Read Q'anjob'al Dt 1 Bible Online

Dt 1 - Q'anjob'al bible

Dt 1

¹A ton juntzan k'anej ti' max yal cham Moisés bay masanil eb conob Israel bay k'axepal ec'tok a' Jordán bay tz'inan tx'otx', bay Arabá satak a' Cakyin Mar, bay nan xol Parán yetok Tofel, Labán, Hazerot, c'al Dizahab.

²Ay 11 c'ual is tec'banil chi el bay Horeb, chi tojc'al bay witzal Seir, masantac'al chi apni oc bay Cades-barnea.

³A yet ayxa oc yin 40 abil yel eb conob Israel bay Egipto, yet babel c'ual yet 11 xajaw, a yet tu' max yalon cham Moisés bay conob Israel masanil tzet max yal Jehová yin eb.

⁴A yet c'amto chi yal Moisés juntzan ti', mayal ayc'ay Sehón is reyal eb amorreo yuj. A bay Hesbón cajan ec' Sehón tu'. Axa bay Edrei max ay c'apax c'ay Og reyal Basán, cajan ec' bay Astarot.

⁵A bay k'axepal ec'tok a' Jordán, bay tx'otx' tx'otx' yet eb Moab, a bay tu' max oc ijan cham Moisés yak'on cuybanil eb israel, max yalon axca ti':

⁶A Jehová, Cham co Diosal max k'anjab ayon bay Horeb, max yalon axca ti': Mimanxa tiempo ayex ec' bay jun tzalan ti'.

⁷Meltzojanek cax chex tojcan bay witzal yet eb amorreo c'al bay masanil yul is makbej eb tu', bay Arabá, bay witz c'al bay jobelak, bay Néguev, c'al bay is tilak a' mar, bay tx'otx' yet eb cananeo c'al masanil yulak yet Líbano masantac'al bay a' miman aej Éufrates.

⁸Yujtol mayal wak' tx'otx' tx'otx' tu' yul e k'ab. Ocanek, cajayanek bay tx'otx' tol max wak' in ti' wak'on bay eb e yichmam, a ton Abraham, Isaac c'al Jacob, c'al bay is yinatil eb, ẍi Jehová.

⁹A yet jun tiempoal tu' max wal ayex: Maj je' wuj ex wilon in tx'oklil.

¹⁰Xiwilxa juninal max ak'lay yuj Jehová, xan a wal tinani', caw wal miman conobxa jayji ocok, lajanxa co bisil axca waycan ay bay satcan.

¹¹A Jehová co Diosal, yetok eb jichmam, yinxaokab milal ok yut co bisil yintak tinani'. Yak'okab wal watx'c'ulal, axca wal max yun yak'on is ti'.

¹²Yuj tu' xan maj je' wuj in tx'oklil ex wiloni, c'al in watx'nen el masanil owal, c'al caklejbail ay e xol.

¹³Yuj wal tu xin, siq'uek el eb winak caw wal ay is jelanil xol junjun tribu, a ton eb aj nabal, eb ojtakbilxa, tol chi je' yuj, a juntzan eb tu' ok waoc e yajawilalok ayex ti', quin chi.

¹⁴Axa ayex ti', max ex tak'wi: Caw wal chi cha' co c'ul masanil tzet max a na' tu', quex chi.

¹⁵Caytu' max yun in sic'on el xol junjun e tribual eb winak tol ay is nabal, cax tol mimek yelapnok. Max waon oc yikbej eb yin yoc e yajawilok: ay eb max waoc yajawilal yin 1,000 anima, axa juntzanxa eb max waoc yajawilalok yin 100 anima, axa juntzanxa yin 50, c'al yin 10, axa juntzanxa xin, max waoc eb yin yajawilal yin junjun tribu.

¹⁶Ac'ala' c'apax bay eb e yajawil tu', max wak' c'apax juntzan chekbanilej ti': tol chi yil eb masanil e cawxinakil, cax lajan chi yun ex beyc'ulnen el eb, a ton ayex jet conob ex ti', yetokc'al eb tx'ok conobal.

¹⁷A yet chex beyc'ulnen eb, maj yut eb yin q'uexanc'ulal e yin; lajanc'al chi yun beyc'ulnen el eb e cawxinakil, mac tol yaynakil yayji, c'al mac mimek winak yayji ocok. C'amokabc'al junok bay chi xiw eb, yujtol a beyc'ulal tu', man yetok eb, palta yet Dios. Ta ay wal tzet yetal tol caw wal miman yayji oc xin, yiokabtek eb ayin, ayinxa ok in beyc'ulnej elok, quin chi.

¹⁸A yet tu' max wal bay eb masanil tzet yetal yowalil chi yun eb.

¹⁹A yet max on el bay Horeb, max co t'inontok co ba bay siquilal tx'otx' yul yet eb amorreo, yuj jiken tzet max yal Jehová co Diosal. Max con ec'c'al bay jun miman takin tx'otx' ti' tol ayxa is may, ayex wal caw max e yila', masantac'al max yal japni oc bay Cades-barnea.

²⁰A baytu' max wal ayex, tol mayal on apni oc bay siquilal tx'otx' yul yet eb amorreo, a ton jun tu' ok yak' Jehová co Diosal ayon. Ocanek xin, iek ec' tx'otx', cajayanek bay tu', axca max yun yalon Jehová ayon, a ton Cham co Diosal yetok eb jichmam. Manchak ex xiwi, tamwal cabax aj e c'ul, quin chi.

²²Axa ayex ti' max ul e yal ayin: Yelxac'al mi watx', ta ay jaywanok on chon babjitok yet chi toj jilon juntzan nación tu', cax chon meltzoj ul jaloni, tzet beal bay ok ca co toji, c'al tzet conobal bay ok ca joqui, quex chi.

²³A tzet max e yal tu', watx' max wabej. Yuj tu' xan max in siq'uil lajcawan eb winak e xol ayex ti', junjunc'al yin junjun tribu.

²⁴A ton eb tu' max toj bay siquilal tx'otx', cax max apni oc eb bay jobeal Escol, max ec' eb bay masanil jun lugar tu'.

²⁵Max lajwi tu' max yiontek eb janic'ok sat awoj bay jun tx'otx' tu' ayon. A yuj tzet max yal eb tu', xan max nachaj el juj, tol caw wal watx' tx'otx' ok yak' Jehová co Diosal ayon.

²⁶Axa ayex ti', maj yal e c'ul max ex toj bay jun tx'otx' tu', palta tol max e ten tzet max yal Jehová co Diosal.

²⁷Axa bay cajan ex max c'oli e yalxi ajok, max e yalon axca ti': A Jehová c'am chon yochej, xan max on yieltek bay Egipto; asan yet chon yaoc yul k'ab eb amorreo, cax chon yak'on lajwok eb.

²⁸Axa tinani' xin, ¿baytal ok ca co toji? A eb jet conob chi aloni, tol a bay tu' ay eb winak tol tec'an, mimek winak, mimek is tel eb jintak, mimek yayji oc is conobal eb, tol ayoc mimek muralla yinlak. Max yilon c'apax eb juntzan mimek winak yinatil Anac. A yuj masanil juntzan tu', junelnej max cabax aj co c'ul yuj, quex chi.

²⁹Catatu' max in tak'wi: Manchak ex xiwaj yuj juntzan tu'.

³⁰A Jehová co Diosal ok babjok co satak, a Cham ok yak' owal juj axca wal max yun e yilon tzet max yun juj bay Egipto,

³¹c'al bay takin tx'otx'. Yetok wal is yipalil, max on yiontek yulak be bay takin tx'otx', masantac'al max yal co jayoc bay jun lugar ti', axca wal junok mamej tol chi lacaj is yuninal, quin chi.

³²Palta ayex ti', caw wal maj e yaoc e c'ul yin Jehová co Diosal,

³³a wal caw Cham babel toj co satak. A yet ak'balil chon tzektanelay yuj junok axca k'ak'ej, axa yet c'ualil xin, chi tx'ox c'apax yetok jun asun bay chi ca co toji, c'al baytal chi je' jayji ec'ok.

³⁴A yet max yaben Jehová tzet max e yala', caw wal max tit yowal, max yak'on is ti' axca ti':

³⁵C'am wal junok juntzan winak caw wal yob is nabal ti', ok ilon tx'otx' tx'otx' max wak' in ti' wak'on bay e yichmam.

³⁶Asan Caleb, is c'ajol Jefone ok ilonok, xan a bay, yetok yinatil, ok wak' tx'otx' bay max betic' ec'jabok, yujtol max yikej yetok masanil c'ul tzet max wala', ẍi Jehová.

³⁷E yuj wal ayex ti', xan max tit c'apax yowal Jehová win, max yalon ayin axca ti': Tamwal ok ach oc c'apaxtok ayach ti'.

³⁸A Josué a colwajwom, is c'ajol Nun, a' ok octok a q'uexelok; xan iptzej Josué tu' yujtol a' ok ak'on jun lugar tu' bay eb et israelal ti', ẍi Cham ayin. Max yalon c'apax Cham ayex:

³⁹Caxc'al ayex ti', che yaoc yin e c'ul, tol ok occan eb e yuninal yin mosejal yuj eb ajc'ul, palta a eb e yuninal tu' tol c'amto is nabal, ok octok eb bay jun lugar tu'. Ayin ok wak' tx'otx' sataknej eb.

⁴⁰Yak'ban c'amto chi yunej, meltzojanek bay takin tx'otx', cax chex tojcan junelxa bay be chi apni bay a' Cakyin Mar, ẍi Jehová.

⁴¹Ayex ti' max e yal ayin axca ti': Max oc co mul bay Jehová co Diosal, palta tinani' xin, tonek, jak'ek jip axca wal max yun yalon Cham ayon, quex chi. Max e yiontok e mitx'k'ab yet owal, max e na' tol subojxac'al ok yun e yion tx'otx' siquilal tx'otx' tu'.

⁴²Palta a Jehová max aloni, tol chi wal ayex: Manchak e yak' owal, manchak e tec'baj e ba bay eb ajc'ul, axa talaj chi yunej, chex ayc'ay yuj eb, yujtol c'am in oc e yetok, ẍi Cham.

⁴³Max wak' juntzan tu' e yojtaknej elok, palta ayex ti' maj e cha e yabej. A ti' e yet, max e ten tzet max yal Jehová, max e yaon oc e yet, max ex ajtok bay siquilal tx'otx' tu'.

⁴⁴Xan a eb amorreo cajan bay tu', max eltek eb e yin, max tzakloj eb e yintak, axca chi yun no noal xux, masantac'al max yal e yayc'ay yuj eb bay Seir, max apnitac'al oc bay Horma.

⁴⁵Axa yet max ex meltzoj xin, max c'oli e yok' bay satak Jehová, palta majxac'al tak'wok Cham ayex.

⁴⁶Yuj tu' xan caw wal miman tiempoal max on cancan bay yul makbej Cades.