Read Q'anjob'al Lc 3 Bible Online

Lc 3 - Q'anjob'al bible

Lc 3

¹A yet olajonebxa abil yak'on cham Tiberio yajawil bay Roma, axa Poncio Pilato ayoc gobernadoral bay Judea. Axa Herodes ayoc gobernadoral bay Galilea. Axa jun yuẍtak chi yik Felipe ayoc gobernadoral bay Iturea c'al bay Traconite, axa cham Lisanias ayoc gobernadoral bay Abilinia.

²Axa cham Anás yetok cham Caifás ayoc sat sacerdoteal. A yet jun tiempoal tu', a bay tz'inan tx'otx', a tu' ayic' Juan c'ajol Zacarías. Ay wal ec' bay tu' max yalon Dios bay tzet ok yal bay eb anima.

³Yuj tu', max ec' bay masanil juntzan lugar bay cawilal a' Jordán. Max ec' yaloncan el xolak anima, tol yowalil chi na ba eb yin is yobtakil, yet watx' chi elcan is yobtakil eb yiban, cax chi yak'on bautizar ba eb.

⁴Axca ton ti' max uji, yuj yunen el tzet albilcan yuj jun chekbej Dios chi yik Isaías: Ay jun mactxel bay tz'inan tx'otx' chi awji, chi yalon axca ti': Watx'nejek junok is be Cham Yajaw. T'inek junok be bay Cham.

⁵Ak'ek noj masanil jobelak; masanil witzlak c'al tzalanlak ak'ek pananbok. Masanil be coxquiẍtak, jichlonelayokabi. Yetok juntzan amquiẍtak, muklayokab elok cax pananbokabi.

⁶Cax ok yilon eb masanil jay Cham Colwajwom chekbiltek yuj Dios, ẍi bay tz'inan tx'otx' tu', ẍi yul tx'an Un Tz'ibbilcanok.

⁷Xiwil eb anima max jayoc bay Juan, yuj ul yak'on bautizar ba eb, palta max yal bay eb axca ti': Ayex ti', caw wal jelan ex yin ioj aytek satej axca no labaj. ¿Mac max alon ayex tol chi je' e colon el e ba bay jun miman yailal ok jay e yiban yuj yowal c'ul Dios?

⁸Ta chi na ba e c'ul yin e yobtakil, yowalil watx' che yut e beybal, yet watx' chi txecloj elok tol yel mayal e na e ba. Manchak e yal axca ti': C'am tzet chi co na', yinatil on Abraham, man quex chiok. Yujtol chi wal ayex, ta chi yal c'ul Dios, chi je' yuten oc juntzan ch'en ti' animail, cax chi oc yinatilok Abraham e q'uexelok.

⁹A jun miman yailal ok jayok, lajan axca junok winak watx'xa yayji yetok yechej yich junok te' yet chi k'akon ajok. Masanil te' man watx'ok sat chi yak'a', chi tzoc'ajok, cax chi yak'on tz'a'ok, ẍi Juan bay eb.

¹⁰—¿Tzet watx' chi jut co beybal xin? ẍi eb bay.

¹¹—Ta ay ex ay ca mojanok e pichil, che yak' junok yet junok mac c'am yet, yetok ex ay tzet che lo', che yak' jabok yet eb c'am yet, ẍi bay eb.

¹²Ay c'apax jaywan eb tekom el tojlabal max jayoc bay Juan tu', yuj ul chaon eb is bautismo bay. Maxc'al jay eb, max k'anlen eb bay axca ti': —Meẍtol, ¿tzet watx' chi jut watx'jok oc co beybal? ẍi eb bay.

¹³—A yet che tekon el tumin yin anima, atac'ala' jantak yalon ley che tekilok, ẍi bay eb.

¹⁴Ay c'apax jaywan eb soldado max jayoc ul k'anlen bay axca ti'; —Axa ayon ti', ¿tzet watx' chi jut co beybal? ẍi eb bay. —Man e xibtej eb anima. Manchak e naaj k'anej yiban eb, yuj e yion ec' tzetak yetal bay eb. K'okbilokab e tojol che yi', ẍi bay eb.

¹⁵A eb anima ayic' bay tu', chi yechbanej eb yabej, yujtol chi na eb, talaj a Juan tu' Cham Cristo.

¹⁶Palta max yal bay eb masanil axca ti': Ayin ti', wal yel chex wak' bautizar yetok aej, palta ay jun mactxel tolto ok jayok. A' ok ak'on Espíritu Santo ayex, ma xin a k'ak' ok yak' ayex, tol ok ex ak'lay bautizar yuj. A jun mactxel chi wal tu', yelxac'al miman yelapnok wintak. Yuj tu' xan man in mojok wak'on serbil jabok, caxc'al yin in xuyon el tx'anil xanab, man in mojok.

¹⁷A jun mactxel chi wal tu', lajan yetok junok winak chi txayej is trigo, yuj yioncan el ixim yakanej xol ixim bak'ej. Chi c'ubaj cantok ixim bak' trigo bay is c'una', axa ixim yakanej chi yak' tz'a xol jun k'ak' c'am oxlajon bak'in chi tani, ẍi Juan tu' bay eb.

¹⁸Xiwiltoc'al juntzanxa cuybanilej axca juntzan ti' max yal Juan bay eb anima tu', yuj yaben eb jun abix watx' yoqui.

¹⁹Yetok c'apaxok, max yak'lej tenchanen Herodes, cham yajaw, yujtol max montej el cham ix Herodías, yistzil yuẍtak. Man asannejok tu', palta aytoc'al juntzanxa yobtakil max el yuneni. Yuj tu' xan max yak'lej Juan tenchaneni.

²⁰Palta a Herodes tu', c'am wal jabok max yikej bay. A ti yet, tol max texac'al yiajtek c'ulok yunen juntzanxa yobtakil, ilab tol max alaytok Juan tu' preso yuj.

²¹A yet junel, yet c'amto chi alay oc Juan tu' preso, lanan yak'on bautizar eb anima chi apni oc bay, max yak'on c'apax bautizar Jesús. A yet lanan txajli Jesús, cax max jakchaj satcan.

²²Axa yayol Cham Espíritu Santo yiban tu' axca junok paloma. Caw miman txequel yet max ayol tu'. Max ablay yoc k'anej max al-lay aytek satcan, max al-lay axca ti': —Ach ton ti', in C'ajol ach, cax camc'ulnebil ach wuj; caw chin tzaloj en, ẍi.

²³30 abilxam wal Jesús, max chaon el yich mulnaj yin yet Dios. A Jesús, c'ajol José naon eb anima. Tix yayji oc eb yichmam José tu': Elí,

²⁴Matat, Leví, Melqui, Jana, José,

²⁵Matatías, Amós, Nahum, Esli, Nagai,

²⁶Maat, Matatías, Semei, José, Judá,

²⁷Joana, Resa, Zorobabel, Salatiel, Neri,

²⁸Melqui, Adi, Cosam, Elmodam, Er,

²⁹Josué, Eliezer, Jorim, Matat,

³⁰Leví, Simeón, Judá, José, Jonam, Eliaquim,

³¹Melea, Mainán, Matata, Natán,

³²David, Isaí, Obed, Booz, Salmón, Naasón,

³³Aminadab, Admin, Aram, Esrom, Fares, Judá,

³⁴Jacob, Isaac, Abraham, Taré, Nacor,

³⁵Serug, Ragau, Peleg, Heber, Sala,

³⁶Cainán, Arfaxad, Sem, Noé, Lamec,

³⁷Matusalén, Enoc, Jared, Mahalaleel, Cainán,

³⁸Enós, Set, Adán. A Adán ti', a Dios max watx'neni.