Read Q'anjob'al Lc 14 Bible Online

Lc 14 - Q'anjob'al bible

Lc 14

¹A yet jun c'ual xewilal max betic' Jesús low bay yatut jun sat fariseo. C'uxan ay pax juntzanxa eb yet fariseoal chi makon ilonok.

²Ay jun winak ayic' satak Cham bay tu', malnak aj yuj jun ilya'.

³Axa yalon Jesús bay eb meẍtol yin ley Moisés tu', c'al bay eb fariseo axca ti': —¿Ay mi leyal chi jak' watx'jok c'ul junok ya'ay yet c'ual xewilal, ma c'amak? ẍi bay eb.

⁴Palta tz'inxac'al, ẍi eb. Axa yoc mitx'an Jesús yin nak ya'ay tu', max yak'on jaycan c'ul nak. Max yalon bay nak tol chi paxi.

⁵Maxc'al lajwi tu', axa yalon bay eb fariseo tu' axca ti': —K'inalok ay junok ex ay junok e yuninal, ma xin ay junok e wacax chi toj yul junok xab olan yet c'ual xewilal, ¿xin ta c'am chi toj e yiajtek yin aymanil? ẍi bay eb.

⁶Palta majxa nachaj paktzen eb jabok bay.

⁷Max yilon Jesús, tzet max yut ba eb awtebil low yetok bay jun loj tu', tol a bay chi ay chotan eb mimek winak, a tu' chi ay chotan eb.*fn* Yuj tu' max yal bay eb axca ti':

⁸—Ta ay bay chex awtelay bay junok k'in nupayil, manchak ex ay chotan bay chi ay chotan eb mimek winak. C'uxan talaj chi apni oc junokxa awtebil, tol caw miman yelapnok e yintak.

⁹Axa talaj yalon cham awtenej ex tu' ayex axca ti': Elanek yul juntzan ẍila ti', cax che yak'on bay eb cham ti', ẍi talaj e yutelayi. Yuj tu', yowalil axa xol eb c'am jabok yelapnok chex apni ocok. Caw wal chi el e q'uixwil.

¹⁰A yet chex awtelay tu xin, watx' a xol eb c'am yelapnok chex apni oc chotanok, yet watx' a yet chi jayoc cham awtenej ex tu', chi yal ayex axca ti': Ex wamigo, ayanek chotan bay chi ay chotan eb mimek winak tu', ẍi, ok yalon ayex. Axca tu' bian, caw wal miman e yelapnok yul sat eb ayoc e yetok yin meẍa tu'.

¹¹Tzanc'al mac chi yiaj can ba, ok ilay ayok, c'amxa jabok yelapnok ok yun yelcan apnok. Palta eb chi yiay ba, a eb ok ilay aj can, a ton eb miman ok yun yelapnok, ẍi Jesús.

¹²Max lajwi tu', axa yalon bay nak awtenej tu' axca ti': —A yet cha watx'nen mimanok loj, manchak awtej eb watx' ak'on yetok. Manchak awtej c'apax eb a mam c'al oẍtak, eb ecan yetok eb beyom cajan a cawilal. Yujtol a eb tu', ok ach yawtej pax eb low yetok. Axa a chaon pax q'uexel et tu'.

¹³Palta a yet cha chaon junok a k'in, asan eb meba' chawtej low etok, eb man tz'akanok is mimanil, axca eb c'am chi je' beyi, c'al eb c'am chi je' yilwi.

¹⁴Ta caytu' ok ot axca tu', caw wal watx' et chi yal tu', yujtol a eb tu', c'am jabok q'uexel ok je' yak'on eb ayach, palta a yet ok ach ictzoj yetok eb watx' is beybal, cax ok a chaon paktzil, ẍi Jesús bay nak.

¹⁵A yet max yaben jun nak ayoc yin meẍa tu' is k'anej Jesús, max yalon nak bay axca ti': —Caw wal watx' yet eb ok loon pan bay ayoc Dios yin Yajawil, ẍi nak bay.

¹⁶Axa yalon Jesús junxa abix ti': —A junel, ay jun winak max watx'nej jun miman loj cax xiwil anima max yawtej low yetok.

¹⁷Axa yet max ajapnok yorail yoc jun loj tu', max chekontok jun is moso toj yalon bay eb awtebil yuj tu' axca ti': Asek. Mayal apni yorail yoc loj, mayal watx'ji, ẍi bay eb.

¹⁸Palta junjunc'al eb, max yal eb tol maj je' toj eb. Max yal nak babel axca ti': Tol ay jun in tx'otx' tolto max in mana', xan yowalil chi toj wila'. Chak' mimanc'ulal win, maj in tok, ẍi.

¹⁹Max yalon junxa axca ti': Tol ay o mojan in mulnajwom wacax max in mana'. Yowalil ok tok wak' porobal no', tzetbil mulnaj no'. Matawal chak' mimanc'ulal win, ẍi nak.

²⁰Max yalon c'apax junxa axca ti': Tolto max oc wetbi. Yuj tu' xan maj je' in toji, ẍi.

²¹A yet max jay nak mosejal tu', max yal nak masanil tzetc'al max yut tak'wok ba eb bay. Yuj tu' xan caw wal max tit yowal cham patronej tu'. Max yalon cham bay jun is moso tu' axca ti': Asi' yin aymanil yulak calle, c'al yulak beal jun conob ti'. Chi toj eontek eb meba', eb man tz'akanok is mimanil, eb c'am chi je' beyi, c'al eb c'am chi je' yilwi, ẍi cham bay.

²²Max xew betic' jun mosejal tu', max yalon bay is patrón tu' axca ti': Mamin, ti mayal bet wi eb max al tu', palta colantoc'al, ẍi bay cham.

²³Axa yalon is patrón tu' bay axca ti' junelxa: A tinani', asi' bay juntzanokxa calle, c'al bay juntzanokxa be. Chi toj ak'on pural eb anima tita', yet watx' ok noj na ti' yuj eb.

²⁴Chi wal ayach, c'am junok eb babel awtebil wuj tu' ok je' low bay jun miman loj chi wak' ti', ẍi cham patrón tu'. Caytu' yalon jun abix ti', ẍi Jesús.

²⁵A yet junel, xiwil anima tzakan yintak Jesús, xan max meltzojtok acan bay eb, max yalon bay eb axca ti':

²⁶Ta ay mac chi jay ayin, palta yelxac'al miman yelapnok is mam c'al is txutx wintak naoni, ma yetbi, ma yuninal, ma yuẍtak, ma yanab, c'al is k'inal, ta caytu' naon axca tu', maj je' yec'c'al cuywok wintak.

²⁷A eb c'am chi yal c'ul chi beybalnej in beybal, c'al yaben yail wuj axca ok wun yin te curus, maj je' yec'c'al eb cuywok wintak.

²⁸K'inalok ay junok ex che yochej che watx'nej junok e yatut, mimantak che yochej che yutej. A yet c'amto che mitx' oc e watx'neni, ¿xin ta c'am chi cam e naon yin babelal jantak tumin chi lajwi yin; catatu' che yiloni ta chi yab e tumin yin yion ba?

²⁹Ta c'am chi cam e naon yin babelal, asannej mi yich chi aycanok, cax c'am chi yi ba e yuj. Axa eb chi iloni tol c'am chi yi ba, chex al-lay yuj eb.

³⁰Chi yalon eb e yin axca ti': A jun winak ti', max tz'ak chaoc watx'nennaj jab yatut, palta majc'al yi ba yuj, ẍimi eb.

³¹K'inalok ay junok rey, chi toj yak'lej owal yetok junokxa yet reyal, palta asan pax ch'an 10,000 is soldado chi yitok yetok. Axa junxa tu', ay pax 20,000 yet ibil. A yet c'amto chi toj jun txennej yet tu', ¿xin ta c'am chi cam naon sic'libil ta ok tzakay yetok eb is soldado tu'?

³²Ta maj tzakay chi yab xin, chi yatok is chekbej bay junxa rey tu' yet najatto ay, tol chi k'anlej tzetbil chi yun tan jun owal tu'.

³³Yetok c'apaxok, tzanc'al mac ex txel c'am chi yal e c'ul che bekcan tzetak yetal ayex, maj je' e yec'c'al cuywok wintak.

³⁴A atz'am atz'am watx' ay yopiso atz'am, palta k'inalok ta chi c'ay is c'achial, ¿tzetto wal ok yun c'achibi paxok?

³⁵C'amxa yopiso. Caxc'al chi alay ay sat tx'otx', caxc'al chi toj somilok abono, tutun c'amxa yopiso. Toxac'al chi k'oklay elok. A juntzan max e yab ti', naobtanejek sic'libil, ẍi Jesús bay eb.