Read Q'anjob'al Lc 12 Bible Online

Lc 12 - Q'anjob'al bible

Lc 12

¹A yet junel, xiwil milal bisil eb anima max waj ba bay Jesús. Chi tec'lejxac'al tok ba anima yujtol toxanej chi witz'itz'i, axa yalon Jesús yin babelal bay eb is cuywom axca ti': Che yilc'al e ba yuj yich pan eb fariseo, a ton is cabsatil eb.

²Yujtol masanil jantak tzet makan ay tinani', ok txecloj ajok. Yetok jantak tzet ewanc'uan yayji, ok ak'lay ojtaknelay elok.

³Yuj tu', masanil tzet max e yal yin ewantakil, ok yab eb anima masanil. Yetok masanil tzet max e saj alnej yul txiquinej, ok al-lay el xol anima yulak calle.

⁴Axa ayex ti' ex wamigo, chi wal ayex, manchak ex xiw bay eb chi je' yak'on cam e mimanil ti', yujtol a yet chi xew e cam yuj eb, c'am junokxa tzet chi je' el yunen eb e yin.

⁵Palta ok wal ayex bay moj chex xiwi. A bay Dios, a tu' chex xiwi, Cham tol chi xew e yak'lay cam yuj, ay pax is yikbej ex yaontok bay infierno. A ton bay Cham tu' moj wal chex xiwi.

⁶Ilab no coq'uiẍ tz'iquin tinani', c'am yelapnok no'. Chi txonlay oc'on no' yin cab centavo, palta ilbilc'al no' masanil yuj Dios.

⁷Ayex ti' caw wal miman e yelapnok yintak no'. Toltax e xil, bisbil masanil yuj Cham. Yuj tu', manchak ex xiwi.

⁸Chi wal ayex, tzanc'al mac c'am chi q'uixwi yalon satak yet animail tol wet, ayin Chekbilintek yuj Dios xol eb jet animail ti', ok waloc eb wetok satak eb yángel Dios.

⁹Palta a eb chi alon satak yet animail tol man wetok, ok wal c'apax satak eb yángel Dios tol man wetok eb.

¹⁰Tzanc'al mac chi alon junok tzet yetal win, chito je' yak'lay tan is yobtakil tu'; palta a mac chi buchon Cham Espíritu Santo, a jun tu bian, c'amxa chi ak'lay tan is yobtakil tu' yiban.

¹¹A yet ok ex ilaytok bay nail wajayil eb jet israelal, ma yet ok ex ilaytok satak eb juez, c'al eb yajaw, manchak ex oc il yuj tzet ok e yut e paktzen eb. Manchak ex oc il yuj tzet ok e yala'.

¹²Yujtol a yet ok jay tiempoal e yalon tu', a Cham Espíritu Santo ok ak'on tzet watx' ok e yala', ẍi Jesús bay eb.

¹³A xol eb anima tu', ay jun mactxel max alon bay Jesús axca ti': —Meẍtol, al bay jun wuẍtak, tol chi yak' jabok wet yin jantak tzet max can yuj co mam on, ẍi bay Jesús.

¹⁴Palta max yal Cham bay axca ti': —Ach anima, ¿mac max ak'on wopiso woc e juezalok, cax chex in watx'nen elok? ẍi Cham bay.

¹⁵Max lajwi tu', axa yalon bay eb anima tu' axca ti': —Chi cam e yiloni, cax che taynenc'al e ba, yet watx' c'am junok tzet yetal comonc'al che yochej ocok. Man yujok tol xiwil tzet ay ayon, xan tzalojc'ulal jet bay yulyibank'inal ti', ẍi Jesús.

¹⁶Maxc'al lajwi tu', axa yalontek jun abix ti' bay eb: A junel, ay jun winak caw wal beyom. Xiwil sat is yawoj max el sat is tx'otx'.

¹⁷Yuj tu', max na' axca ti': ¿Tzetlaj ok wutej, yujtol c'amxa bay watx' ok in wajbaj sat wawoj ok wi' ti'? ẍi jun winak tu'.

¹⁸Max lajwi tu', max naon pax nak axca ti': ¡A…, tix ok wut ti'! Ok wuchay juntzan in c'una ti', cax ok in watx'nen juntzanokxa mimek ok wutej. A tu' ok in wajbaj sat wawoj ti', c'al masanil tzet ay ayin.

¹⁹Ok lajwok tu', cax ok in naon axca ti': A tinani', xiwil tzet max in wajbaj, caw miman tiempo ok in k'anbalnej. Yuj tu', chi je' chin xew tinani'; chi je' chin lowi, c'al wuq'uena', jantakc'al chi wochej. Chi je' wak'on tzalojbok in c'ul, quin chi ok waloni, ẍi nak.

²⁰Palta max yal Dios bay nak axca ti': Ach ti', caw wal c'am jabok a nabal. Yet-xac'al jun ak'bal ti', ok ach camok; axa pax jantak tzet ok a wajbaj aj tu', ¿mac ok ion can cha na'? ẍi Dios bay nak.

²¹Axca ton jun winak tu', cayton tu' ok yun yeloc eb lanan wajban is beyomal yuj yoc yetok tx'oklil, ta c'am pax tzet lanan wajban eb yin yet Dios, ẍi Jesús bay eb.

²²Max lajwi tu', max yalon Jesús bay eb is cuywom axca ti': Chi wal ayex xin, manchak ex oc il yuj tzet chi yun yec' tiempo e yuj cayti', yuj tzet che lo'. Manchak ex oc c'apax il yuj e pichil.

²³A Dios chi ak'on co cawil. Akxata' tzet ok co lo', ¿xin ta man ok yak'a'? A' max ak'on co mimanil ti', akxata' co pichil, ¿xin ta man ok yak' che na'?

²⁴Ilab no joj tinani', c'am yawoj no', c'am jabok tzet chi jatx'aj no', cax chi wajban no'. C'am is c'una no', c'am bay watx' chi c'ubaj no' jabok tzet yetal; palta a Dios chi ak'on masanil tzet chi lo no'. Ayex ti', caw miman e yelapnok yintak no' yul sat Cham.

²⁵¿Ma ay junok ex chi je' e yaon oc nanokxa vara tz'akil e tel yujc'al chex oc il?

²⁶Xan ta c'am chi je' e watx'nen juntzan c'am yelapnok ti', ¿tzet yuj xan chex oc il yuj juntzanokxa tzet yetal xin?

²⁷Iek e nabal yin tzet chi yun ch'ib an xumaquil ac'un tinani'. A an xumac tu', c'am chi mulnaj an, tamwal chi tx'alwi c'apax an; palta chi wal ayex, a cham rey Salomón, caxc'al xiwil watx'il yili cham yetok is pichil, palta majc'alta' apnok yili cham axca an xumac tu'.

²⁸A an xumac tu', watx' yili an tinani', palta yecal, chi tz'a an yul horno. Caxc'al cac'al tu' chi yun lajwinaj el an, palta a Dios chi ak'on watx'il yili an tu'. Akxam ayex ti', ok yak'c'alta' e pichil. Palta ijan tol txennejc'al pax e yaon oc e c'ul yin Cham.

²⁹Manchak ec' yiban e naon xin. Manchak ex oc il yuj tzet che lo', c'al yuj tzet che yuq'uej.

³⁰Yujtol a eb man ojtaknenok Dios, asan yin juntzan tu' bay ayoc nabal eb; palta yojtakxa co Mam Dios tol chi oc c'apax yopiso juntzan tu' e yuj.

³¹Yuj tu xin, ak'ek e yip e watx'nen oc e ba yul k'ab Dios. Ta che yut caktu', ok ak'lay masanil juntzan ti' ayex.

³²Ayex ti' axca tol in calnel ex. Manchak ex xiwi. Jaywannej ex toni, palta a co Mam Dios chex ion oc yul is k'ab, yujtol axca tu' max yun yel yin c'ul.

³³Txonekcan el masanil tzet ayex, cax che saontok tojol xol eb meba'. Axca ton tu' ok e yut e watx'nen caẍail e tumin c'am bak'in chi ichambi. A ta satcan ok wajnaj juntzan axca e beyomal tu'. A juntzan tu', c'am bak'in ok lajwok. C'am junok elk'om ok je' yapni yelk'anen bay tu'. Yetok c'apaxok, c'am c'apax no ij ok oc yin bay tu'.

³⁴Yujtol, a bay chi co wajbaj co beyomal, a tu' chi ja c'apaxtok co nabal.

³⁵Makwajanek, axca wal junok mosejal ayoc is pichil, tzekbil pax is tzektebal yuj makon jay is patrón.

³⁶K'inalok ay juntzanok mosejal lanan yechbanen jay is patrón aytok bay junok k'in nupayil. A yet chi jay bay na, cax chi awji octok, watx'xac'al yayji eb jakon yin aymanil. Axca chi yut yechbanen eb mosejal is patrón tu', caytu' che yut e ba ayex ti'.

³⁷A eb mosejal c'amto chi wayajok cax chi jay is patrón tu', caw wal watx' yet eb. Wal yel chi wal ayex, a wal caw cham patronej tu', ayman ok q'uexil ba, axa chotban ay eb is moso tu' lowok, cax ok yak'on serbil cham eb.

³⁸Caxc'al chuman ak'bal, ma yet toxa chi sakbi, cax chi jayi, ta c'amto chi way eb is moso tu' chi jayi, caw wal watx' yet eb.

³⁹Nachajokab el jun abix ti' e yuj. K'inalok ay junok elk'om chi oc elk'an yul yatut junok anima. Matawal yojtak jantak hora chi jay jun elk'om tu', toc'alta' chi maka', cax c'am chi chaoctok elk'an bay yatut tu'.

⁴⁰Yuj tu', cayexokab tu'. Makwajanek, talaj yet man naanok el e yuj chin jay ayin Chekbilintek yuj Dios xol eb jet animail ti', ẍi Jesús bay eb is cuywom tu'.

⁴¹Yuj tu' max k'anlej Pedro bay Cham axca ti': —Mamin, ¿asannej mi ayon bay max al jun abix ti', ma yuj masanil anima ti' xan max ala'? ẍi.

⁴²Axa yalon Cham bay eb tu' axca ti': K'inalok ay junok patrón tinani'. Ta ay junok is moso yikem cax jelan paxok, a ton jun tu' chi yaoc cham yikbej yiban eb masanil, yuj taynelay eb, c'al yuj yak'lay low eb junjuntak el. Palta ¿mactet junok eb mosejal tu' yikem che na'?

⁴³A ton nak lanan mulnaj axca wal chi yochej c'ul is patrón tu' yet ok jayok. Caw wal watx' yet jun mosejal tu'.

⁴⁴Wal yel chi wal ayex, ok yaoc cham nak mosejal tu', yajawilal yiban jantak tzet ay yul is k'ab.

⁴⁵Palta k'inalok ta a' chi yut naon jun mosejal tu' tol mantoc'al ok jay is patrón tu', cax chi c'oli mak'ontaj eb yet mosejal, c'al eb ix criadaejal, cax asanc'al loj chi yunej, c'al uq'uej an.

⁴⁶A yet c'ual man echbanebilok yuj, cax ok jay is patrón nak mosejal tu'; a ton yet tu' ok jayoc tzac'naj cham, junelnej wal man yojtakok nak ta a yet jun bek tu' chi jayi. Axa yak'lay yailal nak sic'libil yuj cham tu', cax ok yaoncantok cham nak bay ayic' juntzan eb maj yaoc c'ul yin Dios.

⁴⁷K'inalok ta ay junok mosejal yojtak tzet chi yochej c'ul is patrón chi watx'nej, palta c'am chi yak' yip, cax c'am chi yikej tzet chi yal is patrón tu'. A jun mosejal tu', caw wal miman yailal ok cha'.

⁴⁸Palta k'inalok ta ay junokxa mosejal man yojtakok, cax chi watx'nen juntzan tzet yetal tol moj yikon tz'um yuj. A jun tu', txennej tz'um ok yika'. A eb miman tzet ak'bil bay, miman tzet ok k'anlay el bay eb. Yetok eb miman tzet abenebilcan bay, yowalil miman tzet ok yak' c'apax eb.

⁴⁹Ayin ti' max quin jay yuj ul waon oc jun k'ak'ej bay yulyibank'inal ti'. Matawal lananxa culxi tinani'.

⁵⁰Ay wal jun miman yailal ok jay wiban, axca tol ok in ak'lay bautizar yuj. Caw wal ay jun in miman cusc'ulal tinani' masantac'al ok yunel jun tu'.

⁵¹¿Ma yuj ul wak'on junc'ulal yulyibank'inal ti' xan max quin jay e naoni? Wal yel c'amak. Palta yuj yak'len aj eb anima owal in yailok, xan max in jayi.

⁵²K'inalok ay owanok anima bay jun na, oxwan ajc'ul oc yin cawan, axa cawan ajc'ul oc yin oxwan. Cay wal tu' ok e yun yet jun tiempoal lanan jay ti'.

⁵³Ay eb mamej ok yak'lej owal yetok eb is c'ajol. Yetok c'apaxok, ay eb txutxej ok yak'lej owal yetok eb ix yune'. Ay eb xal alibej ok yak'lej owal yetok is yalib, ẍi Jesús bay eb.

⁵⁴Max yalon c'apax Jesús juntzanxa ti' bay eb anima tu': A yet che yiloni, tol chi tit asun bay yayub c'u, jun bek che yala': Ok jay nab, quex chi. Yel ton che yala', chi jay nab.

⁵⁵Yetok c'apax yet chi tit cak'ek' bay sur, che yal c'apax axca ti': A tinani', ok yak' k'ak', quex chi. Yelc'al che yala', chi yak' k'ak'.

⁵⁶Palta ayex ti' caw wal cabsat ex. Jelan ex ton e naon el tzet chi jayoc yuj juntzan che yilaj satcan tu', c'al sat tx'otx' ti', palta, ¿tzet xan pax c'am chi nachaj el e yuj tzet chi yal elapnok juntzan yechel chi tx'oxon tzet lanan yunen Dios?

⁵⁷¿Tzet yuj xan man munilok che beyc'ulnej tzet yetal watx' yul sat Dios?

⁵⁸K'inalok ay junok mactxel chex iontok satak cham alcal. Aokab yet lanan e toj yul be yetok, cax che yak'on e yip e watx'nen ay yetok, yet watx' c'amxa chex yitok satak cham tu'. Yujtol ta mayal ex apni satak alcal tu', chex yaoc cham yul k'ab eb policía, axa ex yiontok eb preso tu'.

⁵⁹Chi wal ayex, tol man ok ex beklay elok, masantac'al tol tz'akan che yak'can e multa masanil, ẍi Jesús.