil ti', ẍi bay eb.

²³Max lajwi tu', max yion c'apax aj jun vaso. A yet max lajwi yalon yuj diosalil yuj, max yaontok bay eb. Masanil eb, max wajan uc'nej eltek eb tzet ayay yul tu'. Max yal Jesús axca ti':

²⁴A ton jun ti' in chiq'uil. A yuj, xan ok yun jun is cab trato Dios.*fn* Ok el in chiq'uil ti', yet watx' xiwil mac ok colchaj yuj.

²⁵Wal yel chi wal ayex, c'amxa bay ok wuc' yal uva, atoc'al yet ok oc Dios Yajawilal, cax ok wuq'uen jun ato watx'ji, ẍi Jesús bay eb.

²⁶Max xew bitnen eb jun bit chi bitnej ta' eb*fn* bay Dios, axa toj eb bay tzalan Olivo tu'.

²⁷A tu' max yal Jesús bay eb axca ti': —A yet jun ak'bal ti', ok cabax aj e c'ul win e masanil. Caytu' yaloncan yul tx'an Un Tz'ibbilcan axca ti': Ok wak' cam Cham ilom calnel, axa no calnel tu', ok saklemcantok no', ẍi.

²⁸Palta a yet mayal in ictzoj pax ajok, ok babjok in toj e satak bay Galilea, ẍi bay eb.

²⁹Axa yalon Pedro tu' bay: —Caxc'al mi chi cabax aj c'ul eb masanil ti' en, palta ayin ti', majc'al cabax aj in c'ul en, ẍi.

³⁰—Wal yel chi wal ayach, a yet jun ak'bal ti', oxelxa quin eon el en yin aloni, tol mayin ojtakok, cax ok ok' no caẍlan yet cayelal, ẍi bay.

³¹Palta a Pedro tu xin, max tec'bajc'al ba yaloni, tol man ok cabax aj c'ul. —Caxc'al ok in cam etok, palta tutun maj ach wiel win, ẍi bay. Jun lajanc'al yalon eb cuywom tu' masanil axca tu'.

³²Max lajwi tu xin, axa jayoc Jesús yetok eb is cuywom tu' bay jun lugar chi yik Getsemaní. Axa yalon bay eb tu': —Ayanekcan chotan cayti', yak'ban chin toj txajlok, ẍi bay eb.

³³Asan Pedro yetok Jacobo c'al Juan max yitok yetok. Axa c'oli cusaj tu', c'al yoc yin bilc'ulal.

³⁴Xan max yal bay eb axca ti': —Ijan chin cam yuj cusc'ulal chi wabej. Cananek cayti', iquisokab ex wetok, ẍi bay eb.

³⁵Max jitzontok ba janic'xa sataktok, cax max ay nojan sat tx'otx'. Max txajli yuj k'anoni, ta chi je' c'am chi jay jun yailal tu' yiban.

³⁶Max yal yin is txaj axca ti': Ach in Mam, masanilc'al tzet yetal chic'al je' oj. Mata chi je' c'am chi jay jun yailal tu' wiban, palta manchak yun wochwan ayin ti', aokab ochwan chi yunej, ẍi.

³⁷Max lajwi tu', axa jayoc bay eb oxwan tu', palta axa max yiloni, lanan way eb, xan max yal bay Pedro axca ti': —Simón, ¿tom lanan a wayi? ¿Tom maj je' a tec'ban a ba bay wayan junok hora wetok?

³⁸Iek el e wayan. Txajlanek, yet watx' c'am chex ayc'ayi, yet ay mac chi yak'lej ex yikban yin yobtakil. A janimail tec'an ton waayi, palta co mimanil, c'am chi techaj yuj, ẍi bay eb.

³⁹Axa toj Cham txajlok junelxa tu'. Axcac'al max yut txajlok ba babelal, caytu' max bet yut txajlok ba junelxa.

⁴⁰Axa max jay junelxa, ac'ala' chi way eb, yujtol caw c'am chi techaj wayan yuj eb. Majxa nachaj tzet chi yut tak'wok ba eb bay.

⁴¹Axa yet mayal betic' txajlok yet yoxelal, max yalon bay eb axca ti': —¿Tom ac'ala' e wayi? ¿Tom comon xewilal che yunej? K'okbilxa, mayal ajapnok yorail walay oc yul k'ab eb yobtakwom, ayin Chekbilintek yuj Dios xol eb jet animail ti'.

⁴²Ajanek wan, tonek. Chi jay nak ok in aon oc yul k'ab eb wajc'ul, ẍi bay eb.

⁴³Lananto wal yalon tu', max jayoc Judas, nak max oclej tz'akilok eb lajcawan. Xiwil anima max jayoc yetok. Ay eb yetbi oc yespada, ay eb yetbi te'. Chekbiltek eb yuj eb yajawil sacerdote, eb meẍtol yin ley Moisés, yetok eb icham winak ay yikbej.

⁴⁴A Judas tu', albilxa yuj, tzet ok yut tx'oxon ocok; max yal bay eb axca ti': —A jun ok in tz'ubil is ti', a ton jun tu' che mitx'a'. C'anani che yutej che yiontok, ẍi bay eb.

⁴⁵Yuj tu' xan palanc'al jay yin Jesús. —Meẍtol, ẍi bay Cham. Axa toj tz'ubnaj yin ti' Cham tu'.

⁴⁶Max oc bulnaj eb yin, max mitx'on eb, axa yiontok eb preso tu'.

⁴⁷Axa eb ajun yetok, ay jun max tzac'ajtek yespada. Max tzoc'on el txiquin jun is moso cham sat sacerdote.

⁴⁸Axa yalon Jesús bay eb anima max apni oc bulnaj yin tu' axca ti': —¿Tom yajaw in xol eb yob nabal che yila', xan ibil oc e yespada c'al e te' chin ul e mitx'oni?

⁴⁹Junjunc'al c'u max in cuywaj e xol yul templo Dios, palta maj in e mitx' pax bay tu'. Axca ton ti' chi uj xin, yuj yunen tzet tz'ibbilcan yul tx'an Un Tz'ibbilcanok, ẍi bay eb.

⁵⁰Max bekcan eb cuywom tu' Cham tx'oklil, max toj eb el masanil.

⁵¹Palta ay jun nak ach'ej tzakanc'al yintak Cham. T'eban octok yul jun sábana chulan oc yin, max oc mitx'naj eb yin nak.

⁵²Palta max bekcan nak an sábana tu' yul k'ab eb, axa yel t'irt'on nak tu'.

⁵³Axa yiontok eb Jesús bay cham sat sacerdote tu'. Ata bay tu' max waj ba masanil eb yajawil sacerdote, yetok eb icham winak, c'al eb meẍtol yin ley Moisés.

⁵⁴Axa pax Pedro xin, najat tzakan yintak Jesús, masantac'al max yal yapni oc bay yamak'il yatut cham sat sacerdote tu'. Axa yay chotan k'aẍnok yetok eb policía yina tu'.

⁵⁵A eb yajawil sacerdote, c'al masanil eb sat yajaw, max say eb juntzanok k'anej chi naaj yin Jesús, yet watx' chi low camich yiban yuj eb, palta c'amc'al tzet max ilchaj el yin.

⁵⁶Xiwil eb max yak'lej naon aj k'anej yiban Cham, palta tx'ok tx'okc'al tzet chi yal junjun, xan maj chalej ba yalon eb.

⁵⁷Ay jun cawan eb max yak'lej yaj wan yuj naon aj eb k'anej yin Cham, max yalon eb axca ti':

⁵⁸—Ayon ti', max jab yalon axca ti': Ayin ti', ok wuchay jun templo Dios watx'nebil yuj anima ti'. A yet cabjial tu' ok watx'jok aj q'uexel wuj, man animaok ok watx'nenok, ẍi, max jabej, ẍi eb.

⁵⁹Palta tokc'al yuj tu' chi chalej ba yalon eb.

⁶⁰Axa yaj wan cham sat sacerdote tu' nan xol eb, max yalon bay Jesús axca ti': —¿Tom c'am chach tak'wi jabok? ¿Tom c'am chab juntzan chi yal eb ti' en? ẍi bay.

⁶¹Palta tz'inc'al ẍi, majc'al tak'wok. Axa yalon cham bay junelxa tu': —¿Tom ach Cristo ach? ¿Tom ach C'ajol ach Dios, Cham chi al-lay watx' k'anej yin? ẍi bay.

⁶²—Ja', ayin toni. Ayin ton Chekbilintek yuj Dios xol eb jet animail ti', ok in e yil yet chotan in ay bay watx' k'ab Dios, Cham Miman yikbej. Ok e yil c'apax wayol satcan xol asun, ẍi.

⁶³Axa nic'ontok cham janic' is pichil tu',*fn* cax max yalon cham axca ti': —¿Tzetto wal chi oc testigo juj tinani'?

⁶⁴Mayal jabej tol caw chi buchwaj yin Dios. ¿Tzet quex chi yuj tinani'? ẍi. —Moj chi cami, ẍi eb masanil.

⁶⁵Lajwic'al tu', ay eb max tzubli oc yin, cax max makchen eb sat, max c'oli mak'on eb, cax chi yalon eb bay: —Nailok mac max ach mak'oni, ẍi eb bay. Max lajwi tu', axa eb policía max mak'on wal sic'libil.

⁶⁶Ayic' Pedro bay yamak'il jun na tu', cax max jay jun ix criada cham sat sacerdote.

⁶⁷Max yilon ix yin Pedro yet lanan k'aẍni. Max camxac'al yoc t'anan ix yin, max yalon ix bay: —Ach ti', etbi a ba yetok Jesús aj Nazaret, ẍi ix bay.

⁶⁸Palta max yiil yin: —A jun mactxel chal tu', man wojtakok. Caw c'am jabok chi nachaj el wuj juntzan tzet chal ayin tu', ẍi bay ix. Max lajwi tu' axa jitzon el ba bay amak' tu'. Axa yok'aj no caẍlan tu' bian.

⁶⁹Max yilon ix criada tu' yin junelxa. Max yalon ix bay eb wajan ec' tu': —A ton jun winak tu' yetbi ba yetok eb is cuywom Jesús, ẍi ix.

⁷⁰Palta max yi pax el yin junelxa. Junixto bek tu', max yalon c'apax eb ayic' tu' bay: —Wal yel, ach ti' etbi a ba yetok eb. Aj Galilea ach c'apaxok, ẍi eb bay.

⁷¹Axa c'oli k'anontek Pedro tu' yowal c'ul Dios yiban. Max locban bi Dios, max yaloni: —A jun winak che yal tu', caw wal man wojtakok, ẍi bay eb.

⁷²Yet-xac'al jun bek tu', max ok'aj no caẍlan yet is cayelal. Axa naontek tzet max yal Jesús tu' bay yet max yalon axca ti': C'amto chi ok' no caẍlan yet cayelal, cax ok in eon el en yin yoxelal, yin aloni tol mayin ojtakok, ẍi Jesús bay. A yet max naontek jun tu', cax max jichchaj c'ul yok'i.