Read Q'anjob'al Lc 20 Bible Online

Lc 20 - Q'anjob'al bible

Lc 20

¹Ay jun c'ual max cuywaj Jesús xol eb anima yul yamak'il templo Dios. Max c'oli yalon el k'anejal yet colbanilej bay eb. Axa eb yajawil eb sacerdote, yetok eb meẍtol yin ley Moisés, c'al eb ichamtak winak ay yopiso, max jayoc eb bay.

²Max yalon eb axca ti': —Al ayon xin tzet ekbej, yuj tu' xan max on juntzan tu' ewi. ¿Mactxel ak'nej ekbej tu'? ẍi eb bay.

³—Ayin ti', ok in k'anlej c'apax junok tzet yetal ayex. Alek ayin.

⁴¿Mac ak'nej yikbej Juan, xan max yak' bautizar anima? ¿Dios mi, ma anima? ẍi Jesús bay eb.

⁵Axa c'oli yalubtanen eb is xol tu' yuj tzet max yal tu'. Max yalon eb axca ti': ¿Tzet chi jut jalon bay? Ta chi jala' tol a Dios ak'nej yikbej Juan tu', ok mi yal ayon axca ti': ¿Tzet yuj xan c'am che ya pax oc yin e c'ul xin? ẍi mi.

⁶Palta ta chi jala', tol a anima ak'nej yikbej tu', ok tit yowal masanil anima jin, cax ok on is k'okch'ennen cam eb, yujtol a Juan tu', chekbej Dios yayji yul sat eb masanil, ẍi eb.

⁷Yuj tu', max yal eb tol man yojtakok eb mactxel ak'nej yikbej Juan tu'.

⁸Axa yalon pax Jesús bay eb axca ti': —Ta caytu xin, maj c'apax wal ayex mac ak'nej wikbej wunen juntzan tu', ẍi.

⁹Max lajwi tu', axa yalontek Jesús jun abix ti' bay eb anima wajan ec' tu'. Max yalon axca ti': Ay jun anima max awon juntzan uva sat is tx'otx'.*fn* Max xew yawon canok, max yaon cantok is tx'otx' tu' majanil yetokc'al yawojal bay juntzan eb mulnajwom. Axa yel bay jun lugar tu'. Najatil tiempo max ayji bay junokxa lugar.

¹⁰Axa yet max ajapnok tiempoal wajlay aj an, max chekontok cham aj tx'otx' tu' jun is chekbej, max bet k'anon yuca' tx'otx' tx'otx' tu' yetokc'al yawojal tu', palta toc'al max bet yetnej ba, max uktelay meltzoj yuj eb. C'am jabok yuca' tx'otx' max yi'.

¹¹Xan max chektok cham aj tx'otx' tu' junxa is chekbej, palta toc'al c'apax max bet yetnej ba. C'am watx'il max yut ba eb bay, max yukten pax eb. Ac'ala' c'am jabok tzet max ak'lay bay.

¹²Lajwi tu', max chekontok junxa. Max apnic'al oc junxa tu' bay eb, max mak'on eb, max yasji, max bet k'okoncan el eb.

¹³Axa yalon cham aj tx'otx' tu' axca ti': ¿Tzetlaj watx' chi wutej? Ti chin chektok jun in c'ajol bay caw wal chi camil in c'ul yin ti'. Tekan ok xiw eb bay, ẍi cham.

¹⁴Axa max yilontok eb mulnajwom tol lanan yapni nak c'ajolej tu'. Max wajan alnen eb axca ti': Ilab tol a nak c'ajolej tu' chi jayi. A yet ok cam mam nak, a' ok ioncan tx'otx' tx'otx' ti' satakok. Co mak'ek camok, yet watx' ayonxa chi jiekcan is tx'otx' ti', ẍi eb.

¹⁵Xan maxc'al apni oc nak bay eb, max tzac'ontek eb. Max yiontok eb tiel tx'otx' tx'otx' tu'. Ata tu' max bet yak' cam eb. Xan chin k'anlej ayex, ¿tzettax ok utlay eb mulnajwom tu' yuj cham che na'?

¹⁶A wal caw cham ok tok cax ok tok yak'on lajwok cham eb, axa yaoncantok is tx'otx' tu' majanil bay juntzanokxa mactxel, ẍi Jesús. Lajwi yaben eb max aben jun ti' axa yalon eb axca ti': —¡Ay! Matawal man cayok tu' chi uji, ẍi eb.

¹⁷Palta max oc t'anan Jesús yin eb, max yalon axca ti': —Palta ¿tzettax chi yal elapnok yuj jun ch'en tz'ibbilcan yul tx'an Un che na', bay chi yal axca ti'? A ch'en ch'en max yintaknej el eb watx'nem na, a ch'en max oc yin jolom txiquin na, ẍi yul tx'an Un tu'.

¹⁸Tzanc'al mac chi mak'ay ba yiban jun ch'en tu', coc'xac'al chi yun k'ajtok. Axa junok mactxel chi ayc'ay jun ch'en tu' yiban, coc'xac'al chi yuncan yuj ch'en, ẍi Jesús bay eb.

¹⁹Axa eb yajaw yayji xol eb sacerdote, yetok eb meẍtol yin ley Moisés, max yochej eb tol max mitx' eb Jesús yin aymanil, yujtol max nachaj el yuj eb, tol a eb max al-lay yin jun abix tu'. Palta max xiwaj eb bay eb conob.

²⁰Catatu' max chekontok eb jaywan is chekbej toj makon yila' ta c'uxan ay bay chi el q'uexnaj Jesús yin is k'anej. A yet max apni oc eb tu', watx'xac'al chi tz'ak yut ba eb, yet chi ayc'ay Cham yuj eb yin junok k'anej, yet watx' chi yitok eb satak yajaw.

²¹Axa tz'ak yalon eb bay axca ti': —Meẍtol, jojtak sic'libil tol tojolc'al chot alon junok tzet yetal, watx' pax a cuywaji. C'am junok mactxel bay chach xiwi, yujtol lajanc'al yelapnok junjun mactxel yul a sat. Jojtak c'apaxok, a jun beybalej chi cha c'ul Dios, a chak' cuylay wal yin yel.

²²Yuj tu' xan chi co k'anlej ayach, a ch'en tumin chi k'anlay el jin yuj cham yajaw bay Roma, ¿ay mi leyalil chi jak' ch'en, ma c'amak? ẍi eb bay.

²³Palta yojtakxa Jesús tol man watx'ok tzet lanan naon oc eb yin, yuj tu' xan max yal bay eb axca ti':

²⁴—Tx'oxek junok ch'en tumin tu' wila'. ¿Mactxel jun ayoc yechel sat yin ch'en ti'? ¿Mactxel jun tz'ibbil oc is bi ti'? ẍi bay eb. —A ton yechel sat cham yajaw bay Roma, yetokc'al is bi cham, ẍi eb.

²⁵—Ta axca tu xin, ak'ek tzet yetal yetc'alta' cham yajaw tu' bay. Axa tzet yetal yetc'alta' Dios, ak'ek c'apax bay, ẍi bay eb.

²⁶Maj uj yuj eb yayc'ay yin junok is k'anej satak anima, xan caw wal max c'ayaj c'ul eb. Tz'inxac'al, ẍi eb.

²⁷Max lajwi tu', ay juntzan eb saduceo max jayoc bay Jesús, eb chi aloni tol c'am chi ictzoj aj eb camnak. Axa yalon eb bay Cham axca ti':

²⁸—Meẍtol, a Moisés tz'ibnejcan axca ti': K'inalok ay junok winak chi cami, cax chi can yistzil, palta c'am junok yuninal max elcanok. Axa junok yuẍtak nak chi ioncan ix, yet watx', ta chi el yuninal junxa tu', axca tol yuninal nak camom tu' chi yun yoccanok. Caytu' max yut yaloncan Moisés.

²⁹A junel, ay ukwan winak max ec' co xol ti', yuẍtakc'al ba eb. Max oc yetbi nak babel winak, palta max camtok nak, c'amc'al junok yuninal nak max elcanok.

³⁰Axa nak tzunan yintak nak babel tu' max ioncan ix. Max cam c'apaxtok nak, ac'ala' c'am yuninal nak max elcanok.

³¹Lajwi tu' max yioncan aj nak yet is yox ix ix tu'. Ac'ala'c'al max yun eb nak yukwanil. Max camc'altok eb nak, c'amc'al junok eb nak max elcan junok yuninal.

³²Lajwi camtok eb nak tu', max cam c'apax ix ix tu'.

³³A yet ok ictzonelay aj eb camnak tu', ¿mactxel nak ay yistzil ix sic'libil xin, yujtol max yilej eb nak yukwanil ix ix tu'? ẍi eb.

³⁴Axa yalon Jesús bay eb saduceo tu' axca ti': —A bay yulyibank'inal ti', chi ton yilej ba winak yetok ix.

³⁵Palta a eb ok ictzoj aj xol eb camnak, eb moj yayji ec' yet jun tiempo ok jay tu', c'amxa mac ok yilej ba bay tu'.

³⁶Yujtol a yet jun tiempoal tu', c'amxa camich. Lajanxa ok yun eb axca eb ángel. Caw wal yuninalxa Dios eb, yujtol ok ak'lay ictzoj aj eb.

³⁷Cayc'apax tu' max yak'can Moisés ojtaknelay elok, tol ok ictzonelay aj eb camnak, yet max tz'iben yabixal te q'uix lanan tz'a'i. A bay tu' max yal Moisés tol a Cham Jajawil, tol is Diosal Abraham, Isaac, c'al Jacob yayji.

³⁸Yuj tu' xan, caxc'al camnakxa eb, jojtak tol man junelnejok max c'ayil eb, yujtol max yalcanok tol is Diosal eb yayji. A yul sat Dios, iquis yayji eb anima masanil, ẍi Jesús bay eb.

³⁹Yuj tu' xan max yal juntzan eb meẍtol yin ley Moisés bay: —Yel ton chal, Mamin, ẍi eb.

⁴⁰Xan majxa tec'baj ba eb k'anlen junokxa tzet yetal bay.

⁴¹Axa yalon Jesús bay eb ayic' bay tu' axca ti': —¿Tzet yuj xan ay eb chi alon axca ti': A Cristo, yinatil David? ẍi eb.

⁴²Palta a David max yalcan yul jun Salmo axca ti': Max yal Dios Jajawil bay Cham Wajawil axca ti': Ayan chotan bay in watx' k'ab ti',

⁴³masantac'al ok wacan oc eb ajc'ul oc en batxlubok akan, ẍi Dios bay Cham Wajawil, ẍi David.

⁴⁴Caytu' max yut yaloncan David, tol a Cristo, ayoc is Yajawilok. Yuj tu', txequel tol man asannejok tol yinatil David yayji Cham, ẍi Jesús bay eb.

⁴⁵A yet lananto yabxalwi eb anima masanil, max yalon Jesús bay eb is cuywom axca ti':

⁴⁶Che yilc'al e ba, yet watx' c'am chex etax el yuj beybal eb meẍtol yin ley Moisés, yujtol chi cha c'ul eb yec' yetok juntzan jokquiẍtak pichilej. Chi yochen eb tol toxac'al chi yiay ba eb anima bay, yet chi ec' eb txonbal. Chi yochen eb asan bay chi ay chotan eb mimek winak yul nail wajayil eb yin culto, a tu' chi ay chotan eb. Yetok yet chi watx'ji juntzan loj manxa watx'ilok, asan bay watx' chi yochej eb chi ay chotanok.

⁴⁷Chi yion ec' eb yatut eb ix camnakxa yichamil. Chi lajwi tu', najat chi yut eb yakan is txaj, tzetbilokxac'al chi na' anima tol watx' eb. A wal eb tu', caw wal miman yailal ok jay yiban eb, ẍi Jesús.