Read Q'anjob'al Mc 8 Bible Online

Mc 8 - Q'anjob'al bible

Mc 8

¹A yet jun tiempoal tu', xiwil anima max waj ba yin Jesús, palta c'am jabok lobej eb. Yuj tu' xan max yawtejtek eb is cuywom c'atan, axa yalon bay eb tu':

²—Caw chi ok' in c'ul yin juntzan anima ti', yujtol oxebxa c'u yayji ec' eb jetok; a tinani' c'amxa tzet chi lo eb.

³Ta c'am chi low eb cax chin chekon pax eb bay yatut, chi mi telc'oj eb yulak be yuj wajil, yujtol ay eb najat cajan, ẍi bay eb is cuywom tu'.

⁴—Palta, ¿tzet wal ok jak' lo eb bay jun tz'inan tx'otx' ti'? ẍi eb cuywom tu' bay.

⁵—¿Jayeb ixim pan ibil oc e yuj? ẍi bay eb. —Ukeb ixim, ẍi eb bay.

⁶Axa chekon ay chotan Jesús eb anima tu' sat tx'otx'. Max yion aj ixim pan tu' yukebal, axa yalon yuj diosalil yuj ixim tu'. Max bijon ec'ok, max yak'on bay eb is cuywom. Axa eb max pojontok xol anima tu'.

⁷Ay c'apax jun cac'on no txay yetbi eb. Max yalon c'apax Cham yuj diosalil bay Dios, cax max yalon bay eb is cuywom tu', tol chi pojic' eb no' xol eb anima tu'.

⁸Max low eb masanil, watx' max yun noj c'ul eb. A yet max lajwi low eb tu', ukebto motx max nojcan yuj ixim bijquiltakil maxto cani.

⁹Ay mi pax canebok mil eb max lowi. Lajwi tu xin, axa yalon toj ba Jesús bay eb tu'.

¹⁰Max octok yul barco yetok eb is cuywom, axa toj bay yulak yet jun lugar chi yik Dalmanuta.

¹¹Ay juntzan eb fariseo max jayoc bay Jesús. Max c'oli teyelen ba eb yetok, yuj yak'on porobal eb, xan max k'an eb yil junok milagro chi tit bay Dios.

¹²Axa c'oli jay c'ul Jesús, max yalon axca ti': —¿Tzet yuj xan che k'an e yil junok milagro ayin? Wal yel chi wal ayex, c'am junok milagro ok tx'oxlay e yila', ẍi Cham.

¹³Max lajwi tu', max el c'atan eb fariseo tu', cax max octok yul te barco tu' junelxa yetok eb is cuywom. Axa k'axpoj ec' eb bay jun pac'xa a' mar tu'.

¹⁴Majc'al na' eb cuywom Jesús tu' yi' is pan yul te barco. Asan ch'an jun jenan ixim yetbi eb.

¹⁵Axa yalon Cham bay eb tu' axca ti': —Abek, che yilc'al e ba yuj yich pan eb fariseo, c'al yuj yich pan Herodes, ẍi bay eb.

¹⁶Axa yalubtanen eb cuywom tu' yuj tzet max yal tu': —Ax pax yuj c'am co pan ibil, xan caytu' chi yala', ẍi eb.

¹⁷Yojtak Jesús tzet chi yal eb, yuj tu' xan max yal bay eb axca ti': —¿Tzet yuj xan che yalubtanej tol c'am e pan ibil e yala'? ¿Tom c'amto chi nachaj el e yuj? ¿Tom manto e yojtakok, tzet chi yal elapnok jun ti'? C'amtoc'al chi jay e nabal.

¹⁸¿Tom c'am che yil xin, tom c'am che yabej? ¿Tom c'amxa che natek?

¹⁹A yet max in pojon ec' ixim oyeb pan xol anima, ¿jayebto motx maxto nojcan yuj ixim maxto cani? ẍi bay eb. —Lajcawebto motx, ẍi eb.

²⁰—Axa pax yet max in pojon ec' ixim ukeb pan xol eb caneb mil anima, ¿jayebto motx maxto nojcan yuj ixim maxto cani? ẍi. —Ukebto motx, ẍi eb.

²¹—¿Tzet xan c'amtoc'al chi nachaj el jabok e yuj xin? ẍi bay eb.

²²Max lajwi tu', max jay eb bay conob Betsaida. Axa yilay jay jun winak c'am chi je' yilwi bay Jesús yuj anima. Max k'anon eb bay, tol chi yaoc k'ab yiban nak.

²³Axa yoc mitx'an Cham yin k'ab nak tu', max quetzon el Cham ti' conob. Max yaon oc Cham jab tzub yin sat nak tu'. Max yaon oc Cham k'ab yiban nak. Max lajwi tu', max k'anlen Cham bay, ta chixa je' yilon jabok.

²⁴Axa yak'len nak yilon tu', max yalon nak bay Cham: —Chixa wil yec'jab anima, asan tol axca te te' chi wila', ẍi nak.

²⁵Xan max yaoc Cham k'ab yiban sat nak junelxa. Axa watx'jixac'al yilon nak tu' sic'libil.

²⁶Max lajwi tu xin, axa chekon pax Cham nak bay yatut tu'. Max yalon bay nak axca ti': —Manchak ach ec' yul conob, ẍi Jesús bay nak.

²⁷Max lajwi tu', max ec' Jesús yetok eb is cuywom bay juntzan aldealak bay Cesarea Filipos. Max k'anlen Cham yulak be bay eb: —¿Mac in txel yalon eb anima, che yabej? ẍi bay eb.

²⁸—Ay eb chi aloni, tolab Juan cham ak'om bautismo ach yal eb. Ay eb xin, tolab Elías ach yalon eb. Ay mac xin, tolab chekbej Dios ach, ec'nak ach ab payxa, ẍi eb cuywom tu' bay.

²⁹—A pax ayex ti', ¿mac in txel e yaloni? ẍi bay eb. Axa tak'wi Pedro bay axca ti': —Ach ti', ach ton Cristo ach, ẍi bay.

³⁰Axa yalon Jesús bay eb tu': —Ayta bay e yalil jun ti', ẍi bay eb.

³¹Axa c'oli yalon bay eb cuywom tu' tzetak yetal ok jayoc yiban. Max yalon axca ti': —Ayin ti', Chekbilintek yuj Dios xol eb jet animail ti', palta yowalil xiwil yailal ok eq'uel wiban. A eb ichamtak winak ay yopiso, yetok eb yajawil sacerdote, c'al eb meẍtol yin ley Moisés, ok in yintaknej el eb. Ok in yak' cam eb, palta a yet cabjial tu', ok in ictzoj ajok, ẍi bay eb.

³²Jichanc'al max yut yalon Jesús juntzan ti' bay eb. Axa yilay el Cham tx'oklil yuj Pedro, max yak'len tenon oc wanaj yaloni.

³³Axa toj t'annaj Jesús yin eb is cuywom tu'. Max tenchanen Pedro; max yalon bay axca ti': —Ach Satanás, elan in satak, yujtol manak tzet chi na' Dios cha na'. Asan yin yet anima ayoc a nabal, ẍi bay.

³⁴Max lajwi tu xin, max yawten eb is cuywom c'al yetok juntzanxa eb anima. Max yalon bay eb: —Ta ay mac chi yochej chi ec'c'al cuywok wintak, yowalilokab manxa yetok ba yul yet. Yabokab eb yail wuj, caxc'al chi alay oc eb yin curus. Ta bekan c'ul eb axca tu', ec'okabc'al eb cuywok wintak.

³⁵Yujtol a eb c'am chi yochej chi cam bay yulyibank'inal ti', chi bekil eb jun k'inalej tol ayc'al yin tojbalk'inal. A pax eb chi bekc'ulok cam wuj xin, c'al yuj k'anejal colbanilej, a ton eb tu' ok chaon k'inalej tol ayc'al yin tojbalk'inal.

³⁶K'inalok ta chi ji' masanil tzet ay yulyibank'inal ti', palta c'am pax colbanil janimail, ¿tzet wal chi ji' yin axca tu'?

³⁷¿Tzet wal ok jak' manbalok colchaj janimail tu'?

³⁸A wal anima yet jun tiempoal ti', manak yin Dios chi yaoc eb is nabal, caw yob eb. Ta ay mac chi q'uixwi aj wuj satak eb, cax chi q'uixwi c'apax aj yuj in k'anej, ok in q'uixwok c'apax aj yuj eb, ayin Chekbilintek yuj Dios xol eb jet animail ti', yet ok in jay yetok yikbej in Mam, c'al eb yángel asan Cham ay yet.