Read Q'anjob'al Lc 7 Bible Online

Lc 7 - Q'anjob'al bible

Lc 7

¹A yet max xew k'anjab Jesús bay eb anima, max toj bay Capernaum.

²A bay tu' ay jun cham capitán aj Roma. Ay jun is moso cham caw xajan yuj sic'libil, palta ya'ay, cax toxa chi cami.

³A yet max yaben cham k'umal Jesús, max chekontok jaywan eb winak ay yopiso xol eb israel. Max bet oc tean eb yin Jesús yet chi toj yak' watx'jok nak is moso cham tu'.

⁴A yet max apni oc eb bay Jesús, max oc tean eb yin, max yalon eb bay axca ti': —A jun cham capitán tu', moj wal chach colwaj bay cham,

⁵yujtol caw wal ay is camc'ulal cham jin ayon israel on ti'. Max yak' watx'jok cham jun nail bay chi co waj co ba yin culto, ẍi eb bay.

⁶Yuj tu xin, max toj Jesús yetok eb, palta jabxanej wal yapni oc eb bay na tu', max chekon cham capitán tu' jaywan eb is yamigo bay Jesús. Max yalon eb axca ti' bay: —Chi yaltek cham ayach axca ti': Mamin, manchakxa etnej a ba a jay ayin, yujtol man in mojok chach jay yul watut.

⁷Yuj tu' xan tamwal max in tec'baj in ba in toj ayin caw walon ayach yuj nak in moso ti'. Asannejokab tol chala' tol chi watx'jican nak, axa watx'jican nak oj tu'.

⁸Wojtak jun ti', yujtol ayin ti', ay eb wajawil chin chekoni, ac'ala' ay c'apax eb soldado chin cheka'. Ta ay junok mac chin cheka', chic'al yikej toji. Ta ay mac chi wawtej, chic'al yikej jayi. Yetok c'apaxok, ta ay tzet chin chek watx'nej junok in moso, chic'al yikej watx'neni, ẍitek cham capitán tu', ẍi eb bay Jesús.

⁹A yet max yaben Jesús axca tu', caw wal max c'ayaj c'ul yabeni. Axa yoc t'anan yin eb anima tzakan yintak tu', max yalon bay eb axca ti': —Wal yel chi wal ayex, c'amto junok eb jet israelal maxax wil wal yaon oc c'ul win axca jun winak ti', ẍi Jesús.

¹⁰Axa yet max jay eb is chekbej bay na tu xin, max yilon eb tol mayal watx'jican nak mosejal tu'.

¹¹Max lajwi tu xin, axa toj Jesús bay jun conob chi yik Naín yetok eb is cuywom. Xiwil anima max tzakloj yintak eb.

¹²A yet lanan yapni eb cawilal jun conob tu', ay jun camnak lanan toj muklay max yil eb. Xiwil eb aj conob bay tu' tzakan yintak. A nak max cam tu', jun ch'an c'otan nak yuj is txutx, camnakxa yichamil xal txutxej tu'.

¹³A yet max yilon oc Cham Jajawil yin xal txutxej tu', max ok' c'ul Cham yin xal. —Manchak ach ok'i, ẍi Cham bay xal.

¹⁴Max lajwi tu', axa jitzontok ba Jesús cawilal batxlub nak camom tu'. Axa yoc matxan yin is batxlubal tu', max oc wanaj eb batxnej tu'. Axa yalon bay nak camnakxa tu' axca ti': —Ach ach'ej, chi wal ayach, ajan wanok, ẍi bay nak.

¹⁵Axa yaj chotan nak camnak tu', max c'oli k'anjab aj nak. Axa yak'oncan Jesús nak bay is txutx tu'.

¹⁶A yet max yilon eb anima jun ti', caw max xiwaj eb masanil, max yalon eb is watx' k'anej bay Dios: —Caw miman yikbej is chekbej Dios max chektek co xol yuj on is coloni, ẍi eb.

¹⁷A jun tzet max el yunen Jesús yet tu', max abchaj bay masanil Judea, yetok bay juntzanxa conoblak is cawilal tu'.

¹⁸Axa eb cuywom Juan cham ak'om bautismo, a' max bet alon bay jantak tzet max el yunen Jesús, xan max yawtejtek Juan tu' cawan eb is cuywom.

¹⁹Axa chekontok eb bay Jesús yuj toj k'anlen eb, ta a Jesús Cham Cristo, ta a' lanan yechbanen eb jayi, ma tx'ok junokxa chi yechbanej eb jay xin.

²⁰Yuj tu', a yet max jayoc eb bay Jesús, max yalon eb axca ti' bay: —A Juan cham ak'om bautismo cheknejontek ayach. Chi ul co k'anlej ayach ta ach Cristo ach, a ton Cham lanan jechbanen jayi, ma tx'ok junokxa chi jechbanej jay xin, ẍi eb bay.

²¹Yet-xac'al jun bek tu', xiwil eb ya'ay yuj tzanc'al tzet yailal, c'al eb ayoc espíritu yob yin max watx'jican eb yuj Jesús. Xiwil c'apax eb c'am chi je' yilwi max jakchajcan sat yuj.

²²Xan max yal Jesús bay eb chekbej Juan tu' axca ti': —Paxanek bay Juan. Che yal bay, masanil tzetak max e yabej c'al tzetak max e yil cayti'. Che yal bay, tol ay eb c'amc'alta' chi je' beyi, chixa bey eb tinani'. A eb ayoc lepra yin, chi watx'jican eb. A eb c'am chi je' yabeni, chixa yab eb. Aylaj eb camnak lanan yictzojcan ajok. Lanan yal-laycan el k'anejal yet colbanilej bay eb meba'.

²³Watx' yet eb c'am chi somchajcan el c'ul win. Caytu' che yut e yalon bay Juan tu', ẍi Jesús bay eb.

²⁴A yet mayal paxcantok eb chekbej tu', max yalontek Jesús yuj Juan tu' bay eb anima axca ti': Naektek, tzet max bet e yil bay tz'inan tx'otx'. ¿A mi junok te aj chi ec' meeok yuj cak'ek' max bet e yila'?

²⁵Ta man ajok, ¿tzet max bet e yil xin? ¿Ma a junok winak watx' pichay max bet e yila'? E yojtak tol a eb watx' pichay tu', c'al eb xiwil tzet ay, a bay yatut eb rey ay eb.

²⁶Ta c'amak xin, ¿tzet max bet e yila'? ¿Ma a junok chekbej Dios max bet e yila'? Wal yel chekbej ton Dios jun max bet e yil tu'. Palta a Juan tu', man asannejok chekbej Dios tu' yopiso.

²⁷A ton yabixal Juan ti' yalnakcan Dios yul tx'an Un Tz'ibbilcan axca ti': Ok in chek babjok in chekbej a satak yet watx' chi toj watx'nej a be, ẍi.

²⁸Chi wal ayex tol a xol eb anima yulyibank'inal ti', c'am junok mactxel ec'ban yelapnok yintak Juan tu', palta a xol eb ayxa oc yul k'ab Dios xin, ta ay junok yaynakil yayji, ec'banc'alta' watx'il yet yintak Juan tu', ẍi Jesús bay eb.

²⁹A yet max yaben eb anima yetok eb tekom el tumin tzet max yala', max yalon eb tol caw wal watx' Dios, yujtol max yak' ba eb yak'lay bautizar yuj Juan tu'.

³⁰Palta eb fariseo yetok eb meẍtol yin ley Moisés, maj je' eb yak'lay bautizar. Axca ton ti', chi yut tx'oxk'abnen el eb tol a tzet chi yochej Dios yin eb, c'am jabok yelapnok yul sat eb.

³¹Axa yalon Cham Jajawil bay eb anima ayic' tu' axca ti': A wal eb anima yet jun tiempoal ti', ok waltek ayex tzetbil yayji nabal eb.

³²Lajan eb axca unin toc'al chi ec'jab txonbal. Aylaj eb chi yal bay juntzanokxa yet uninal axca ti': Nabac'al max jetnej co ba co xuon bit yin chirima e yuj, palta majc'al ex canalwok paxok. Yetok c'apaxok, nabac'al max co bitnej juntzan bit cusiltakxac'al yoqui, palta majc'al e tz'ak ok' pax e ba jetok, ẍi eb. Axca wal eb unin c'am chi sakchi ti', cay wal tu' eb anima chi wal ti'.

³³Yujtol beybalnebil yuj Juan tu' tol c'am chi lowi, c'am chi yuc' vino. Yuj tu' xan ayex che yala' tol a espíritu yob junok chi etneni.

³⁴Max lajwi tu', max in jay ayin Chekbilintek yuj Dios xol eb jet animail ti'. Ayin ti' chin lowi, chi wuc'a', palta ayex che yal axca ti' win: A Jesús tu', asanc'al loj c'al uq'uej vino chi yochej. Yamigo ba yetok eb tekom el tojlabal, c'al yetok juntzanxa eb yob is beybal, quex chi win.

³⁵Palta a eb ayoc jelanil Dios yin, chi txecloj el is jelanil eb tu' yin tzet chi el yuneni, ẍi Jesús bay eb.

³⁶A yet junel, ay jun fariseo max awten Jesús low bay yatut. Lajwi yapni, axa yay tz'eyan low yetok cham tu'.

³⁷Palta ay jun ix aj conob bay tu' caw wal yob is beybal. Max yab ix k'umal tol max apni oc Jesús low bay yatut cham fariseo tu'. Axa toj ix bay tu'. Yetbi oc ix jun alabastro*fn* nojnak yuj jun ambal suk'uk'ixac'al yoc jab.

³⁸Max apni oc jajan ix is cawilal Jesús, max c'oli yok' ix. Axa tx'ajon el ix yakan Cham yetok yal sat tu'.*fn* Lajwic'al tu xin, max joon tak ix yetok xil, cax max tz'ubon el ix. Axa tobon oc ix jun ambal suk'uk'i jab tu' yin yakan Cham.

³⁹Axa yet max yilon cham fariseo jun tu', max naon cham axca ti': Ta yel chekbej Dios jun winak ti', chi mi nachaj el yuj tzet ixal jun chi mitx'on yakan ti'. Chi mi nachaj c'apax el yuj tol yob beybal ix, ẍi cham yul is c'ul.

⁴⁰Axa yalon Jesús bay cham axca ti': —Simón, ay jabok tzet chi wochej chi wal ayach, ẍi Cham bay. —Al xin Mamin, ẍi bay Cham.

⁴¹K'inalok ay cawanok winak ay jec bay is patrón tinani'; ta 500 denario jec junok, axa junokxa, 50 denario yet.

⁴²Palta k'inalok ta c'am bay chi yi' eb ch'en, cax toc'al chi joc'ay cham aj tumin tu' yiban eb. ¿Mactax junok yel chi camil yin cham aj tumin tu' cha na'? ẍi Jesús bay cham.

⁴³—A chin na' ayin ti', a nak yel miman jec chi jolayc'ay yiban yuj cham tu', a nak tu' yel miman chi camc'ulnen cham, ẍi Simón tu' bay. —Yel ton chala', a ton nak, ẍi Jesús.

⁴⁴Max lajwi tu xin, max oc t'anan Cham yin ix ix tu', axa yalon Cham bay Simón tu' axca ti': —A yet max quin jay yul atut ti', maj ak' jabok wa' tx'ajilok wakan, palta ilab jun ix ti', max tx'ajil wakan yetok yal sat. Max lajwi tu', max joon tak ix yetok is xil.*fn*

⁴⁵Maj a tz'ubil in ti ti' yuj a tx'oxk'abnen el a camc'ulal, palta jun ix ti', yecheltaxc'al in jay cayti', c'amc'al chi bek tz'ubon el wakan.

⁴⁶C'am jabok yanil in jolom max aajtok. Palta jun ix ti', max tob oc ix jun ambal suk'uk'ixac'al jab yin wakan ti'.

⁴⁷Xan chi wal ayach, caw wal miman camc'ulal jun ix ti', yujtol caw wal miman is yobtakil max jolay c'ay yiban. A pax mac jab ch'an is yobtakil chi jolay c'ay yiban xin, jab ch'an is camc'ulal chi tx'oxo', ẍi bay Simón tu'.

⁴⁸Max lajwi tu', max yalon Cham bay ix ix tu' axca ti': —Ti chi lajwican a yobtakil eban, ẍi bay ix.

⁴⁹Axa c'oli yalubtanen jaywanxa eb ayic' yetok tu' axca ti': —¿Maclajtxel jun winak ti'? Ilab chi je' jooncan c'ay yobtakilej yaloni, ẍi eb.

⁵⁰Max lajwi tu', axa yalon Jesús bay ix ix tu' axca ti': —Mayal ach colchaji, yujtol max quin aoc yin a c'ul. Yuj tu' paxan yin tzalojc'ulal, ẍi Jesús bay ix.