Read Q'anjob'al Lc 11 Bible Online

Lc 11 - Q'anjob'al bible

Lc 11

¹A yet junel max txajli Jesús. A yet max lajwi txajli, ay jun cuywom max alon bay axca ti': —Mamin, ¿c'am mi chon a cuy yin txaj, axca max yut cuyon Juan eb is cuywom? ẍi bay.

²Axa yalon Cham bay eb axca ti': —A yet chex txajli, cayti' che yut e yalon axca ti': Ach co Mam,*fn* mimanokab yelapnok a bi. Jayan ul ak'on Yajawilal cayti'.*fn*

³Ak' co lobej on yet junjun c'u, co k'ana'.

⁴Jo c'ay co yobtakil, axca chi jut co joon c'ay yobtakil*fn* eb ay tzet chon uteni. Manchak on a cha' ikbelaytok yin yobtakil, quex chi.

⁵Maxc'al lajwi yalon Jesús juntzan tu xin, max yalon pax axca ti': —K'inalok ay junok ex chi jayoc junok e yamigo ayex yet chuman ak'bal, chi ul yalon ayex axca ti': Ach wamigo, ay jun wamigo, ato wal jay ti', najat ta petoj. C'uxan c'am pax jabok tzet watx' wak'on lo' xan ak' in q'uex jabok tzet watx' wak' bay, ta ẍi chi jay ayex.

⁶

⁷K'inalok toc'al chex tak'wi pax eltok bay axca ti': Manchak in ul a teyej. Mayal waoc tz'utz'al in na ti'. Lananxa in way yetok eb wunin sat tx'at. Yuj tu' xan c'am chi je' waj wan wak'on tzet cha k'an ayin tu', k'inalok quex chi eltok bay.

⁸Ayin chi wal ayex, ta che yak'a', man wal yujok tol e yamigo, xan chex aj wan e yak'on tzet chi k'an tu', palta yujtol chi awjic'al octok ayex, xan che yak' atac'ala' jantak chi oc yuj.

⁹Yuj tu' xan chi wal pax ayex: K'anek, cax ok yak'on Dios ayex. Sayek, cax ok ilchaj e yuj. Awjanek octok ti puerta, cax ok jaklay ayex.

¹⁰Yujtol tzanc'al mactxel chi k'anoni, chi cha'. Axa mac chi sayon ec'ok, chi ilchaj yuj. Axa mac chi awji octok ti puerta, chi jaklay bay.

¹¹A ayex mamej ex ti', ta chi k'an e yuninal junok txay ayex, ¿xin ta a junok labaj che yak' bay?

¹²Ta a junok jos chi k'an ayex, ¿xin ta a junok no alacrán che yak' bay?

¹³A ayex ti', caxc'al yob ex, palta e yojtak che yak' tzet yetal watx' bay e yuninal. Akxa ta' wal co Mam ayic' bay satcan, chi yak' Cham Espíritu Santo bay eb chi k'anon bay, ẍi Jesús bay eb.

¹⁴A yet junel, ay jun nak anima ayoc espíritu yob yin. C'am jabok chi je' k'anjab nak yuj. A Jesús max yiil jun espíritu yob tu' yin nak. A yet max el yin nak, max je' k'anjab aj nak, xan xiwil max c'ayaj c'ul eb anima yuj.

¹⁵Palta ay eb max alon axca ti': —A jun Jesús ti', chi ton je' yion el espíritu yob yin anima, yujtol a Beelzebú, a ton yajawil eb espíritu yob tu' ayoc yetok, ẍi eb.

¹⁶Ay juntzan eb xin, tol max yochej eb max yak'lej yikban ayc'ay Jesús, xan max k'an eb yil junok milagro chi tx'oxoni tatol ayoc yikbej Dios yetok.

¹⁷Palta yojtakxa Cham tzet lanan naon eb, yuj tu' xan max yal bay eb axca ti': K'inalok ay junok miman conob bay chi pojchaj eb yajaw, cax chi yak'len aj eb owal, chi lajwi ay jun conob tu'. K'inalok ay junok nail eb anima chi pojchaj yuj owal, chi lajwi ayok.

¹⁸Cayton c'apax tu' Satanás, ta chi pojchaj yetok eb yet espíritual yob tu', ¿xin ta chi mayji yikbej? Chi wal juntzan ti' ayex, yujtol ayin ti' che yala' tol yuj yikbej Beelzebú chi wioncan el eb yet espíritual yob.

¹⁹Palta ta yel che yala', ¿mac pax ayoc yetok eb e cuywom yet chi yion el eb eb espíritu yob yin eb anima? Ilab xin, acaw wal eb e cuywom tu' chi tx'oxoni tol che yak' c'aytok e ba.

²⁰Ayin ti', a yikbej Dios chi wak'balnej cax chi wion el eb espíritu yob tu'. A ton yin jun ti' chi txecloj elok tol mayal chaoc Dios yak'on Yajawilal e xol.

²¹K'inalok ay junok winak caw wal ay yip. Ay is mitx'k'ab yet owal, yet watx' chi je' colon yatut. Tok subojxac'al yelk'anelaytok is tzetak yetal.

²²Palta k'inalok ta chi jayoc junokxa mactxel yel ec'ban yip yintak nak tu'. Ta chi ayc'ay nak aj na tu' yuj, chi yiic' masanil is mitx'k'ab nak ayoc yipok c'ul tu'. Chi lajwi tu', chi pojon ec' masanil is tzet yetal nak tu'.

²³A eb manak wetok ayocok, ajc'ul oc eb win. A eb c'am chi colwaj wajban oc wetok, a ton eb chi ak'on saklemcantok.

²⁴K'inalok ay junok espíritu yob chi el yin junok anima tinani'. Chi ec' bay lugarlak takin, yuj sayon ec' bay watx' chi xewi, palta c'am chi ilchaj bay watx' chi ayji, xan chi na' axca ti': Ok in meltzoj bay ec'nak in cajayok, ẍi.

²⁵Axa yet chi meltzoj tu xin, chi yilon oc jun anima tu', lajan axca junok na q'uisbil, caw wal watx' yili.

²⁶Xan chi toj yitek ukwanokxa yet espíritual yob, tol ec'banxa is yobtakil yintak, cax chi watx'nenxac'al oc cajan ba eb yin jun anima tu'. Yuj tu' xan yelxac'al yob chi yun yeloc jun anima tu' yintak yet babelal, ẍi Jesús.

²⁷A yet lanan yalon Jesús juntzan tu', ay jun ix ix max awji aj xol eb anima: —Caw wal watx' yet ix ix ayach yune', ix max cach imtzeni, ẍi ix bay.

²⁸Max yalon Jesús axca ti': —Yelxac'al ec'ban watx'il yet eb chi aben k'anej Dios cax chi yikeni, ẍi.

²⁹Xiwil anima max oc oyan yin Jesús, axa yalon bay eb tu' axca ti': A wal eb anima yet jun tiempoal ti', caw wal yob eb. Yuj tu' toc'al chi k'an eb junok milagro yila', junok chi tx'oxon yikbej Dios, palta asan jun milagro ok tx'oxlay yil eb, a ton junok axca jun max tx'ox Dios yin jun is chekbej chi yik Jonás.

³⁰A Jonás tu' max tx'oxon el is mayk'ak'al Dios bay eb anima aj conob Nínive payxa. Axca Jonás tu', cayin ton tu' ayin Chekbilintek yuj Dios xol eb jet animail ti', ok in tx'oxil mayk'ak'al Dios satak eb anima yet jun tiempoal ti'.

³¹Ilab c'apax jun xal yajaw bay Sur yet payxa. Caw wal najat titnak xal, max ulic' xal abxalwok bay cham Salomón, yujtol caw wal ay is jelanil cham. Tinani', ti' pax wal ec'ban in yintak Salomón tu', palta c'am chi ulic' anima abxalwok ayin. Yuj tu' xan ato yet ok jayoc jun c'ual yet ok ex beyc'ulnelayok, ok aj wan xal, cax ok yalon aj xal e yobtakil.

³²A yet max ec' yalon Jonás yabixal Dios bay eb aj Nínive, max na ba eb. Axa tinani', ti pax wal ec'ban in yintak Jonás tu', palta tok yuj tu' che na e ba. Yuj tu' xan ato yet ok jay jun c'ual yet ok ex beyc'ulnelayok, cax ok aj wan eb aj Nínive, ok yalon aj eb e yobtakil tu'.

³³A yet chi jaon oc co tzektebal, c'am bay chi co c'ubaj el bay man txequelok. C'am bay chi jaoctok yalan junok cajón, palta a yiban junok tzet yetal can batxan ajok, a tu' chi jajtok, yet watx' chi tzektanelay eb ayoctok yul na yuj.

³⁴A co bak' sat, axca tol is tzektebal co mimanil yayji ocok. Yuj tu', ta junnej tzet bay ayoc co sat, sakk'inal on chi yal tu', cax watx'c'al tzet chi el junen yetok co mimanil. Palta ta ayex tx'ok tx'ok bay che yaoc e sat, chex cancan xol k'ekk'inal yuj.

³⁵Che yilc'al e ba xin, yet watx' a e tzektebal, manchak q'uexpoj oc yin k'ekk'inalil.

³⁶Ta sakk'inal yayji e mimanil masanil, ta c'am jabok k'ekk'inal ayex, sakk'inal ex toni. Axca junok tzektebal chex tzektaneni, axca tu' chi yun sakbi e nabal, ẍi Jesús.

³⁷A yet max lajwi yalon Jesús juntzan tu', ay jun cham fariseo max iontok Cham low bay yatut. Yuj tu', max toj ton bay na tu', max ay chotan low yetok cham.

³⁸A cham fariseo tu', max c'ayaj c'ul cham yuj, yujtol maj tx'aj Jesús k'ab axca is beybal eb cham tx'ajon yet.

³⁹Axa yalon Cham Jajawil tu' bay cham axca ti': —Ayex fariseo ex ti', lajan ex wal axca junok tol asan yinlak vaso c'al plato chi sakbanej, yujtol a e nabal, asan elk'an nabil e yuj, yetok tzet yetal man watx'ok.

⁴⁰Caw c'am e nabal, ¿tom man e yojtakok tol a jun mactxel watx'nenej juntzan tzet yetal chi jil ti', a' c'apax max watx'nen juntzan tzet yetal c'am chi jila'?

⁴¹Aktam yetok e nabal che tx'ox e watx'il. Ta caytu' che yut axca tu', ok watx'jok aj e yanimail, c'al e nabal. Chi yal elapnok c'amxa tzet yob ayoc e yin.

⁴²Ok'bal ex c'ul, ayex fariseo ex ti'. Che yak' wal diezmoal an alawen, yetok an ruda. Tz'akanxac'al che yak' diezmoal masanil itaj.*fn* Palta a e naoni tol man yowalilok watx' che yut e nabal, man yowalilok che camc'ulnej Dios. Matawal tol a juntzan ti' che beybalnej, cax c'am che bek e beybalnenc'alta' juntzan beybalnebilxa e yuj tu'.

⁴³Ok'bal ex c'ul, ayex fariseo ex ti'. A bay nail e wajayil yin culto, asan bay chi ay chotan eb mimek winak che yochej chex ay chotanok. Yetok c'apax yet chex ec' yulak calle, che yochejxac'al chi yiay ba eb anima ayex.

⁴⁴Ex meẍtol yin ley Moisés, c'al ex fariseo, caw ok'bal ex c'ul. Caw wal cabsat ex. Lajan ex axca bay mukan junok camnak manxa txequelok bay mukan.*fn* Chi ec' eb anima yiban, palta man yojtakok eb ta ay mac mukan bay chi ec' tec'ton eb tu', ẍi Jesús.

⁴⁵Lajwi yalon Jesús jun tu', ay jun cham meẍtol yin ley Moisés max alon bay axca ti': —Meẍtol, a yet max alon juntzan ti', ayon ti' man watx'ok max jab c'apaxok, ẍi cham bay.

⁴⁶Max yalon Jesús bay: —Ok'bal ex c'apax c'ul ayex meẍtol ex yin ley Moisés ti'. A juntzan e chekbanil lajan wal axca junok ikatz c'am chi lacchaj jabok juj. Toc'al che bulbaj aj ikatz che yak'on yik eb anima, palta tamwal chex oc matxan e k'eoncan aj jabok yikatz eb tu'.

⁴⁷Caw wal ok'bal ex c'ul, yujtol chi bet e ca watx'nej aj is mukbanil eb chekbej Dios yiban bay mukan eb mak'bil cam yuj eb e yichmam yet payxa.

⁴⁸Yuj tu', a yet che yunen juntzan tu', lanan e tx'oxon elok tol watx' yutnak ba eb e yichmam e naoni. Yujtol a ton eb mak'nej cam eb chekbej Dios tu'; ayexxa chi bet e tz'ak e watx'nej aj is mukbanil eb yiban.

⁴⁹Yuj tu' max yalcan Dios yetok is jelanil axca ti': Ok in chektek juntzan eb ok alon el in k'anej e nan e xol, yetok juntzanxa eb in chekbej. Ay eb ok e mak' camok. Ay eb toc'al ok e yetnej yetok yailal, ẍi Dios.

⁵⁰Yuj tu', masanil eb chekbej Dios mak'bilxa cam yecheltax c'al yel yich yulyibank'inal ti', ok ak'lay eb e cargonej mac ex ayex ec' yet jun tiempoal ti'.

⁵¹Xiwil eb chekbej Dios mak'bilxa camok, yecheltaxc'al max mak'lay cam Abel, masantac'al yet max mak'lay cam Zacarías, jun ak'bil cam nan xol altar yetok templo Dios.*fn* Palta ayin chi wal ayex, masanil eb mak'bil cam tu', ok ak'lay eb e cargonej mac ex ayex ec' yet jun tiempoal ti'.

⁵²Ok'bal ex c'ul ex meẍtol yin ley Moisés, yujtol munilc'al max e tz'ak e yaoc e yopiso e jakon nabal eb anima yetok k'anej Dios, palta ilab c'am che ya pax oc e nabal yin k'anej Cham. Axa eb chi yochej chi yaoc c'ul yin, c'am che cha' c'apax yaoc eb c'ul yin, ẍi Jesús bay eb.

⁵³Max lajwi yalon Jesús juntzan ti', axa tit yowal eb meẍtol yin ley Moisés tu', yetok eb fariseo tu' yin Cham. Xiwil juntzan tzet yetal max tz'ak k'anlej el eb bay Cham.

⁵⁴Max yechbanej eb yabej, ta ay tzet yob ok yut yaloni, cax chi yak'on queja eb yaloni.