Read Q'anjob'al Lc 18 Bible Online

Lc 18 - Q'anjob'al bible

Lc 18

¹Max yaltek Jesús jun abix bay eb is cuywom, yuj yalon yab eb tol watx' chi txajlic'al eb masanil tiempo, cax c'am chi ispay yuj eb.

²Max yalon bay eb axca ti': A junel, ay jun cham juez bay jun conob. C'am Dios yul sat cham, c'am c'apax yet animail yul sat.

³A bay jun conob tu', ay jun xal ix camnakxa yichamil. Junjunc'al c'u chi ulic' xal satak cham tu'. Chi ul yalon xal axca ti': Ay wal jun anima ayoc c'ul win. ¿C'am mi chon a watx'nej el yetok? ẍi xal.

⁴Palta c'amc'al chi yal c'ul cham chi watx'nej el jun owal tu'. Yuj tu' xan cac'al ti' waxi ec' xal. Palta c'ojanc'ulal max na cham axca ti': Ayin ti' c'am yelapnok Dios yul in sat. C'am c'apax yelapnok junok anima ayin.

⁵Palta a jun xal ix ti', junjunc'al c'u cayc'al ti' yulic' xal ayin. Yuj tu', ok in watx'nej yayji jun is yowal xal tu'. Ta c'amak, majxa talaj techaj xal wuj, ta ac'ala' jay xal ayin, ẍi cham.

⁶Caytu' max yut naon cham juez yob is nabal tu'.

⁷A eb sic'bil el yuj Dios chi yal ba eb bay Cham c'ualil c'al ak'balil, ¿man mi ok watx'nej el Cham bay eb? ¿Xin ta pural ok watx'nej el Cham tzet chi yochej eb tu'?

⁸Chi wal ayex, ok watx'nelay el eb yuj yin aymanil. Palta a yet ok in jay junelxa, ayin Chekbilintek yuj Dios xol eb jet animail ti', ¿ayc'al mi mactxel chi yaocc'al c'ul yin Dios yet tu'? ẍi Jesús bay eb.

⁹A junxa abix ti', max yaltek Jesús bay juntzan eb watx' is beybal yalonnaji. A eb tu', c'am watx'il juntzanokxa anima yul sat eb. Yuj tu' xan max yal Cham bay eb axca ti':

¹⁰Ay cawan winak max bet txajlok bay templo Dios. Fariseo jun, tekom el tojlabal junxa.

¹¹A jun fariseo tu', lecan ajok max txajli axca ti': Ach in Diosal, chi wal yuj diosal ayach yujtol ayin ti', may in lajanok axca juntzanokxa anima. A eb anima tu', caw wal elk'om eb, man watx'ok beybal eb, chi mulji eb. Yetok c'apax jun nak tekom el tojlabal ti', yuj wal dios yujtol may in lajanok yetok nak.

¹²Yujtol ayin ti', cayel chin oc yin c'ajbanc'ulal junjun semana. Yetok c'apaxok, chi wak' diezmoal masanil tzet chi wi', ẍi, chi tz'ak yalon bay Dios.

¹³A jun tekom el tojlabal tu', najatta lecantek. Caw wal chi xiw c'ul, tok max aj t'anan jabok satcan. Toc'al max mak' txam is c'ul yuj cusc'ulal, max yaloni: Ach in Diosal, c'am mi chi ok' a c'ul win jabok yujtol caw wal yobtakwom in sic'libil, ẍi bay Dios.

¹⁴Chi wal ayex, a jun tekom el tojlabal tu', yet-xac'al jun bek tu', max al-lay watx'il yuj Dios, yet c'amto chi pax bay yatut. Axa jun fariseo tu xin, maj yal Dios tatol watx' yul sat Cham. Yujtol a mac chi yiaj can ba, chi ilay ayok. Axa mac chi yiay ba, chi ilay aj can, ẍi Jesús.

¹⁵Ay mac max ion jay juntzan unin bay Jesús, yuj yaon ajtok Cham k'ab yiban eb; palta a yet max yilon eb cuywom axca tu', axa tenon oc wanaj eb tu', eb chi ion jay eb unin.

¹⁶Axa yalon Cham bay eb tu' axca ti': —Chaek jay eb unin ayin. Man e tenoc wanaj eb, yujtol asan eb lajan nabal axca eb unin ti', asan eb ay yalon yet yoc yul k'ab Dios.

¹⁷Wal yel chi wal ayex, a eb c'am chi cha Dios is yajawilok axca chaon junok unin, c'am bak'in ok oc eb yul is k'ab, ẍi Jesús bay eb.

¹⁸Ay jun yajaw max k'anlej bay Jesús axca ti': —Mamin Meẍtol watx', chin k'anlej ayach: ¿Tzet yetal yowalil chi wunej, cax chin chaon k'inalej tol ayc'al yin tojbalk'inal? ẍi nak bay.

¹⁹—¿Tzet yuj xan chin al watx'il? Jun ch'an mactxel watx', asan Dios.

²⁰Ojtakxa juntzan chekbanil chi alon axca ti': Manchak aoc a mul yul k'ab etbi. Manchak a mak' cam et animail. Manchak ach elk'ani. Manchak a naaj k'anej yin et animail. Ayokab yelapnok a mam c'al a txutx yul a sat, ẍi juntzan chekbanil, ẍi Jesús bay.

²¹—Chixa wikej masanil juntzan chekbanil tu' yet max in titoc yin uninal, ẍi nak bay.

²²—Palta junto wal a tz'aknaj elok, xan asi', txoncan el masanil tzet ay ayach, cax cha pojontok tojol tu' xol eb meba'; catatu' bian ok a chaon a beyomal bay satcan. Chi lajwi tu xin, chach jay pax ayin junelxa, cax chach ec'c'al cuywok wintak, ẍi Jesús bay.

²³A yet max yaben nak juntzan tu', caw wal max cusaj c'ul nak, yujtol caw wal beyom sic'libil.

²⁴A yet max yilon Jesús tol max cusaj nak, axa yalon axca ti': —A wal eb beyom ti', ta ok oc eb yul k'ab Dios, ya puralil ok yun yoc eb.

²⁵K'inalok junok no camello tinani', ¿xin ta chi eq'uel no' yul yixal junok acuẍa? Caytu' eb beyom, ta ok oc eb bay ok yak' Dios yajawil, caw wal ya puralil ok yun yoc eb, ẍi Jesús.

²⁶Axa yalon eb max aben juntzan k'anej tu' axca ti': —Ta caytu' axca tu xin, ¿mac wal txel ok je' colchaji? ẍi eb.

²⁷—A juntzan c'am chi je' yuj anima, chi je' yuj Dios, ẍi Jesús bay eb.

²⁸Axa yalon Pedro bay Cham axca ti': —Mamin, ayon ti', max co bekcan masanil co tzetak yetal, cax max on ec'c'al cuywok entak, ẍi.

²⁹Axa yalon bay eb tu' axca ti': —Wal yel chi wal ayex, a eb chi bekcan yatut, ma yistzil, ma is mam, ma is txutx, ma yuẍtak, ma yanab, ma yuninal, yujtol asan Cham Dios Yajaw chi yochej eb chi yak' serbil,

³⁰yelxac'al miman ok yun chaon eb yet jun tiempoal ti'. Axa yet jun tiempoal ok jay yajtok tu', ata tu' ok cha eb is k'inal tol ayc'al yin tojbalk'inal, ẍi Jesús bay eb.

³¹Axa yawten Jesús eb is cuywom lajcawanil tu' tx'oklil. Max yalon bay eb axca ti': A tinani', ti lanan jajektok bay Jerusalén. Ata tu' ok yunel masanil tzet tz'ibbilcan yuj eb chekbej Dios payxa, yet max yaloncan el eb wabixal ayin Chekbilintek yuj Dios xol eb jet animail ti',

³²cax ok in alay oc yul k'ab eb man israelok. Ok in is buchon eb. Ok yalon eb tzet yetal yob win, cax ok tzublok oc eb win.

³³Ok in mak'lay pax yuj eb. Ok lajwok tu', cax ok in yak'on cam eb, palta a yet cabjial tu', ok in ictzonelay pax ajok, ẍi Jesús bay eb.

³⁴Palta maj nachaj el jabok yuj eb. Man yojtakok eb jabok tzet chi yal elapnok juntzan max yal tu', xan maj nachaj el yuj eb.

³⁵A yet lanan yapni oc Jesús bay conob Jericó, ay jun nak c'am chi je' yilwi, chotan ay ti be. Lanan k'anon sabal bay anima chi ec' yul be tu'.

³⁶Max yaben nak tol xiwil anima chi bil bey yul be tu'. Axa k'anlen nak yab tu', tzet yuj xiwil eb chi beyi.

³⁷Axa yal-lay bay nak, tol a Jesús aj Nazaret chi ec' tu'.

³⁸Yuj tu', max aj yaw yin ipejal axca ti': —Jesús, ach yinatil David, ¿c'am mi chi ok' a c'ul win? ẍi nak bay.

³⁹Axa eb babel satak Cham max tenchanen nak, yet watx' chi tz'inji, palta tol max aj can yel yaw nak: —Ach yinatil David, ¿c'am mi chi ok' a c'ul win? ẍi.

⁴⁰Axa yoc wanaj Jesús, max yak'on bet tit nak. Max lajwi jayoc nak c'atan Cham, max k'anlen bay nak axca ti':

⁴¹—¿Tzet chochej chach wutej? ẍi bay nak. —Mamin, chi wochej cha jak in sat ti', ẍi nak bay Cham.

⁴²—Jakchajokab can a sat. Ti mayal watx'ji, yujtol max aoc a c'ul win, ẍi Jesús bay nak.

⁴³Yet wal jun bek tu', max jakchaj sat nak. Yuj tu xin, max tzakloj nak yintak Cham. Max yalon nak watx' k'anej bay Dios. Yetok c'apax masanil eb max ilon jun tu', max yal eb is watx' k'anej bay Dios.