Read Q'anjob'al Dt 13 Bible Online

Dt 13 - Q'anjob'al bible

Dt 13

¹Ta ay junok mactxel chi aj wan e xol tol chekbej Dios yaloni, cax chi c'oli yaloni tol ay ilwal chi yila', ma chi tx'oxon el e xol tzet yetal tol c'ayubtakxac'al yoqui, ma chi yalon yin ayoktoc'al yuj junok tzet yetal ok ujok,

²ta c'uxan chi yun tzet chi yal tu' cax chi c'oli yalon ayex axca ti': Titanek, ay wal juntzanxa dios man e yojtakok. Tonek ayokonek jajan satak, chon oquek ayilal bay, ta ẍi ayex.

³Manchak e yaoc yin e c'ul caxc'al chi eloc axca wal yalon tu', yujtol a Jehová co Diosal chi ilon oc e nabal yet chi yila' ta yel ay e camc'ulalil yin, yetok masanil e c'ul, c'al yetok masanil e yanimail.

⁴Tzaklojanek yintak Cham cax ayokab yelapnok yul e sat. Ikejek is chekbanil. Abek tzet chi yala', ocanek yin ayilal bay, cax junejokabc'al e yayji yetok Cham.

⁵Axa pax mac chi yaloc ba chekbejok Jehová tu xin, ma chi yala' tol chi yil ilwal yaloni, a jun tu' yowalil chi ak'lay camok, yujtol chi yochej chex elcan yintak tzet max yal Jehová ayex tol che yikej, cax chex yikbaj yin tenomtakil satak Jehová, Cham max on colon eltek bay Egipto, bay ayon oc yin mosejal. Yuj tu' mak'ek camok, yet watx' chi c'ayil jun yobtakil tu' e xol.

⁶Yuj wal tu xin, ta a e yuẍtak, ma e c'ajol, ma e cutz'in, ma e yetbi tol camc'ulnebil e yuj, ma xin junok caw wal watx' e yak'on yetok, chex ikbantok yin ewantakil yin e yoc ayilal bay tzet chi alay oc diosal, tol man e yojtakok tamwal eb e mam e txutx yojtak,

⁷a ton is diosal eb anima oyan oc e yinlak bay cawil, ma bay najat,

⁸c'am che yikej bay tzet chi yochej, tamwal che cha e yabej, tamwal che junanej e nabal yetok. C'amc'al chi cusoc e c'ul yin, tamwal e yeban elok.

⁹A ti' e yet, aek oc yul k'ab beyc'ulal yet camich, yet chi camxac'al. Ayex caw babel che yiaj ch'en ch'en cax che k'okon camok. Caytu' chi yut masanil eb conob e yetok.

¹⁰K'okch'enelayokab jun mactxel tu', cax chi cami, yujtol chi yochej chex yiel yintak Jehová, Cham max con ion eltek bay Egipto, bay ayon oc yin mosejal.

¹¹Axca wal tu' ok yun yojtaknen el masanil conob, c'al xiwajok, cax c'amxa chi yaoc eb is mul axca juntzan max uj tu'.

¹²Ta chi ablay k'umal, tol a bay junok juntzan conob max yak' Jehová co Diosal ayex bay chex cajayi,

¹³ay mac c'am chi yikej bay Dios, cax chi yikban yun eb anima bay cajan eb tu' yet chi oc eb yin ayilal bay comon dios man ojtakbilok, taẍi eb,

¹⁴yowalil chi cam wal e beyc'ulnen el jun tu' ayex ti'. Tatol yel jun k'anej tu', tol ay mac chi beybalnen jun tzet yetal man watx'ok tu' e xol,

¹⁵ta axca tu', a masanil eb cajyom bay jun conob tu' chi tzoc'lay cam eb yetokc'al masanil is jobbejal no', cax che yak'on lajwok masanil tzet ay bay jun conob tu'.

¹⁶A bay nan yul txonbal, a tu' che wajbaj oc masanil is beyomal eb, cax che yaon oc k'ak'al jun conob tu', yetokc'al masanil tzet yetal ay bay, cax che yak'on tz'a masanil, axca junok ofrenda yuj e yion aj can Jehová co Diosal. A jun conob tu', chi canxac'al can bulan is pojilal axca tu'. Junelnej c'amxa chi ca watx'nelay ajok.

¹⁷A juntzan tzet yetal tol mayal al-layi, tol chi lajwi ayok, c'amc'al jabok tzet yetal tu' chi can e yetok, yet watx' c'amc'al chi tit yowal Jehová co Diosal e yin. A ti' yet tol ay is watx'c'ulal e yin, ok yiaj can e bisil axca max yun yak'on is ti' bay eb jichmam,

¹⁸ta che yikej masanil juntzan is chekbanil chi walcan ayex ti' tinani'. Asan tzet yetal tojol che yun satak Cham.