Read Q'anjob'al Lc 19 Bible Online

Lc 19 - Q'anjob'al bible

Lc 19

¹Max apni oc Jesús bay conob Jericó, cax max ec'jab yul conob tu'.

²Ay jun anima beyom bay tu', chi yik Zaqueo. Sat tekom el tojlabal yayji bay jun conob tu'.

³Axa Zaqueo tu', caw wal chi yochejc'al chi yil yin Jesús, tzetbil wal yili, palta c'amc'al chi je' yiloni, yujtol xiwil anima oyan oc yin Cham yet chi beyi, yetok c'apaxok, yuj yaliẍ tel Zaqueo tu'.

⁴Yuj tu' xan max k'ok babjok ba, yak'on yip. Axa yajtok xol k'ab jun te sicómoro ti be tu', yuj yilon yin Jesús yet chi ec' yich jun te' tu'.

⁵A yet max eq'uel Cham yich te te' tu', max ajtok t'anan Cham yin, max yalon Cham bay axca ti': —Zaqueo, ayantek ayman, yujtol a bay atut ok in apnok wak' in posada, ẍi ajtok bay.

⁶Maxc'al yab Zaqueo tu', max aytek lemnaj yin ayman, max chaon apnok yin tzalojc'ulalil bay yatut.

⁷A yet max yilon eb anima axca tu', xiwil tzet chi yal eb yin Jesús, yujtol max apni oc yak' posada bay yatut jun yob is beybal.

⁸Axa yaj lecan Zaqueo tu', max yalon bay Cham Jajawil axca ti': —A tinani' Mamin, jantak tzet ay ayin, nanc'al ok wiayok. Axca wet ok canok, caytu' yet eb meba' ok wak'a'. Ta ay eb max wetnej, ta ay eb max welk'anej is tumin, canebxa ok wut wak'on q'uexel bay eb, ẍi.

⁹Axa yalon Jesús bay axca ti': —A tinani', mayal cha eb aj na ti' is colbanil, yujtol wal yel, yinatil c'apax Abraham jun winak ti'.

¹⁰Ayin Chekbilintek yuj Dios xol eb jet animail ti', max quin jay yuj in sayon eb c'aynaktok, cax chin coloncan el eb, ẍi Jesús.

¹¹A yet lanan yaben eb tzet chi yal Jesús, ay jun abix max yaltek bay eb. Yujtol lanan yapni oc eb cawilal Jerusalén, cax chi naon eb tol a Dios toxa chi occan yajawilal bay yulyibank'inal ti'.

¹²Yuj tu' xan max yal Cham bay eb axca ti': A yet junel, ay jun winak max toj bay jun conob najat yuj toj chaon yopiso, yuj yoc yajawilal bay is conob bay cajan.

¹³A yet c'amto chi toji, max yawten lajonwan eb is moso. Ay juntzan ch'en tumin mimek sat max yak'can bay junjun eb. Lajanc'al bisil ch'en max yak'can bay eb. Axa yaloncan bay eb axca ti': Ak'ek negocio yetok juntzan ch'en tumin ti', masantac'al chin jayi, cax che yak'on ch'en ayin junelxa, ẍican bay eb. Lajwic'al tu', axa toj tu'.

¹⁴Palta a eb yet conob, caw wal chi chichon oc c'ul eb yin. Yuj tu' xan tzakan toj cawan oxwan is chekbej eb yintak, max bet yalon eb bay eb chi aon oc yopiso cham tu' axca ti': A jun winak tu', caw wal c'am chi yal co c'ul chi oc co yajawilok bay co conob, ẍi eb.

¹⁵Palta max ak'layc'alta' yopiso yoc yajawilal. Max lajwi tu', max jayoc bay is conob. Axa yawten eb is moso bay max yak'can ch'en tumin tu', yuj yaben ocok jantakxa yune' ch'en mayal yi' junjun eb.

¹⁶Xan max jayoc jun babel moso, max yalon axca ti': Patrón, a ch'en a tumin max ak'can ayin, lajoneb yune' ch'en max yi', ẍi bay cham.

¹⁷Axa yalon cham bay tu': Watx' xin. Ach ti' caw wal watx' ach ayin. Caxc'al txench'an max wak'can ayach, palta watx'c'al max ot a nabal yetok. Yuj tu' xan ti chi waoc opiso yin yajawilal yiban lajonebok conob, ẍi bay.

¹⁸Max lajwi tu', max jayoc junxa mosejal. Max yalon bay is patrón tu' axca ti': Patrón, a ch'en a tumin max ak'can ayin, oyebxa bisil yune' ch'en max yi', ẍi bay.

¹⁹Xan max yal c'apax cham patronej tu' bay axca ti': Watx' xin. Ach ti' ok wak' opiso oc yajawilal yiban oyeb conob, ẍi cham bay.

²⁰Max lajwi tu' max jayoc junxa. Max yalon bay is patrón axca ti': Patrón, tix ch'en a tumin ti'. C'uban ch'en wuj yul jun in tx'ambal,

²¹yujtol wojtak, caw wal ch'aan ach. Yujtol ach ti', toxac'al cha cha' tzet chi yi' junokxa anima. Toxac'al cha wajaj bay tzet mayachnak max awa', ẍi bay cham.

²²Axa yalon cham bay axca ti': Ach ti', mosejal ach toni, palta yob ach. Yuj juntzan max al ti', xan ok ach in beyc'ulnej. Ilab, ojtakxa tol ch'aan in. Toxac'al chin cha' tzet yetal chi yi' junok anima. Chin wajaj bay mayinnak max quin awwi.

²³¿Tzet yuj maj apaxtok ch'en majanil bay junokxa mactxel, yet watx' chi yi' ch'en jabok yuca'? K'inalok ta max atok ch'en majanil, yet max in jayi max in chaon yuca' ch'en, ẍi cham bay.

²⁴Max lajwi tu', max yalon bay eb junej ayic' yetok tu' axca ti': Iek ec' ch'en bay nak. Che yak'on ch'en bay nak ay lajoneb bisil yune' ch'en yet max yi', ẍi bay eb.

²⁵Palta patrón, a nak chal tol chi ak'lay ch'en bay nak tu', ayxa lajoneb yune' ch'en yet nak, ẍi eb bay cham.

²⁶Palta chi wal ayex, a mac ayxa yet, ok ak'lay nanokxa bay. Axa mac c'am yet, ok ilay ec' jabok tzet ayxa bay.

²⁷Axa eb ajc'ul oc win, eb max ochen tol maj in oc yin wopiso ti', chi toj e yi eb, chi lajwi jay eb, che yak'on cam eb in satak, ẍi cham patronej tu', ẍi Jesús.

²⁸Max lajwi yalon Jesús jun abix tu', max chaon be toj bay Jerusalén yetok eb is cuywom.

²⁹A yet max apni oc eb cawilal conob Betfagé yetok Betania, bay yich tzalan Olivo, max chekon babjok cawan eb is cuywom.

³⁰A yet c'amto chi toj eb, cax max yalon bay eb axca ti': —Asek bay jun aldea co cawilal ti'. Ay jun no burro ok ilchaj e yuj bay tu', c'alan no'. C'amto junok mac chi aj yiban no'. Che xuyil no', cax che yiontek no' ayin.

³¹Ta ay mac chi alon ayex axca ti': ¿Tzet yuj xan che xuyil no'? ta ẍi, tix che yut tak'wok e ba ti': Tol ay ok oc no' yuj Cham Jajawil, quex chi bay, ẍi Jesús bay eb.

³²Max lajwi tu', axa toj eb cuywom tu'. Max ilchaj yuj eb, axcac'al max yun yal-lay bay eb yuj Jesús.

³³A yet lanan xuyon el eb no burro tu', max jayoc yajaw no', max yalon bay eb axca ti': —¿Tzet yuj xan che xuyil no'? ẍi bay eb.

³⁴—Tol ay ok oc no' yuj Cham Jajawil, ẍi eb.

³⁵Max lajwi tu', max yiontek eb no' bay Jesús. Ay eb anima max ya ajtok is pichil tz'amok no', cax max alay ajtok Jesús yiban no' yuj eb.

³⁶Axa yet lananxa beyi, max c'oli litx'ban ay eb is pichil yulak be*fn* bay t'inan yeq'uel Cham.

³⁷Axa yet lananxa yapni oc bay pitxanil tzalan Olivo tu', max aj yaw masanil eb is cuywom yin ipejal yuj tzalojc'ulal. Max c'oli yalon eb is watx' k'anej bay Dios yuj juntzan milagro max yil eb.

³⁸Max yalon eb axca ti': —Jalek watx' k'anej bay Cham co Reyal max cheklaytek yuj Cham Jajawil. Caw wal ay junc'ulal satcan, mimanbilokab co Diosal, ẍi eb.

³⁹Palta ay juntzan eb fariseo ayoc xol anima tu'. Max yal eb bay Cham axca ti': —Meẍtol, ¿tzet yuj c'am cha tenchanej juntzan a cuywom ti'? ẍi eb bay.

⁴⁰Axa yalon Cham bay eb axca ti': —Chi wal ayex, ta chi tz'inji ay eb, cax c'amxa mac chi aj yaw, axa ch'en ch'en ti' ok aj yaw, ẍi bay eb.

⁴¹A yet max yilontok Jesús conob Jerusalén, yet max apni oc is cawilal, caw wal max ok' yuj.

⁴²Cax max yalon axca ti': A wal yet jun c'u ti' ex aj conob, aktam wal tol max nachaj e yuj tzetbil che yut e chaon junc'ulal Dios. Palta a tinani', c'amxa chi je' nachaj el e yuj, yujtol ebebilxa el ayex.

⁴³Xan ay wal jun tiempoal ok jayok, axa eb ajc'ul yin jun conob ti', ok corralnej aj eb. Ok oymoj eb yinlak, axa yak'on eb owal yin tu'.

⁴⁴Pilan ok mak'ay bulan eb jun conob ti', sat tx'otx'. Ok mak'on cam eb eb anima. A ch'en ch'en latz'bil yin nail bay jun conob ti' ok ec' bulnaj ch'en masanil. Caytu' ok yuncan elok, yujtol a yet jun tiempoal ti', max yochej Dios max tx'ox watx'c'ulal ayex, palta maj nachaj el e yuj, ẍi Jesús.

⁴⁵Max lajwi tu', max octok Jesús yul templo Dios. Max yukten eltek eb chi txonji.

⁴⁶Max yalon bay eb axca ti': —Yalnakcan Dios yul tx'an Un Tz'ibbilcan axca ti': A in templo ti', yetc'al txaj yayji, ẍicanok, palta ayex ti', axcaxac'al junok nach'en bay chi c'ubaj el ba eb elk'om, caytu' che yutej, ẍi bay eb.

⁴⁷Junjunc'al c'u max betic' Jesús cuywaj bay yul templo Dios tu'. Axa eb yajawil eb sacerdote, yetok eb meẍtol yin ley Moisés, c'al eb yajaw conob tu', max say eb tzet chi yut yak'on cam eb.

⁴⁸Palta maj nachaj tzet chi yut eb, yujtol ay wal oc c'ul masanil anima yabxalwi bay.