Read Q'anjob'al Mc 5 Bible Online

Mc 5 - Q'anjob'al bible

Mc 5

¹Max ec'apnok Jesús yetok eb is cuywom bay junxa k'axepal a' mar, bay jun lugar chi yik Gerasa.

²Lanan wal yeltek Cham yul barco, max jayoc jun winak bay, petoj bay mukbanil camnak. A jun winak tu', ayoc espíritu yob yin.

³Asan bay mukan eb camnak cajan nak. C'am mac chi tzakay c'alon ay nak yetok cadena.

⁴Tx'ial elxac'al c'al-lay ay nak yetok cadena chi oc yin is k'ab c'al yin yakan, palta coc'xac'al chi yun ch'en tukon cojok. C'am junok mac chi tzakay bay.

⁵Masanil tiempo, c'ualil c'al ak'balil chi ec'jab bay tzalanlak c'al bay mukbanil camnak. Chi el yaw, chi mak'on yasjok ba yetok ch'en.

⁶Axa max yilontek yin Jesús najat, max yak'on nak yip tit bay. Max bekon ay jajnaj ba nak satak Cham yet max jay ocok.

⁷Axa yalon Cham bay: —Ach espíritu yob, elan yin nak anima ti', ẍi bay. Max lajwi tu', max aj yaw yin ipejal max yaloni: —¿Tzet alon et win ach Jesús? Ach ti' C'ajol ach Dios Cham Axac'al Ocok. Yuj wal Dios chin otej, manchak quin etnej, ẍi bay Cham.

⁹Axa k'anlen el Cham bay nak winak tu': —¿Tzet a bi? ẍi bay nak. —Legión in bi, yujtol xiwil co bey on, ẍi nak.

¹⁰Xiwil max oc tean yin Cham yet watx' manchak chekil Cham eb espíritu yob tu' bay jun lugar tu'.

¹¹C'uxan ay pax jun miman bulan no txitam lanan tzukon yac'un bay jun tzalan.

¹²Max oc tean eb espíritu yob tu' yin Cham, max yalon eb: —Chekoncantok on xol no txitam tu', yet watx' axa yin no' chon occanok, ẍi eb bay.

¹³Axa chalaytok eb yuj Cham yin no' tu'. Cax max el eb yin nak anima tu', axa yin no txitam tu' max tojcan eb. Ay mi cabok mil no txitam tu'. Max k'okon el ba no' sat witz bay chi low tu', max ayapnok no' yul a' mar. Pilan wal max jik'bi no' bay tu'.

¹⁴A eb nak ilom txitam, caw max xiw eb nak sic'libil, axa toj eb elaj tu'. Max ec' yaloncan el eb yul conob, c'al bay najatlak elok, xan xiwil anima max bet ilon tzet max uj tu'.

¹⁵Max jayoc eb anima bay ayic' Cham xin, max yilon oc eb yin nak anima bay max el eb espíritu yob tu', chotan ec' nak bay tu'. Ayxa oc pichil nak, watx'xa c'ul nak. Yuj tu', caw max xiwaj eb anima tu'.

¹⁶A eb max ilon juntzan tzet yetal max el yunen Cham, a eb max alon yab juntzanxa eb maxto apni ocok. Max yal eb masanil tzet max uj yin nak bay max el eb espíritu yob tu', c'al tzet max on no txitam tu'.

¹⁷Yujc'al tu', max oc tean eb anima yin Cham, tol chi el Cham yul is tx'otx'al eb.

¹⁸A yet lanan yoctok Cham yul barco, a nak bay max el eb espíritu yob tu', max oc tean bay Cham, tol chi toj nak yetok.

¹⁹Palta maj cha' ajtok Cham nak yetok, max yalon bay nak axca ti': —Paxan bay atut, cax chalon bay a mam c'al bay eb ecan yuj jantakxa tzet max el yunen Dios en, yujtol max ok' c'ul Cham en, ẍi Jesús bay.

²⁰Axa toj nak tu', max ec' yalon el nak bay juntzan conob yul yet Decápolis. Max yalil nak jantak tzet max el yunen Jesús yin, xan toxac'al max c'ayaj c'ul anima masanil.

²¹Max lajwi tu', max paxic' Jesús bay junxa k'axepal a' mar bay petojta'a. A yet max ec'apnok tu', xiwil anima max waj pax ba yin junelxa.

²²Max jayoc jun yajawil nail culto eb yet israelal chi yik Jairo. Maxc'al yil yin Jesús, max bekon ay jajnaj ba satak.

²³Max oc tean yin Cham, max yalon bay: —Caw toxa chi cam jun in cutz'in. Ton wal wetok, cax chi toj a matxban oc a k'ab yiban ix, yet watx' chi jaycan c'ul ix, cax c'am chi cami, ẍi bay.

²⁴Axa toj Jesús yetok tu'. Xiwil anima max toj yintak, toxc'a chi witz'xac'al ba eb yin.

²⁵A xol anima tu', ay jun ix ix caw ya'ay sic'libil, lajcawebxa abil c'al c'oli yay a' aej yin.

²⁶Xiwil eb aj an bay max bet yetnej ba ix. Pilan max lajwican el tzet ay ix yin eb, palta c'am wal jabok max watx'ji c'ul ix yuj eb. A ti yet, tol chi te'c'al aj can.

²⁷Palta max yab ix k'umal Jesús, xan max jitztok ba ix yintak Cham xol anima tu'. Max mitx'on ix ti' pichil Cham,

²⁸yujtol max na' ix: Asannejc'al in mitx'on jabok ti' pichil Cham, ok jaycan in c'ul, ẍi ix.

²⁹Yet jun bek tu' max oc wanaj a' yel yin ix. Max yab ix watx'jican is yailal tu'.

³⁰Max yojtaknej el Jesús tol ay mac max watx'jican yuj is yipalil, xan max meltzojtok acan yintak yilon xol anima tu', max k'anlen bay eb: —¿Mactxel jun max mitx'on in pichil ti'? ẍi bay eb.

³¹Axa yalon eb cuywom tu' bay axca ti': —¿Tom c'am chela' tol chi witz' ba anima en, cax lajwi tu' chito wal a k'anlen paxok mac max mitx'on a pichil? ẍi eb bay.

³²Palta Jesús xin, chi ec'c'al t'ananok xol eb, yin sayoni mac jun max mitx'on is pichil tu'.

³³Axa ix ix tu xin, caw chi luklon ix yuj xiwilal. Yojtak ix tol max jaycan c'ul ix yuj, xan max toj ix c'atan, max bekon ay jajan ba ix satak. Max yalon ix masanil bay Cham.

³⁴Axa yalon Cham bay ix axca ti': —Ach ix, max jaycan a c'ul, yujtol max aoc a c'ul win. Paxan yin tzalojc'ulal. Ti mayal watx'ji a c'ul yin jun a yailal ti', ẍi bay ix.

³⁵Lananto wal yalon Jesús xin, max jay juntzan eb max tit bay yatut cham yajawil nail culto tu'. Max yalon eb bay: —A ix a cutz'in, mayal cam ix. Nabaxac'al mi chi toj yetnej ba Cham Meẍtol ti' toj yiloni, ẍi eb bay.

³⁶Palta a yet max yaben Jesús tzet max yal eb tu', max yalon bay cham yajawil nail culto tu': —Manchak ach oc il. Asan tol chaoc Dios yin a c'ul, ẍi bay.

³⁷Max lajwi tu', c'am mac max cha' tzakloj yintak. Asan Pedro yetok Jacobo, yetok Juan yuẍtak Jacobo tu', asannej eb max chatok yetok.

³⁸Max apni oc bay yatut cham yajaw tu xin, axa max yiloni, xiwil yok' anima. Xiwilxa chi el wek'ek'ok yaw eb yok'i.

³⁹Axa yoctok yul na tu', max yalon bay eb: —¿Tzet yuj xan xiwil chex ok'i? A ix unin ti', man camnakok ix, toc'al chi way ix, ẍi bay eb.

⁴⁰Palta toc'al max tzeyelay Cham yuj eb. Axa yuktelay eltek eb yina yuj Cham, cax max yion octok is mam c'al is txutx ix, yetok eb ajun yetok. Axa yoctok eb bay ayic' ix unin tu'.

⁴¹Max oc mitx'an yin k'ab ix, cax max yalon bay ix axca ti': —Talita Cumi, ẍi. Chi yal elapnok: Ach unin, ayin chi wal ayach, ajan wanok, ẍi.

⁴²Max ajxac'al wan ix yet jun bek tu', axa yec'jab ix tu'. Lajcaweb abilxa k'inal ix. A jantak eb ayic' tu', caw wal max c'ayaj c'ul eb.

⁴³Max cam c'ul Jesús yalon bay eb tol manchak yalil eb jun ti', axa chekon Cham yak'lay low ix tu'.