Read Q'anjob'al Lc 22 Bible Online

Lc 22 - Q'anjob'al bible

Lc 22

¹A yet lananxa jay tiempoal k'in Pascua, yet chi loon eb israel ixim pan c'am yich,

²max sayon eb sacerdote c'al eb meẍtol yin ley Moisés, tzet watx' ok yut yak'on cam eb Jesús yin ewantakil, yujtol chi xiw eb bay eb conob.

³Ay jun cuywom Jesús chi yik Judas, chi yik c'apax Iscariote. Max aytok Satanás yul c'ul.

⁴Yuj tu' xan max toj k'anjab yetok eb yajawil eb sacerdote, c'al eb yajaw bay templo. Max bet yalon bay eb tzet ok yut yaon oc Jesús yul k'ab eb.

⁵Axa tzaloj aj eb sic'libil tu'. Max yak'on eb trato, tol ok yak' eb tumin bay Judas tu'.

⁶Cax max chaon c'ul tzet max yal eb, axa sayon tzet ok yut yaon oc Jesús yul k'ab eb yin ewantakil tu', yet c'am anima ayic' yetok.

⁷Axa max ajapnok tiempoal loon eb ixim pan c'am yich, yet chi yak'on cam eb no calnel yet Pascua.

⁸Max yalon Jesús bay Pedro yetok bay Juan axca ti': —Asek, watx'nejek tzet ok co lo' yet Pascua, ẍi bay eb.

⁹—¿Baytal chochej chi co watx'nej? ẍi eb bay.

¹⁰—A yet ok ex apnok yul conob, ay jun winak ok ilchaj e yuj. Ibil oc jun moc aej yuj, lanan toj bay yatut. Chex tzakloj yintak, masantac'al chex apni yetok bay chi ca yapni.

¹¹Cax ok e yalon bay cham aj na tu' axca ti': Tix max yut yalon co meẍtol on ti': ¿Baytal ay jun cuarto bay ok in low yetok eb in cuywom, yuj co naontek Pascua ti'? ẍi, quex chi bay.

¹²Cax ok tx'oxon jun cuarto ayex bay can, tol watx'xa yayji. A tu' che watx'nej tzet ok co lo' tu', ẍi Jesús bay eb.

¹³Max lajwi tu', axa toj eb tu'. A yet max apni oc eb, max yilon eb, caw wal yel ton max yal Jesús bay eb. Yuj tu xin, a tu' max watx'nej eb tzet ok lo' yet Pascua tu'.

¹⁴Axa yet max apni oc Jesús yetok juntzanxa eb is cuywom, max oc oyan eb yin meẍa lowok.

¹⁵Lajwi tu', max yalon bay eb axca ti': —Caw wal max yochej in c'ul chin low yet jun Pascuail ti' e yetok, yak'ban c'amto chin cami.

¹⁶Yujtol chi wal ayex, c'amxa bak'in ok in low yet k'in Pascua ti' junelokxa, masantac'al ok oc junokxa Pascua bay ok occan Dios Yajawil, ẍi bay eb.

¹⁷Max lajwi tu', max yion aj jun vaso, max yalon yuj diosalil bay Dios yuj, cax max yalon bay eb axca ti': —Chaek jun ti'. Wajan uc'nejek.

¹⁸Yujtol chi wal ayex, c'amxa bak'in ok wuc' yal sat uva ti', masantac'al yet ok occan Dios Yajawil, ẍi bay eb.

¹⁹Max lajwi tu', max yion aj jun pan, max yalon yuj diosalil yuj. Axa bijon ec' xol eb tu', max yalon bay eb: —A ton in mimanil ok ak'lay e yuj. Loek ixim, yuj quin e naontek, ẍi bay eb.

²⁰Cay c'apax tu' max yut jun vaso, yet max lajwi loon eb ixim pan tu'. Max yalon bay eb axca ti': —A tzet ayay yul jun vaso ti', tx'oxbanil jun is cab trato Dios. Yuj in chiq'uil, xan ok yun jun trato tu', cax e yuj xan ok elok.

²¹Axa tinani xin, a mac ok in aon oc yul k'abej tu', ayoc yin meẍa ti' jetok.

²²Ayin Chekbilintek yuj Dios xol eb jet animail ti', yowalil ok in paxok, atac'ala' yayjicanok, palta a wal jun ok in aon oc yul k'ab camich tu', ok'bal wal c'ul, ẍi bay eb.

²³Yuj tu xan max k'anlej el eb xol yin junjunal, mac wal txel jun ok aon oc Cham yul k'ab camich tu'.

²⁴Ac'ala' yet tu' max teyelen ba eb cuywom yuj mac wal txel junok caw miman yelapnok xol eb,

²⁵palta max yal Jesús bay eb axca ti': A eb rey bay junjun nación, caw wal yajaw chi yut ba eb, yetok eb yajaw, watx' eb yalon eb anima.

²⁶Ayex ti', manchak e yut e ba axca eb yajaw tu'. A mac miman yelapnok e xol, yiokab aytek ba axca junok unin. Yetok c'apaxok, a mac yajaw yayji e xol, yutokab ba yin mosejal.

²⁷K'inalok yet chi oc junok loj tinani', ¿mactxel caw miman yelapnok che na'? ¿A mi mac chi ay chotan lowok, ma a mac chi batxwi eltek loj? A mac chi batxlay low tu', caw miman yelapnok, palta ayin ti', axca mosejal wayji e xol, yin ex wak'on serbil.

²⁸Ayex ti', max e tec'baj e ba e yayji ec' wetok yet max jay juntzan porobalil wiban.

²⁹Yuj tu' xan ok ex waoc yin yajawil, axca ok yun woc yajawilal yuj co Mam Dios.

³⁰Yuj tu' xan ok je' e low wetok yin in meẍa bay ayin oc Yajawilal tu'. Yetok c'apaxok, ok ex ay chotan bay junjunok e trono, cax ok e yak'on yajawilal yiban eb lajcaw makan jet israelal, ẍi Jesús bay eb is cuywom tu'.

³¹Max yalon c'apax Cham Jajawil axca ti': —Simón, ilabi a Satanás max k'an is permiso bay Dios yujtol chi yochej chex txayelay yuj, axca chi yun txayelay ixim trigo,*fn*

³²palta caw wal max in tewi bay Dios oj, yet watx' c'am cheil a c'ul yin Cham. A yet ok meltzoj pax oc a nabal win, aoc tec'anil nabal eb oẍtak, ẍi bay.

³³Xan max yal c'apax Simón tu' bay axca ti': —Mamin, jichan in c'ul woc preso etok, caxc'al ok in cam etok, ẍi bay Cham.

³⁴—Pedro, chi wal ayach, oxelxa quin eon el en, cax ok ok'aj no caẍlan yet jun ak'bal ti', ẍi Jesús bay.

³⁵Max yal Jesús bay eb is cuywom axca ti': —Che natek, yet max ex in chekontok junel, c'am jabok e moral max e yi', c'am e tz'um yet e tumin, c'am e xanab max e yi' max ex toji. ¿Ma ay tzet max majax ayex? ẍi bay eb. —C'am tzet max majax ayon, ẍi eb bay.

³⁶Axa tinani xin, a mac ex ay e moral, c'al e tz'um yet e tumin, iektok e yetok. A mac ex c'am e yespada, txonek el e jokan pichil, cax che manon ch'en e yet.

³⁷Yujtol chi wal ayex, yowalil ok yuncan el masanil tzet albilcan yul tx'an Un Tz'ibbilcanok, bay chi yal axca ti': Max utlay axca chi utlay eb yobtakwom, ẍi yul tx'an Un tu'. Masanil wabixal tz'ib yayji yul tx'an Un tu', lanan yuneni, ẍi Jesús bay eb.

³⁸Axa yalon eb is cuywom tu' bay: —Mamin, tix cab espada ti', ẍi eb bay. —K'okbil, ẍi Cham bay eb.

³⁹Max lajwi tu', max eltek Jesús yul na, axa toj bay tzalan Olivo tu', axcata' is beybal. Max tzakloj eb is cuywom yintak.

⁴⁰Max apnic'al ocok, max yalon bay eb axca ti': —Txajlanek, yet watx' c'am chex ayc'ay yet ay mac chi yak'lej ex yikban yin yobtakil, ẍi bay eb.

⁴¹Lajwi tu', axa beson el ba bay eb tu'. Axcatac'a najatil bay chi apni junok ch'en chi k'oklaytok, caytu' bay max besil ba. Max ay jajan bay tu', cax max txajli.

⁴²Max yal yin is txaj axca ti': Mamin, ta chi el yin a c'ul, cha tenil jun yailal ti' wiban, cax c'am chi wab yail; palta man axcaok chi wochej, palta axcaokab chochej, ẍi yin is txaj.

⁴³Lajwic'al tu', max ayol jun ángel bay satcan, max ul ak'lay is tec'anil yuj.

⁴⁴Caw wal max oc pitz'an cusc'ulal yin is c'ul. Yuj tu' xan max yiajtek c'ulok txajli sic'libil. Caw wal chi el yal, caw wal chi ay t'ujlabok axca mimek tz'uj, caytu' yel chiq'uil yalok, chi ayc'ay sat tx'otx'.

⁴⁵Axa yet max lajwi txajli, max aj wan. Axa meltzoj bay max can eb is cuywom tu'. Axa yet max apni bay eb, max yiloni, waynak el eb. Max oc numnaj wayan eb yuj cusc'ulal.

⁴⁶Yuj tu' xan max yal bay eb axca ti': —¿Tzet yuj xan chex wayi? Ajanek wan. Txajlanek, yet watx' c'am chex ikbelay yin yobtakil, ẍi bay eb.

⁴⁷Lananto yalon Jesús bay eb axca tu', cax max jay bulnaj jun miman bulan anima bay tu'. A Judas, nak ayoc bisilok eb lajcawan, a' babel satak eb, max jayoc lemnaj yin Jesús, yuj ul tz'ubon el is ti'.

⁴⁸Axa yalon Jesús bay axca ti': —Judas, ¿tom axca ti' chin ot aon oc yul k'ab camich, ayin Chekbilintek yuj Dios xol eb jet animail ti', xan cha tz'ubil in ti'? ẍi bay.

⁴⁹A yet max yilon eb ajun yetok Jesús tzet yetal lanan jayoc yiban, max k'anlen eb bay axca ti': —Mamin, ¿chi mi je' co xikon eb yetok jespada ti'? ẍi eb bay.

⁵⁰Yet jun bek tu', ay jun is cuywom tu' max xikon el is txiquin jun is moso cham sat sacerdote, c'uxanc'al a is watx' max michchaj yuj.

⁵¹Axa yalon Jesús bay eb is cuywom tu' axca ti': —Bekek. Man e yut axca tu', ẍi bay eb. Max lajwi tu', axa toj matxan yin is txiquin nak tu', max occan yuj junelxa.

⁵²A eb sacerdote yetok eb yajawil templo Dios, c'al eb ichamtak winak ay yikbej, a eb max jayoc ul mitx'on Jesús. Yuj tu' xan max yal Cham bay eb axca ti': —¿Tokwal ikbajwom in xol eb yob is nabal che yila', yuj tu' xan chex jay win yetok espada c'al te'?

⁵³Ayinc'al ec' e yetok junjun c'u yul templo Dios, palta maj in e mitx' paxok; palta a ton yorail e yak'on e nabal ti', yetok c'apax nak yajawil k'ekk'inal, ẍi bay eb.

⁵⁴Max lajwi tu', max oc mitx'naj eb yin Jesús. Max yiontok eb bay yatut cham sat sacerdote. A pax Pedro xin, najat tzakanxac'al chi yut ba.

⁵⁵Max yaoc eb taynem templo is k'ak' bay yamak'il ti na tu', max ay chotan eb, max oc oyan eb yin k'ak', cax max jayoc Pedro, max ay chotan xol eb.

⁵⁶Ay jun ix criada max ilon oc Pedro yet chotanxa ay xol eb tu', max oc t'anan ix yin, max yalon ix axca ti': —A jun winak ti', yetbi ba yetok Jesús, ẍi ix.

⁵⁷Palta maj tak'wejc'al oc Pedro yin. —Ach ix, man wojtakok jun mactxel chal tu', ẍi bay ix.

⁵⁸Junixto bek tu', ay junokxa mac max ilon oc yin, max yalon c'apax axca ti': —Ach ti', et beyom a ba yetok eb, ẍi nak bay. —C'amak cha, man wet beyomok in ba yetok eb, ẍi bay nak.

⁵⁹Junixtom wal hora yalon jun tu', max watx' alnenxac'al junxa axca ti': —A nak ti', wal yel yetbeyom ba yetok Cham max ilay jay ti', yujtol yet aj Galileail ba nak yetok eb, ẍi junxa tu'.

⁶⁰Wal yel cha, caw wal man wojtakok tzet chal tu', ẍi Pedro tu' bay nak. Lananto wal yaloni, cax max ok'aj no caẍlan.

⁶¹Axa meltzojtok acan Cham Jajawil yin Pedro tu', xan max natek tzet max yal Cham bay. Tix ton max yut yalon Cham bay ti': Oxelxa quin eon el en, ok aloni tol mayin ojtakok, cax ok ok'aj no caẍlan yet jun ak'bal ti', ẍi Cham bay.

⁶²Axa yel besnaj xol eb tu', cax yeltok yok' sic'libil yina.

⁶³A eb chi taynen Jesús, max buchwaj eb yin, cax max mak'on c'apax eb.

⁶⁴Max makchen eb is sat, max c'oli tzak'ontok eb sat. Max lajwi tu', max tz'akon k'anlen eb bay axca ti': —Al ayon, mac chach mak'on chabej, ẍi eb bay.

⁶⁵Manxa wal jantakok tzet max yal eb bay yin buchwal k'anejal.

⁶⁶Axa yet max sakbi, max wajban ba eb icham winak ay yikbej xol eb yet israelal, yetok eb yajawil eb sacerdote, c'al eb meẍtol yin ley Moisés. Max yiontok eb Jesús satak eb sat yajaw. Max k'anlen eb bay axca ti':

⁶⁷—Al ayon, ¿tom yel ach Cristo ach? ẍi eb bay. —Nabac'al chi wal ayex, tok ok e yaoc yin e c'ul.

⁶⁸Yetok c'apaxok, ta ay tzet chin k'anlej el ayex, ¿tom ok e yal ayin?

⁶⁹Palta ayin Chekbilintek yuj Dios xol eb jet animail ti', a tinani' ok in apnok chotan bay is watx' k'ab Dios, Cham chic'al je' yuj masanil, ẍi bay eb.

⁷⁰—¿Tom C'ajol ach Dios chi yal tu'? ẍi eb bay. —Ayin ti', C'ajol in ton Dios, axca e yalon ti', ẍi bay eb.

⁷¹Axa yalon eb axca ti': —A tinani' manxa yowalilok ay co testigo. Ilab a wal caw chi aloni, ẍi eb.