Read Q'anjob'al Lc 2 Bible Online

Lc 2 - Q'anjob'al bible

Lc 2

¹A yet jun tiempoal tu', a cham Augusto, cham yajaw bay Roma max aloni tol chi ilay aj is bisil masanil anima yulyibank'inal ti'.

²Babelto yilay aj bisil eb junel tu'. A yet ayoc cham Cirenio gobernadoral bay jun lugar chi yik Siria, max ilay aj bisilej tu'.

³Masanil anima max betic' bay is conob yuj bet tz'iben ba.

⁴Yuj tu' xan max betic' José bay Belén yul yet Judea, petoj bay Nazaret yul yet Galilea. A bay max bet tu', a tu' aljinak cham rey David payxa; yujtol yinatil David José tu', xan yowalil a tu' max bet tz'ibej ba.

⁵Max betic' yetok María. Watx'xa yayji trato eb, yobixxa ix.

⁶A yet ayic' eb bay Belén tu', max jay tiempoal yalji jun unin tu',

⁷xan a ta bay tu' max alji nak is babel unin ix. Max chuloc yul balej. Max lajwi tu', cax max telban ay ix jun unin tu' yul jucubal sacate no chej, yujtol c'amxa bay colan bay max ayji eb bay jun mesón ay bay tu'.

⁸A bay cawilal conob Belén tu', ay juntzan ilom calnel chi taynej is calnel yet ak'balil bay jun ac'al.

⁹Jacẍic'al max tx'oxaj ba jun yángel Cham Jajawil bay eb, max ay c'apax ul jopnaj tzekekial Cham Jajawil tu' yiban eb. Caw wal max xiw eb yuj.

¹⁰Axa yalon jun ángel tu' bay eb axca ti': Manchak ex xiwi, yujtol watx' abix jun chi ul wal ayex, caw wal ok tzaloj aj masanil anima yuj.

¹¹A bay Belén, bay is conob David, a tu' max alji jun e Colomal tinani', a ton Cham Cristo, Cham Jajawil.

¹²Axca ti' ok yun nachaj el e yuj tol a': Ok e yil yin tol ayoc is bal, telan ay yul jucubal sacate no chej, ẍi jun ángel tu'.

¹³Jacẍic'al max tx'ox c'apax aj ba junxa miman bulan ángel petoj bay satcan yetok jun babel max tx'oxaj ba tu'. Axa yalon eb watx' k'anej bay Dios axca ti':

¹⁴¡Jalek watx' k'anej bay Dios aj satcan! ¡Ayokab junc'ulal yetok eb anima bay max tx'ox is watx'c'ulal bay yulyibank'inal ti'! ẍi eb.

¹⁵Max lajwi tu', axa paxaj eb ángel bay satcan tu'. Axa c'oli yalon eb waynem calnel tu' axca ti': —Tonek bay Belén, toj jilek jun tzet max uj tu', a ton juntzan max yak' Cham Jajawil al-lay ayon, ẍi eb.

¹⁶Axa toj eb yin aymanil tu'. Max ilchaj María yetok José yuj eb, max yilon eb yin jun unin tu' yul jucubal sacate no chej.

¹⁷A yet max yilon eb yin jun unin tu', pilan max yal eb tzet yetal max al-lay yin, yuj jun ángel max ulic' tu'.

¹⁸Masanil eb max aben juntzan tu', max c'ayaj c'ul eb masanil yabeni.

¹⁹Axa pax María xin, toc'al chi c'ubajcan masanil juntzan tu' yul is c'ul, cax chi naobtaneni.

²⁰Max lajwi tu', axa pax eb waynem calnel tu'. Max yalon eb is watx' k'anej bay Dios. Max yalon eb yuj diosalil bay, yuj tzet max bet yab eb, c'al yuj tzet max bet yil eb, yujtol axcac'al max yun yal-lay bay eb, caytu' max uji.

²¹Ukubixial yalji jun unin tu', max alay oc jun yechelej chi yik circuncisión yin is mimanil, cax max yak'on eb yik Jesús. A ton jun biej ti' yalnakcan cham ángel bay María, yet manto oc jun unin tu' yin.

²²A is beybal eb israel, yowalil ay jun tiempoal chi sakbanej ba eb ix chi alji yune', axca yalon ley Moisés. Yuj tu' xan a yet max lajwi tiempoal sakbanen ba María, max yiontok eb jun unin tu' bay Jerusalén. Max bet yak'on eb bay Cham Jajawil.

²³Max yun eb axca tu', yujtol caytu' tz'ibelaycan yul ley Cham Jajawil axca ti': A junjun winak unin chi babji yalji, yet Cham Jajawil yayji, ẍi yul tx'an Un Tz'ibbilcan tu'.

²⁴Yuj c'apax yak'on eb is xajanbal, xan max bet eb. Axca ti' yalon leyal xajanbal: Yowalil cac'onok no paloma, ma cac'onok no cuajte', ẍi.*fn*

²⁵A yet jun tiempoal tu', ayic' jun cham anima chi yik Simeón bay Jerusalén tu'. Caw wal watx' is beybal cham, asan bay Dios chi yal ba. Echbanebilc'al jay tiempoal yuj, yet ok colchaj eb yet israelal. Ayoc cham yalan yikbej Cham Espíritu Santo.

²⁶A' ak'nej nachaj el yuj, tol majto camok masantac'al ok yilcan oc yin Cristo, Cham chekbiltek yuj Cham Jajawil.

²⁷A yet max ilaytek nene' Jesús bay templo Dios yuj José c'al is txutx, yuj yiken eb axca yaloncan yul ley, max ikbelaytok cham Simeón tu' bay templo Dios yuj Cham Espíritu Santo,

²⁸axa chaon ec' cham Simeón tu' jun unin tu', max batxon ajok. Axa yalon watx' k'anej bay Dios yuj axca ti':

²⁹Mamin, a tinani', chixa je' in cam yin junc'ulal, ayin a chekbej in ti', yujtol mayal wal yun axca max ot ak'oncan a ti' ayin.

³⁰Ti wal mayal wilcan oc yin jun Colwajwom ti'.

³¹A ton jun ti' max ak' yopiso satak masanil anima bay yulyibank'inal ti'.

³²A' ok ak'on sakk'inal bay yanimail eb man israelok, axa ayon a conob Israel on ti xin, caw miman ok yun jeloc yuj, ẍi cham Simeón tu'.

³³Axa José yetok is txutx Jesús max c'ayaj c'ul eb yaben tzet max yal cham yin nak unin tu'.

³⁴Max lajwi tu', max k'anon cham watx'c'ulal Dios yiban eb. Max yalon bay María, txutx Jesús axca ti': —Ilabi, a jun unin ti', txequelxa yayji tol xiwil eb jet israelal ok somchaj el c'ul yuj; palta xiwil c'apax eb ok watx'nej is beybal yuj. A' ok tx'oxonok tzetbil chi yun colchaj eb, palta xiwil eb ok intaknenelok.

³⁵Caytu' ok yun txecloj elok, tzet chi na' junjun anima. A pax ach ti xin, ay jun c'ual ok oc pitz'an cusc'ulal yin a c'ul yuj; axca wal espada ok teklay oc en ok abej, ẍi cham Simeón tu' bay María.

³⁶Ay c'apax jun xal ix chekbej Dios ayic' bay tu' chi yik Ana. Cutz'in jun cham chi yik Fanuel, yinatil Aser. Caw wal ixnamxa xal. Max oclej yetbi yet caw unin ixto. Ukebnej abil yilejnak ba xal yetok yichamil tu', cax max cam cham.

³⁷A yet tu', 84 abilxa can xal tx'oklil. Ac'al bay templo Dios ayc'al ec' xal, c'ualil c'al ak'balil, cac'al ti' yak'on serbil xal Cham Jajawil. Chi yak' xal c'ajbanc'ulal, cax chi txajli xal.

³⁸Max jayoc xal c'atan José yetok María yet jun bek tu'. Max yalon xal yuj diosalil bay Dios. Max lajwi tu', max c'oli yalon el xal yabixal Jesús xol jantak eb chi echbanen jay tiempoal colchaj el conob Jerusalén tu'.

³⁹A yet max xew yiken eb axca yalon ley Cham Jajawil yuj eb unin chi alji, axa pax eb bay conob Nazaret tu' junelxa, bay yul yet Galilea.

⁴⁰Axa jun unin tu xin, yelc'ulal ch'ibi. Chi yionc'al el yip c'al jelanil. Max yak'onc'al Dios watx'c'ulal bay.

⁴¹Junjun abil chi betic' is mam c'al is txutx Jesús bay Jerusalén, yuj bet eb iloj k'in Pascua.

⁴²Lajcawebxa abil k'inal Jesús, ajun max bet yetok eb iloj k'in tu', axca yalon ley.

⁴³Lajwic'al k'in tu', cax max meltzoj eb. Axa Jesús xin, max cancan bay Jerusalén, palta man yojtakok is txutx c'al José tu' tatol max cani.

⁴⁴A naon eb, tol max tzakloj yintak eb anima max meltzoj c'apaxok, xan a yet yayc'ualil max sayic' eb xol yican c'al xol yamigo eb.

⁴⁵Palta c'am mac max ilchaj yuj eb. Yuj tu' xan max meltzoj pax eb yintak junelxa, cax max bet sayon ec' eb nak bay Jerusalén tu'.

⁴⁶Cabjialxa tu', max ilchaj nak yuj eb yul yamak'il templo Dios. Chotan ay nan xol eb meẍtol yin ley Moisés. Chi abxalwi bay eb, cax chi yak'on c'apax k'anlebal bay eb.

⁴⁷Toxac'al chi c'ayaj c'ul eb chi abxalwi yin tzet chi yal Jesús, yujtol caw wal yojtak sic'libil, watx'c'al chi yut tak'wok ba bay eb.

⁴⁸A yet max yilon José c'al is txutx tu' tol a tu' ayoctok, caw wal max c'ayaj c'ul eb yuj. Yuj tu' xan max yal is txutx tu' bay axca ti': —Ach wune', ¿tzet yuj xan caytu' chon otej? Caw wal chin oc il oj, c'al a mam ti'. Xiwil chach co sayic'ok, ẍi xal bay.

⁴⁹—Palta, ¿tzet yuj xan chin e sayic'ok? ¿Tom man e yojtakok tol a bay yatut in Mam yowalil chin ayji? ẍi bay eb.

⁵⁰Palta maj nachaj el yuj eb tzet max yal bay eb tu'.

⁵¹Max lajwi tu', axa pax yetok eb bay Nazaret tu'. Yikemc'al max yut ba bay eb axcac'alta' is beybal. Max c'ubaj xal txutxej tu' juntzan ti' yul is c'ul, max c'oli naobtaneni.

⁵²Axa Jesús xin, ac'ala' ch'ibajok, c'al yaj can is nabal. Caw wal chi tzaloj Dios yetok, caw c'apax chi tzaloj eb anima yetok.