Read Q'anjob'al Mc 7 Bible Online

Mc 7 - Q'anjob'al bible

Mc 7

¹Ay juntzan eb fariseo, c'al juntzan eb meẍtol yin ley Moisés max tit bay Jerusalén, max wajbaj oc bulan ba eb yin Jesús.

²Max yil eb tol ay jaywan eb cuywom Jesús, tol c'am chi tx'aj eb k'ab yet chi low eb, axca yalon leyalil eb, xan yob max can eb yul sat eb, yuj maj tx'aj eb k'ab. Yuj tu xin, max al-lay eb cuywom tu' yobal yuj eb.

³A eb fariseo tu', c'al masanil eb yet israelal, beybalnebilc'al beybal yichmam eb yuj, xan ta c'am chi cam tx'ajon eb k'ab axca yalon beybal eb tu', tutun wal c'am chi low eb.

⁴A yet chi jay eb yet chi bet eb txonbal, masantac'al chi cam tx'ajon eb k'ab, catatu chi low eb, axca yalon ley eb tu'. Xiwiltoc'al juntzanxa tzet yetal chi beybalnej eb, axca tx'ajon eb is vaso, c'al ẍalu, c'al masanil mitx'k'ab eb yet loj, c'al bay chi ay chotan eb lowok.

⁵Xan max yal eb fariseo tu', c'al eb meẍtol yin ley Moisés bay Jesús axca ti': —¿Tzet yuj xan c'am chi beybalnej eb a cuywom juntzan beybal eb jichmam? Yob chi can eb, yujtol c'am chi tx'aj eb k'ab chi low eb, ẍi eb.

⁶Axa yalon Jesús bay eb tu': —Ayex ti' caw wal cabsat ex. Yel ton ta' tzet albilcan yuj Isaías e yin, yet max tz'ibencan axca ti' yul tx'an Un Tz'ibbilcanok: A jun conob ti', yinc'al k'anejal ay is watx' k'anej chi yal ayin, palta a wal yanimail eb, najat tx'uman el win.

⁷Nabac'al chi tz'ak yiay ba eb ayin, yujtol asan juntzan chekbanil anima chi yak' eb cuylayok, ẍi Dios yul tx'an Un tu'.

⁸Ayex ti', max e bekcan chekbanil Dios, axa cuybej eb jichmam che beybalnej.*fn*

⁹Yujc'al e beybalnen juntzan beybal eb tu', xan che bekcan e beybalnen chekbanil Dios.

¹⁰Max yalcan Moisés axca ti': Ayokab yelapnok e mam c'al e txutx yul e sat, ẍi. A mac chi baj is mam ma is txutx, ak'layokab camok, ẍi c'apaxok.

¹¹Palta a e yalon ayex ti', tol man yowalilok chi colwaj junok mactxel bay is mam, ma bay is txutx. Ilab ta ay junok mac chi alon bay eb axca ti': C'am chi je' in colwaj ayex, yujtol masanil tzet ay ayin, yet-xa Dios yayji, ta ẍi, xiwil watx'il che yabej.

¹²Ta ay mac chi alon axca tu', manxa yowalilok chi colwaj bay is mam c'al bay is txutx, e yaloni.

¹³Cac'al ton tu' che yut e yintaknen el chekbanil Dios, axa beybal eb jichmam che yak' cuylayok. Cax xiwiltoc'al juntzanxa che beybalnej axca juntzan ti', ẍi Jesús bay eb.

¹⁴Max lajwi tu xin, max yawtenpaxtek Jesús eb anima tu' junelxa. Max yalon bay eb axca ti': —Abek e masanil tzet ok wala'. Nachajokab el e yuj.

¹⁵A tzet chi octok yul co ti', c'am chi je' jetax el yuj yul sat Dios. A juntzan tzet chi tit yin co nabal, a' chon etnen el yul sat Cham, ẍi bay eb.

¹⁷Max lajwi tu xin, max el Jesús xol eb anima tu', max octok yul na yetok eb is cuywom. Max k'anlen el eb bay: —¿Tzet chi yal elapnok jun cuybanil max al ti'? ẍi eb bay.

¹⁸Axa yalon bay eb tu': —¿Tom c'am chi nachaj c'apax el e yuj ayex ti'? ¿Tom man e yojtakok, tol a tzet chi toj yul co ti', c'am chi je' jetax el yul sat Dios yuj?

¹⁹Yujtol manak bay co nabal chi apni. A yul co c'ul chi ayapnok, lajwi tu xin chi eli, ẍi bay eb. Caytu' max yut yalon axca tu', tol a jantakc'al tzet chi lojic'alta'a, c'am yowalil yuj Dios.

²⁰Max yalon c'apax junxa ti' bay eb: —A juntzan tzet chi tit yin co nabal, a' chon etnen el yul sat Dios.

²¹Yujtol a yin co nabal chi pitzc'oj aj juntzan yob nabalej ti'. Ay mac ayxa yetbi, cax chi yunen mul yetok junokxa mactxel. Ay eb man yetbiok ba, cax chi yunen mul. Ay eb chi mak' cam yet animail.

²²Ay eb chi elk'ani. Ay eb chi ochen oc tzet ay junokxa. Ay eb c'am watx'il chi yut ba. Ay eb chi yak' lek'tial. Ay eb c'am chi q'uixwi yunen junok tzet yetal q'uixwiltak. Ay eb chi chichon oc c'ul yin junok mactxel yuj tzet ay. Ay eb comonc'al chi buchboni. Ay eb chi maynej ba, ay c'apax mac c'am is nabal.

²³A juntzan yobtakil ti', a yin co nabal chi pitzc'oj ajok. A' chon etnen el yul sat Dios, ẍi Jesús.

²⁴Max lajwi tu xin, axa toj Jesús bay yul makbej Tiro. Max apni bay jun na, maj yochej max abchaj ajok ta ayic' bay tu', palta max abchaj ajok.

²⁵A bay tu' ay jun ix ix ay jun yune' ix unin, ayoc espíritu yob yin. Max yab ix txutxej tu' k'umal, tol max apni oc Jesús bay tu', axa toj ix bay Cham, max bet ay jajan ix bay.

²⁶A jun ix ix tu', man israelok ix, aj Sirofenicia ix. Max tewi ix bay Jesús, tol chi yiil espíritu yob ayoc yin ix yune' tu'.

²⁷Palta max yal Cham bay ix axca ti': —Nojokab c'ul eb uninalej yin babelal. Man watx'ok ta chi tok'lay ec' lobej eb, cax chi ak'lay bay no yune yal tx'i, ẍi.*fn*

²⁸Axa tak'wi ix bay Cham: —Yel ton Mamin, palta a no yal tx'i', chi sic'aj no' c'ajil lobej eb uninalej chi ayc'ay yalan meẍa, ẍi ix bay.

²⁹Yuj tu' xan max yal Cham bay ix axca ti': —A yuj tzet max al ayin tu', chi je' chach pax bay atut, yujtol mayal el espíritu yob yin ix one' tu', ẍi bay ix.

³⁰A yet max apni ix bay yatut, max yilon ix, telan aj yune' ix tu' sat tx'at, mayal el jun espíritu yob tu' yin ix.

³¹Max el Jesús bay Tiro bay ayic' tu xin, max ec' bay conob Sidón, c'al bay juntzan conob ay yul yet Decápolis. Max lajwi tu', max jay bay ti a' mar Galilea.

³²Axa yet ayic' bay tu', max yion jay juntzan anima jun winak c'am chi je' yabeni bay Jesús, c'am wal chi je' c'apax k'anjab jun winak tu'. Max tewi eb bay Cham yuj yaon oc k'ab yiban nak.

³³Axa yion el Cham nak tx'oklil xol anima tu'. Max yaon octok Cham jun yiximal k'ab yul txiquin nak, max tzubeni. Max lajwi tu xin, max oc matxan yin yak' nak.

³⁴Axa yaj t'anan Jesús satcan, max c'oli jay is c'ul. ¡Efata! ẍi, (chi yal elapnok ¡Jakchajokabcanok!)

³⁵A wal yet jun bek tu', max jakchajcan txiquin nak anima tu', max watx'ji c'apaxcan yak' nak, axa k'anjab aj yin tx'ijanil tu'.

³⁶Max lajwi tu', max cam c'ul Jesús yalon bay eb anima tu' axca ti': —Ayta wal bay che yal jun ti', ẍi bay eb. Palta a yet max yalon bay eb axca tu', yelxac'al max yalil eb.

³⁷Caw wal max c'ayaj c'ul eb anima max abeni, max yalon eb axca ti': Caw watx' chi yun watx'nen masanil tzet yetal. Chi jakchaj txiquin eb c'amc'alta' chi je' yaben yuj, cax chi k'anjabcan aj eb c'amc'alta' chi je' k'anjabi, ẍi eb.