Read Q'anjob'al Mc 6 Bible Online

Mc 6 - Q'anjob'al bible

Mc 6

¹Max paxtek Jesús bay jun lugar bay ayic' tu', axa jayoc bay is conob. Ac'al jun eb is cuywom yetok.

²Axa yet c'ual xewilal, max cuywaj yul nail culto. Xiwil mac max abxalwi bay; palta toc'al max c'aycan aj c'ul eb yuj, axa yalon eb tu': —¿Baytal-laj max cuy jun winak ti' juntzan ti'? ¿Baytal-laj max yi' is jelanil? ¿Tzetlaj chi yun jeon milagro tu yuj?

³Yujtol a jun ti', a ton jun josom te', yune' ix María. Yuẍtak ba yetok Jacobo, José, Judas, yetok Simón. Ayic' eb yanab co xol ti', ẍi eb. Yuj tu' xan c'am yelapnok Cham yul sat eb.

⁴Axa yalon Jesús bay eb tu': —Ayc'alta' yelapnok eb chekbej Dios yul sat anima masanil. Asan yul sat eb yet conob eb, c'al yul sat eb yican eb, c'al yul sat eb junnej nail yayji yetok eb, c'am yelapnok eb, ẍi Jesús.

⁵Maj je' yunen junok milagro bay tu', asan jaywan ya'ay max matxbaj oc k'ab yiban, cax max jaycan c'ul eb.

⁶Max c'ayaj c'ul Cham, yujtol maj yaoc eb c'ul yin. Max lajwi tu xin, max ec' cuywaj bay juntzan aldealak cawilal is conob tu'.

⁷Max yawtentek Jesús eb is lajcawan cuywom c'atan. Max lajwi tu', catakwan max yut chekontok eb. Max yak'on yikbej eb ioj el espíritu yob.

⁸A yet c'amto chi toj eb, max yalon bay eb: —A yet chex toji, c'amc'al tzet che yi'. Manchak e yi' e pa, tamwal e lobej, tamwal tumin. Asan e k'okoch che yi'.

⁹Asanokab e pichil ayocok yetok e xanab.

¹⁰Tzanc'al tzet nail bay chex apni, ac'al bay tu' che yak' e posada masantac'al chex toj bay junokxa lugar.

¹¹Ta ay bay c'am chex chalay yuj anima, cax c'am chi yal c'ul eb chi cha yabej, c'am chex ayji bay jun lugar tu'; che tziccan el pokokal e yakan,*fn* yuj e tx'oxoncan elok tol c'amxa e yalon e yet yin eb, ẍi Jesús bay eb.

¹²Max toj eb cuywom tu xin. Max ec' yalon el eb, tol yowalil chi na ba eb anima yin is yobtakil.

¹³Xiwil espíritu yob max yican el eb yin anima. Xiwil eb ya'ay max ec' yacan oc eb aceite yin, cax max jayc'alcan c'ul eb.

¹⁴Max yabaj cham rey Herodes juntzan tzet chi el yunen Jesús yet jun tiempoal tu', yujtol max pukil yabixal xol masanil anima, yuj tu', max yal axca ti': —A jun tu', a Juan nak ak'om bautismo max ictzoj aj xol eb camnak. Yuj tu' xan ay is yikbej yunen juntzan tu', ẍi.

¹⁵Ay juntzanxa eb max alon axca ti': —A jun tu', a Elías, ẍi eb. Ay juntzanxa max aloni: —A junok eb chekbej Dios, axca eb yet payxa, ẍi eb.

¹⁶A yet max yaben Herodes juntzan ti', max yaloni: —A jun chi yal eb tu', a Juan, jun max wak' ilay el jolom. A ton max ictzonelay aj xol eb camnak, ẍi cham.

¹⁷Tix yuj ti' xan max cam Juan tu' yuj. Ay jun yuẍtak Herodes tu' chi yik Felipe. Herodías bi yistzil. Montebil el yistzil Felipe tu' yuj Herodes tu', axa Juan alnej bay Herodes tu' axca ti': —Caw c'am leyal cha montej el yistzil oẍtak, ẍi bay. Yuj tu', max tit yowal ix Herodías tu'. Axa c'oli yak'on ix c'ul Herodes tu', xan max yak' mitx'lay Juan, max yaoc preso, max pixay yetok cadena. A ix Herodías caw chi chichon oc c'ul ix yin. Chi yochej ix chi yak' camok, palta c'amc'al chi je'.

¹⁸

¹⁹

²⁰Yujtol yojtak Herodes tu', tol a Juan, caw watx' is beybal, cax tol yet wal Dios yayji. Yuj tu', max xiwaj yuj. Axa yaon oc taynemal tu', yet watx' manchak ak'lay cam yuj ix Herodías tu'. Ay bay chi yaltek Juan tu' abix bay Herodes. Caxc'al c'am chi nachaj el yuj sic'libil, palta caw chi tzaloj yabxalwi bay.

²¹A yet max chaon Herodes k'inal yabilal, max sayon ix tzetbil chi yut yak'on cam Juan tu'. Ay jun miman loj max oc yuj Herodes. Max yak' low eb yet yajawilal, yetok eb yajawil eb soldado, c'al eb mimek winak yul yet Galilea.

²²Axa yoctok ix yune' ix Herodías tu' bay lanan yoc loj, axa canalwi ix tu'. Watx'xac'al yec' ix max yil Herodes, yetok eb ayic' low yetok. Yuj tu' xan max yal Herodes bay ix axca ti': —K'an tzet chi yochej a c'ul ayin, ok wak' ayach, ẍi bay ix.

²³Max loctek bi Dios, max yak'on ti' bay ix, max yaloni: —Tzanc'al junok tzet yetal cha k'an ayin, ok wak' ayach. Caxc'al a nanok bay ayin oc yajawilal ti', ok wak'a', ẍi.

²⁴A yet max eltek ix xin, max k'anlen ix bay is txutx: —¿Tzet chochej chin k'ana'? ẍi ix bay is txutx tu'. Axa tak'wi xal txutxej tu': —A jolom Juan, jun ak'om bautismo tu', cha k'ana', ẍi xal.

²⁵Axa yoctok ix bay cham rey tu', cax yalon ix bay, axca ti': —Chi wochej a jolom Juan jun ak'om bautismo tu' chak' ayin yul junok plato wal tinani', ẍi ix.

²⁶Caw wal max cusaj cham rey tu' yet max yaben cham, palta majxa je' yak'on tac cham ti', yujtol max loctek cham bi Dios, cax max yaben c'apax eb ayic' yetok cham tu'.

²⁷Axa chekontok cham jun soldado, max bet tit jolom Juan tu' yuj.

²⁸Max toj jun soldado tu' bay preso xin, cax max bet yion el jolom Juan tu', axa yiontek yul jun plato, max yak'on bay ix, axa yak'on ix bay is txutx tu'.

²⁹A yet max yaben eb cuywom Juan tu', max jayoc eb, max bet mukoncan eb is mimanil.

³⁰Max meltzoj eb chekbej Jesús bay, max yalontek eb jantakc'al tzet max yun eb, c'al tzet max yak' eb cuylaycanok.

³¹Lajwitoc'al yalontek eb xin, axa yalon Cham bay eb axca ti': —Tonek xew jabok co tx'oklil bay c'am anima, ẍi. Max yal axca tu', yujtol c'am jabok colil eb yuj anima. Ay chi jayi, ay chi toji. Toltax low eb, tutun c'am colil eb.

³²Axa yoctok Jesús yul jun barco yetok eb is chekbej tu', max toj eb tx'oklil bay c'am anima.

³³Palta xiwil anima max ilon toj eb; toxa max yojtaknej pax el eb Jesús. Yuj tu' xiwil eb aj conob bay juntzan conoblak cawilal tu', max toj eb tilak a', babel max apni oc eb satak Cham.

³⁴Axa yeltek Jesús yul barco tu', max yiloni xiwil anima ayxa ec'ok. Axa cusoc c'ul yin eb tu', yujtol lajan eb axca juntzanok no calnel c'am yilomal, xan xiwil tzet yetal max yak' cuy eb.

³⁵A yet lananxa toj c'u, max jayoc eb is cuywom bay, max yalon eb axca ti': —Lananxa toj c'u. A bay jun lugar bay ayon ec' ti', c'am anima cajan.

³⁶Xan tekan watx' cha chektok eb anima ti' bay ay anima, yetok bay juntzan aldea cawil-lak ti', cax chi manon low ba eb bay tu', yujtol c'am lobej eb, ẍi eb.

³⁷—Ak'ek low eb ayex ti', ẍi Jesús bay eb is cuywom tu'. Axa yalon eb bay: —¿Chi mi toj co man 200 denario*fn* pan, chi yal tu', cax chi jak'on low eb? ẍi eb.

³⁸—¿Jayeb ixim pan ibil oc e yuj? Sayek ila', ẍi bay eb. A yet max lajwi yilon eb, max yalon eb bay: —Asan oyeb ixim jetbi ocok, yetok cac'on no txay, ẍi eb bay.

³⁹Max lajwi tu xin, max yalon Jesús tol chi ay chotan eb anima masanil yin bulquiẍtakil bay jun ac'al tu'.

⁴⁰Axa yay chotan eb tu'. Ay junjun bulan yin 50, ay eb yin 100.

⁴¹Axa yion aj Cham ixim oyeb pan tu' yetok no cac'on txay. Max aj t'anan satcan, cax max yalon yuj diosalil yuj. Max c'oli bijontok ixim. Max lajwi tu' max yak'on bay eb is cuywom, cax max pojon ec' eb xol anima. Max poj c'apax ec' no cac'on txay tu' xol anima masanil.

⁴²Masanil anima watx' max yun low sic'libil.

⁴³A yet max xew low eb, maxto wajcan aj eb cuywom lajcawebxa motx nojnak yuj ixim bijquiltakil, c'al yetok no txay maxto cani.

⁴⁴A eb winak max low tu', oyeb mil eb.

⁴⁵Max lajwi tu xin, max yalon Jesús bay eb is cuywom tol chi oc eb yul barco, cax chi babji k'axpoj ec' eb satak Cham, chi ec'apnok eb bay conob Betsaida. Axa Jesús xin, maxto can yuj yalon toj ba bay eb anima.

⁴⁶Max lajwi yalon toj ba bay eb xin, max toj bay jun tzalan txajlok.

⁴⁷Ayxa ec' te barco tu' nan a', cax max k'ekbi, axa Jesús xin, aytocan ec' sat tx'otx' tx'oklil.

⁴⁸Axa max yilontok, caw chi el yip eb is cuywom tu' mak'on a', yujtol ow jay cak'ek' satak eb. Axa yet toxa chi sakbi, max beytok Jesús yiban a'. Yochej palanc'al k'okon babjok ba satak eb.

⁴⁹A yet max yilontok eb tol chi bey yiban a', max na eb tol lab jun chi jayoc c'atan eb tu', xan caw max el yaw eb.

⁵⁰Max xiw eb masanil, yujtol masanil eb max iloni. Axa yalon Cham bay eb axca ti': —Manchak ex oc il. Ayin Jesús in. Manchak ex xiwi, ẍi bay eb.

⁵¹Max lajwi tu' max ajtok yetok eb yul barco tu', axa yoc wanaj cak'ek' tu' yuj. Toxac'al max c'aycan aj c'ul eb masanil.

⁵²Caxc'al toxa max yil eb milagro Jesús yin ixim oyeb pan, palta c'amtoc'al chi nachaj el is yikbej yuj eb, yujtol c'amto chi jakchaj nabal eb.

⁵³Max k'axpoj ec' eb xin, max ec' apnok eb bay conob Genesaret. Max pixbancan oc eb is barco bay ti a'.

⁵⁴Maxc'al eltek eb yul barco tu', max yilon oc eb anima tol a Jesús.

⁵⁵Xan max ec' eb batxontek masanil eb ya'ay bay jun lugar tu', max ilay jay eb bay Jesús.

⁵⁶Tzanc'al bay max eq'ui, yulak aldea ma yulak conob, ma bay cajan anima najatlak elok, max ilay eltek eb ya'ay yulak calle. Max k'anon eb mitx' jabok ti' pichil Cham, xan a masanil eb max mitx'oni, max jaycan c'ul eb.