Read Q'anjob'al Dt 14 Bible Online

Dt 14 - Q'anjob'al bible

Dt 14

¹Ayon ti' yuninal on Jehová co Diosal. Manchak jak' yasjok co mimanil, tamwal co tzukon el xil co jolom bay co satak yet chi cam junok anima,

²yujtol ayon ti', is conobal Jehová co Dios jayji. A Cham max on sic'on el bay xol juntzanxa conoblak bay sat tx'otx' ti', yet chon occan is conobok.

³C'am che chi' no no' man watx'ok yul sat ley.

⁴Tixton is listail no no' chi je' e chion ti': No wacax, no calnel, no chiwo,

⁵no gacela, no tx'ucchej, no gamos, no xolakilteal chiwo, yetokc'al masanil pojanil no antílope.

⁶Chi je' e chion masanil no no' tol chi jutx' yan, cax tol pojan nan yisk'ak.

⁷A pax juntzanxa no' ti xin, c'am chi je' e chion no': A ton no camello, no tejón, c'al no txitx. A juntzan no' tu' man watx'ok no'; chi jutx' no yan, palta tol xiwil yisk'ak no'.

⁸Axca no txitam, pojan nan yisk'ak no', palta c'am chi jutx' no' yan. A no' tu', yowalil che na' tol man watx'ok no'. Manchak e chi' juntzan no' tu', tamwal che mitx' yet camnakxa.

⁹A pax masanil no' ay bay yulak a' aej xin, chi je' e chion no' ta ay is xic', c'al tuminal yin.

¹⁰A pax no' c'am yet xin, c'am che chi' no'. Yowalil che na' tol man watx'ok no'.

¹¹Masanil no tz'iquin, watx' chi je' e chion no',

¹²palta ay juntzan no' c'am chi je' e chioni: axca no águila, no quebrantahueso, no asor,

¹³no' gallinaso, no milano,

¹⁴yetok c'apax masanil pojan no joj;

¹⁵no avestruz, no lechuza, no teẍeliẍ, yetokc'al masanil pojanil no tx'acbaj,

¹⁶no tonton, no ibis, c'al no cisne,

¹⁷no pelícano, no ostoc, c'al yetok no cormorán,

¹⁸no cigüeña, no garza, no abubilla, c'al yetok no sotz'.

¹⁹Masanil no coc'lak no' ay is xic' chi ec' yin bulanil, man watx'ok no'. C'am chi je' e chion no'.

²⁰A pax no coc'lak no' tol ay is xic' albilxa tol watx', chi je' e chion no'.

²¹C'am che chi' junok no' toc'al chi camaj axcac'al tu', yujtol a jun conobal on ti', sic'bil on el yuj Jehová co Diosal. Palta chi je' e yak'on bay eb tx'ok conobal cajan ec' e xol tu'. A eb tu' chi je' chioni, ma xin, chi je' c'apax e txonon bay eb tx'ok conobal, toc'al chi ec'jab e xol. Manchak e txic no yune' chiwo xol yal yim is txutx.

²²Junjunc'al abil yowalil che pojcan el is diezmoal sat e yawoj che waja'.

²³A ton diezmo che yiel yin e trigo, yin e vino, c'al yin e yaceite, yetok c'apax yin babel yune' e wacax, c'al yin babel yune' e calnel. A no' tu' che chi' ayex ti' bay satak Jehová co Diosal, a ton bay jun lugar, tol a Cham ok sic'on el yet chi oc ayilal bay, yet watx' miman yelapnok Cham yul e sat.

²⁴Ta a jun lugar bay chi oc ayilal tu', yelxac'al najat chi can bay ay e yatut, xan ta c'am chi je' e yiontok diezmoal e tzet yetal ok yak' Jehová ayextac'al bay tu',

²⁵chi je' e txonon el e diezmo tu', axa ch'en tumin che yitok bay jun lugar max sic'can el Cham tu'.

²⁶Axa yetok ch'en tumin tu' chi je' e manon bay tu' tzet chi cha' e c'ul: axca no wacax, ma no calnel, ma vino, ma junokxa makan uq'ueja' tol max pajbi; mac'al juntzanokxa tzet yetal chi yochej e c'ul, cax chex low satak Jehová bay tu', che chaon k'in yetok e familia.

²⁷Manchak e yintaknejcan el eb levita cajan bay yul e conobal. Ilab tol maj yi eb tx'otx' tx'otx' is satakok axca e yet ayex ti'.

²⁸Yin oxox abil che pojcan el is diezmoal sat e yawoj che waj yet jun abil tu'. A tu' che wajbaj bay yul e conobal tu',

²⁹xan a yet ok apnok oc eb levita tol maj cha' is tx'otx' satakok e yetok, ma eb tx'ok conobal cajan ec' e xol, ma eb meba' c'amxa mam c'amxa txutx, c'al eb xal ix camnakxa yichamil, chi je' loon eb e diezmo wajan ec' tu'. Caytu' ok yun yak'on Jehová co Diosal yaxilal yiban masanil tzet che yun tu'.